Ua Aoaoina e le Au Peresitene o le Aoga Sa Matafaioi Taua

Saunia e Lauren Allen

Mekasini a le Ekalesia

O Aso Sa taitasi i le Uarota 30 a Highland Iuta, e feagai ai le au peresitene o le Aoga Sa o Richard Christiansen ma ona fesoasoani ma se faagasologa ua masani ai i le toeitiiti o iunite uma o le Ekalesia. Latou te faamautinoa o loo i ai se faiaoga o vasega taitasi ma fesoasoani i tamaiti ia savavali atu mai i le ala savali i o latou potuaoga.

Ae peitai, na maua e Brother Christiansen se faaaliga o ana mataifaioi e le faatapulaaina i le na o le vaaia o tamaiti aoga ma le taina o logo.

O se tasi o matafaioi patino a faalapotopotoga o korama taitasi ma ausilali o le aoao lea o tagata o le Ekalesia i mataupu faavae taua o le talalelei mo lo latou faaolataga. O le matafaioi a le au peresitene o le Aoga Sa, e pei o Brother Christiansen ma ona fesoasoani, o le lagolagosua lea i taitai o ausilali ma perisitua i lenei tiute, e ala i le avea ma se faiaoga faapitoa o faiaoga i totonu o le uarota.

“O le aoao atu o se mea taua muamua lea o loo i ai i le Ekalesia e faamalosia ai tagata o le Ekalesia, fesoasoani ia loloto a latou molimau i le Toefuataiga, ma maua le faaolataga ma le faaeaga,” o le saunoaga lea a Russell T. Osguthorpe, o le peresitene aoao o le Aoga Sa.

I le avea ai ma peresitene o le Aoga Sa i le uarota, o loo i ai se matafaioi a Brother Christiansen e auauna atu o se risosi mo matua, taitai, ma faiaoga e fesoasoani ia faaleleia aoaoga lea e faia i totonu o aiga ma le Ekalesia.

“O le aoao atu o le autu tonu lea, ma i le avea ai o se faiaoga maoae o le a fesoasoani ai i isi ia fiafia i le aoaoina,” na saunoa ai Brother Christiansen.

O se tasi o meafaigaluega e mafai ona faaaoga e le au peresitene o le Aoga Sa o le vasega lea e faaleleia ai faiaoga e mafai ona faia i le taimi o le Aoga Sa. O lenei vasega e aofia ai ni lesona e 12 o loo maua i le tusi lesona O Le Aoao Atu, E Leai Se Isi Valaauga E Sili Ai ma e mafai ona aoaoina e se tasi o le au peresitene o le Aoga Sa i lalo o le taitaiga a le epikopo.

“O lenei vasega e mafai ona fesoasoani i soo se tagata o le Ekalesia e fiafia e faaleleia ona tomai faafaiaoga,” o le saunoaga lea a Brother Osguthorpe, e tusa lava po o le aiga po o le potuaoga. “E fesoasoani lesona i e auai e iloa ai le ala e aoao atu ai i le Agaga, le ala e valaaulia ai le a’oa’o mataalia, ma le filigā, ma le ala e aoao atu ai ina ia gauai mai tagata o le ekalesia e faaaoga mataupu faavae o le talalelei i o latou lava olaga.”

Na ta’ua e Brother Osguthorpe, o le au peresitene o le Aoga Sa e auai e le aunoa i le aufono a le uarota, e pei ona otootoina mai i le Tusi Taulima o Faatonuga, Tusi 2, ina ia latou malamalama i sini a le epikopo mo tagata o le uarota ma mafai ai ona fefautuaai faatasi i auala e fesoasoani e faaleleia ai aoaoga ina ia ausia na sini.

E mafai ona valaaulia e le epikopo po o le peresitene o le paranesi ia le peresitene o le Aoga Sa i le taimi o le fonotaga a le uarota po o le paranesi ina ia tuuina mai se aoaoga i mataupu faavae e faatatau i le aoaoaina atu ma le aoaoina mai o le talalelei. Na fautua mai Brother Osguthorpe e mafai ona ia lipoti atu i le auai a vasega a le autalavou ma tagata matutua o le Aoga Sa ma valaaulia le fesoasoani a isi taitai o le uarota e lagolago atu i e atonu o loo tauivi.

