Manatu mo Afiafi Faaleaiga

O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O ni nai faataitaiga nei.

“Faamanuiaina e ala i Lo’u Valaauga,” i. 11: A o e aoaoina atu le lesona, ia mafaufau e talanoaina le ala na faamāmā ai e le Alii le avega a le tusitala ao ia auauna atu ma lona loto atoa. Valaaulia tagata o le aiga e faasoa mai le ala na faamanuiaina ai i latou a o latou auauna atu i le Alii.

“O a Mea na Aumai e Paionia?”, i. 16: Mafaufau e lisiina ia vaega e fa o le atamai lea na tuuina mai e Peresitene Stephen L Richards i lenei tusiga. Talanoa i auala na mafai ai e nei mea taitasi ona faamalosia lou aiga ma faamanuiaina ai olaga o i latou o e mulimuli i ou tulagavae.

“Faasoaina Atu Ma Le Mautinoa o le Talalelei,” i. 30: Mafaufau e valaaulia lou aiga e talanoaina le ala e faaaoga ai faaupuga nei mai le tusiga: “Famolemole ia manatua e le manaomia ona outou faapea e tatau ona outou tuuina atu ni faamaoniga o o outou talitonuga; tau lava ina faamatala i le agaga o le alofa ma le agalelei. E masani lava ona malo le upu moni pe a aoao atu aoaoga faavae tonu.”

“Na Ia Ta’u Mai ia te Au, ‘E le Taitai,’” i. 58: A uma ona faitauina ma otootoina mai le tala, mafaufau e faatino se tala i auala e tali atu ai pe a feagai ma faaosoosoga. E mafai ona faataitai leotele e tagata o le aiga ia upu “E le taitai,” e pei ona faia e Chase.

Ae faapefea le Afiafi Faaleaiga?

“Ae faapefea le afiafi faaleaiga? E le faia nanei?” o le fesili lea a la’u tama teine e ono tausaga, o Leilani. Na ufitia au i se lagona tausalaina. Sa ma taumafai ma lo’u toalua e faia a matou afiafi faaleaiga, ae o le tele o mea sa faaaluina ai o ma’ua taimi, ua ma o ese mai ai i lea tulaga sa masani ai. O le toe faamanatu mai la a Leilani na matou toe tuuto ai ia aua lava nei toe faagaloina a matou afiafi faaleaiga mo soo se mafuaaga lava.

Ina ua tau matutua ae teisi Leilani ma lona uso, o Nadia, sa la mananao e aoao mai i la matou afiafi faaleaiga mea sa la aoaoina i le Peraimeri. Na oo lava ina la tusia a la ata vaaia e ta’u mai ai le mataupu faavae sa la mananao e aoao. Sa ma fiafia i le avea ai o ni matua i le vaai atu ia i la’ua o talanoa e uiga i le talalelei ma e tele ina mafai ona la faalauteleina mai le mataupu sa la filifilia.

“Ae faapefea le afiafi faaleaiga? E le faia nanei?” o upu ia o loo ou taumafai malosi ia aua nei ou faalogo o toe fai mai. Ou te iloa o le taimi o laiti tamaiti o le taimi sili lea e aoao ai i latou. Atonu e mafai ona faatino e le lalolagi ana faatosinaga, ae afai tatou galulue ma tuputupu ae faatasi ma a tatou fanau, o le a mafai ona tatou ausia a tatou sini o le tausia o alii ma tamaitai o le mataupu faavae.

Patricia Cárdenas de Prado, o Kuatemala