Seia Tatou Toe Feiloai
Tau, Sola, pe Talia ia Sauaga?
Pe a feagai ai ma sauaga, o a ni filifiliga o loo ia i tatou i le avea ai ma ni soo o Keriso?
Sa ou le mautinoa le mea e fai i lena aoauli i lo’u 14 tausaga. Sa tuleiina au agai i le puipui o le faleaoga, ma tatu’i au e se alii fia malosi. Ona sa siomia au e le toatele o ana uo, o lea sa ou filifili ai e talia ia sauaga.
Sa ia tu’iina a’u, ona ia kikiina lea o a’u. Faatele.
Sa iu loa ina latou o ma ana uo. Na sau la’u pasi, ma sa ou oso i luga. Ana le tu a le pasi e le ea i luga lo’u ulu. Na mavae le 50 tausaga, ou te mafaufau pea lava pe o lo’u palaai po o le onosai faa-Kerisiano na ou faatinoina.
O lenei aafiaga e faamamafaina ai ni fesili le mautonu tatou te feagai ai o ni Au Paia o Aso e Gata Ai. Pe a osofaia o tatou talitonuga, pe tatou te tau, sosola, pe talia ia sauaga?
E manino lava le fetalaiga a le Faaola: “Ai se na te po mai i lou alafau taumatau, ia e liliu atu ia te ia le isi” (Mataio 5:39). Ou te mafaufau pea, Pe na faaaoga ea e Iesu ni faailoga e aoao ai e na mulimuli ia te Ia e aua nei tali atu i sauaga faamasaatoto tau ma sui, e pei o faiga sa masani ai? Atonu.
Ma lea foi, mafaufau i le fautuaga i le Mataupu Faavae ma Feagaiga.
I le 1833 sa feagai le Ekalesia ma nei sauaga mamafa, aemaise lava i Misuri. I le puipuiga o o latou ola, sa faaaoga ai e tagata o le Ekalesia a latou meatau. I lena taimi, sa faaali mai e le Alii le mataupu e 98. I lena mau, sa Ia aoao ai i latou ia taofiofi—e tusa ai ma mea ua faatulagaina. Sa ia i latou le aia tatau e puipuia ai i latou, ae afai latou te teenaina, o le a Ia tauia i latou. Afai e saili e le fili le faamagaloga, e tatau i le Au Paia ona faamagalo “fa’afitugafulu ni fitu” (fuaiupu e 40). E tusa ai ma le o e tau, e tatau ona latou muamua saili le filemu ma tau lava pe a poloaiina ai e le Alii.
Ua suia taimi talu mai na aso leaga, ae i nisi auala e tumau lava le osofaia o le Ekalesia. E tele lava ina ave sese a tatou mataupu faavae. O talitonuga e leai se faamautinoaga, o faitioga e le i ai se uiga, ma le taufaasese tuusa’o ua faailoa atu o se mea moni.
O le a la le mea tatou te faia? I le avea ai ma soo o e taumafai e “laulaututu e fai ma molimau a le Atua i aso uma, ma mea uma, atoa ma nuu uma” (Mosaea 18:9), e tatau ona tatou faia se mea. E le mafai ona tatou tamomoe. Tatou te tau la pe talia ia sauaga?
I tulaga faapea, e mafai ona tatou vaai i le perofeta. I konafesi aoao lata mai, sa ou matauina ai le tele o lauga o loo faamalamalama mai ai le tulaga o le Ekalesia i mataupu tau i faitioga. E le faitio le au failauga, pe latou te fiu ai. E tele ina latou sailia ni tulaga tutusa ma i latou o e tetee ia i tatou. O i latou o ni tamalii e faaaloalogia. Latou te taumafai e malamalama ma ia malamalama.1
Atonu e i ai taimi e na o le pau lava le filifiliga e fai o le tau, sola pe talia ia sauaga. Ae o le tele lava o taimi e i ai sa tatou filifiliga e sili atu ai. E mafai ona tatou aapa atu i le alofa, e pei ona faia e Iesu ma Ana Aposetolo.
Ata na tusia e David Stoker