“O le aoaoga sili ona aoga i le Ekalesia e tulai mai lea i totonu o aiga ma e o loo i ai ni matua faatuatua e ola ai i mataupu faavae o le talalelei ma aoao atu na mataupu faavae i a latou fanau. Ua i ai ausilali ina ia lagolagoina le aiga i nei tiute sili ona paia. O le au peresitene o le Aoga Sa o se punaoa lea i le uarota e fesoasoani i matua ma faiaoga e faataunuu a latou matafaioi,” na saunoa mai ai Brother Osguthorpe.

O le tulaga manuia o aoaoga o le talalelei i le vaega a matua ma taitai o le Eklesia o le a mafai ona faamalosia ai molimau a tagata o le ekalesia ma fesoasoani ia i latou e o mai ia Keriso, o lana tala lea.

“Pau lava le mafuaaga tatau e fua a’i le aoga o aoaoga o le talalelei [i se uarota] o le matauina lea o le faatuatua o tagata o le ekalesia. Afai e toatele ni alii talavou e auauna atu i ni misiona, afai e toatele le autalavou o loo [tuputupu ae ma] faaipoipo i le malumalu, afai e toatele matua o faitauina ia tusitusiga paia, faia afiafi faaleaiga, ma o i le malumalu e le aunoa, ua faaleleia le tulaga faafaiaoga.”

Suiga o le Faaleleia o Faiaoga na Faamatalaina

I se tusi na tusia i le aso 17 o Novema, 2006, na fofogaina mai ai e le Au Peresitene Sili se suiga i auala e tatau ona taulimaina ai le faaleleia o faiaoga. O loo tulai mai pea le fenumiai. O mea nei o loo faailoa mai ai mea ua le o toe faaauauina e le tulafono ma mea e faaauauina pea.

Lē o toe faaauauina:	Faaauauina:
Ua le o toe faaauauina ia tofiga o le taitai faamaopoopo mo le faaleleia o faiaoga i le siteki ma le uarota.	O tiutetauave o le taitai faamaopoopo mo le faaleleia o faiaoga ua tuuina atu nei i le peresitene o le Aoga Sa o le uarota po o le paranesi.
O fonotaga faalekuata mo le faaleleia o faiaoga ua lē o toe faaauauina.	O le vasega mo le faaleleia o faiaoga i le O Le Aoao Atu, E Leai Se Isi Valaauga E Sili Ai e mafai lava ona aoaoina pe a manaomia.

Punaoa mo le Faaleleia o Aoaoga

E ala i le faaaogaina o tusitusiga paia, o le tusi lesona O Le Aoao Atu, E Leai Se Isi Valaauga E Sili Ai (aitema nu. 36123), ma le “Aoaoina Atu o le Talalelei ma le Taitaiga” i le vaega o le Tusitaulima o Faatonuga a le Ekalesia, Tusi 2, o le a mafai ai e tagata o le ekalesia ona faaleleia a latou aoaoga ma faataunuu ai le valaau atu a Peresitene Gordon B. Hinckley (1910–2008) ina ia aoao atu le talalelei a Iesu Keriso “ia sili atu nai lo soo se isi lava taimi ua mavae atu” (“E I Ai Sa Tatou Galuega e Fai,” Liahona, 1 Iulai, 1995, 98).

“E tatau ona tatou faamalolosia i tatou lava ma o tatou tagata ina ia mafai ai e a tatou faiaoga ona latou talanoa mai i o latou loto nai lo le talanoa mai i tusi, ia fesootai lo latou alofa mo le Alii ma a latou galuega pele, ma atonu o le a ootia ai e pei o se afi i loto o e o loo latou aoaoina atu,” o le saunoaga lea a Peresitene Hinckley (Teachings of Gordon B. Hinckley [1977], 619–20).

O le faamoemoega o le vasega o le Aoaoina Atu o le Talalelei o loo maua i le O Le Aoao Atu, E Leai Se Isi Valaauga E Sili Ai ia fesoasoani i tagata o le Ekalesia e atiina ae o latou tomai faafaiaoga ma iloa ai le taua o le faaleleia o aoaoga o le talalelei. E aofia i le vasega ia autu e pei o le aoao atu e ala i le Agaga, valaaulia ma le filiga le aoaoina, ma le faaaogaina o metotia aoga mo le aoao atu.

O loo maua le tusi lesona O Le Aoao Atu, E Leai Se Isi Valaauga E Sili Ai i le silia ma le 30 gagana. Faafesootai faletusi autu i le lotoifale mo le mauaina.