Taitai Au, Faasino Au

Saunia e Anne-Mette Howland

“E mafai ona galo ia te i latou, a e le galo lava oe ia te au” (1 Nifae 21:15).

Ina ua 10 ou tausaga, sa sii mai lo matou aiga mai Tenimaka i Kanata. E lei umi se taimi na matou nonofo ai iina ae valaaulia i maua ma lo’u tuagane o Poul, e 12 tausaga e ni uso tamaitai e toalua e nonofo i le isi itu auala o lo matou fale fou, e matou te tietie i le pasi e matamata i le aai.

Sa ma fiafia lava ma Poul e o. Sa le mautonu lo’u tina e uiga i lea manatu, ae na ia taliaina lava. Na tuu e tina le tupe i nei tamaitai e toalua mo la matou tietiega pasi. Sa ia talosagaina i laua e vaai lelei i maua ona ma te le iloa fenanui ma lo’u tuagane. Sa folafola atu e nei tamaitai o le a laua vaaia lelei i maua.

Sa matou o uma i luga o le pasi ma amata ai le matou tietiega. E lei umi ae tu le pasi, ma sa genogeno mai nei tamaitai e ma te o i fafo. Sa ma mulimuli ia i laua ao amata le matou savaliga faataamilo i le aai.

Na faafuasei ona amata taufetuli nei tamaitai i magaala eseese! Sa ma taumafai e mulimuli ia i laua, ae sa nimo atu i la’ua i pioga ma te le masani ai. I le taimi muamua sa ma faapea o la sa taumafai e taufaasese i maua ma o le a vave ona toe foi mai. Ae ina ua mavae sina taimi sa ma iloa ai ua ma sē ma ua na o i ma’ua.

“E tatau ona ta fesili atu i se tasi mo se taiala?” Na ou fesili ai ia Poul.

“Ta te le iloa fenanui, ma e ta te le iloa foi lo tatou tuatusi,” o lana tali lea.

“Ta vili ia Tina,” na ou fautua atu, ao tusi lo’u lima i se fale telefoni lata ane.

“E leai se ta tupe, ma e ta te le iloa foi le numera o la tatou telefoni,” o le tala lea a Poul.

Sa amata ona ou tagi. Sa tuu mai e Poul lona lima i o’u tua. “Aua e te popole, Anne-Mette. Fai se ta tatalo.”

Sa ma punonou faatasi ma ole atu i le Tama Faalelagi e fesoasoani mai ia i maua ia iloa le ala e toe foi ai i le fale.

Ina ua maea le tatalo sa tusi le lima o Poul i se magaala. “Ou te lagona o le ala lea e tatau ona ta o ai,” o lana tala lea.

Sa amata ona ou toe tagi. E faapefea ona ia iloa le ala ma te o ai?

Sa toe faamafanafana a’u e Poul. “E tatau ona e faatuatua o le a taitaiina i taua,” o lana tala lea.

Ina ua ia fai mai faapena, sa ufitia au e se lagona toafilemu. Sa ou manatu e manaomia le i ai o lo’u faatuatua ma tuu i lo’u tuagane e taitaia au.

Ina ua mae’a se taimi umi o ma savavali, sa ma tau atu i se vailepa. “E te manatua le vailepa lenei?” O le fesili lea a Poul. “Na tatou pasia a o tatou agai mai le malaevaalele i lo tatou fale fou!”

O le fiafia o lona leo sa lelei ai la’u faalogoga. Sa ma nofonofo i autafa o le vailepa ma fai le isi a ma tatalo.

Na faafuasei lava ona vaai mamao atu Poul. “O e vaai atu i le mea le la?” na ia alaga ai. Sa tu o ia i luga ma amata ona tamoe, ma sa ou oso i luga ma mulimuli atu i a te ia.

“O le a le mea na e te vaai i ai?” o la’u valaau lea.

“O le faailoga o le Faletamea e latalata i lo tatou fale!”

Sa ma mulimuli i le faailoga e tau i lo matou auala, ma e lei umi ae ma iloa atu lo ma tina o tutu i fafo o le fale. Sa ma tamomoe atu ma fusi o ia.

Ina ua matou o i totonu, sa fai mai Tina, “Ina ua ou vaai ua o mai nei tamaitai i le fale, sa ou alu i ai e fesili po o fea oulua. Sa le lelei lo la tina. Sa fai mai o ia o tatou o tagata ese ma e tatau ona tatou toe foi i le mea sa tatou o mai ai.”

Sa opoina uma i ma’ua e tina i ona lima. “Ou te manao ia oulua iloa e le o tagata uma e i ai iinei e lagona faapena. O le a tatou feiloai i le tele o tagata o e o le a faafeiloaia ma faauo ia i tatou. Sa tuulafoaia oulua e na tamaitai i le aso, ae ua ou fiafia na oulua manatua e le tuulafoaiina lava oulua e le Tama Faalelagi.”

Ona matou tootutuli lea ma faafetai i le Tama Faalelagi mo le taitaiina saogalemu o i maua i le fale.