Tatou te Talanoa ia Keriso
E Mafai Ona Ia Faamaloloina Soo Se Manu’a
Sa ou filifili e talia i lo’u loto le fautuaga na tuuina mai ia te au ma saili po o le a tonu lava le uiga o le tuuina o lo’u faatuatua i le Faaola.
Na tupu i le aso 6 o Tesema, 1991—le atoaga o le valu tausaga o la ma’ua faaipoipoga. O le aso lena na oti ai le ma tama tama muamua ona o faiga a le tausi tama. Sa na o le lua ma le afa masina lona matua.
O masina ma tausaga na sosoo ai na pogisa i le faanoanoa, ita, lē fiafia, ma le leai o se faamoemoe. O le pogisa faalemafaufau na oo mai ia te au e le mafaamatalaina. Na le mafai e se tala po o se mea na faia e se tasi ona tuumamaina le tiga.
Sa ou faitauina le tele o tusi ma tusitusiga paia, ae lei i ai se mea o na mea na mafai ona faamalieina lo’u tagi atu mo ni tali.
Sa ou maua se avanoa tulaga ese e talanoa ai ma Elder James E. Faust (1920–2007), ao avea i lena taimi ma se tasi o le Korama a Aposetolo e Toasefululua, ona o sa latou faigauo ma o’u matua. (Sa ia feiloai i lo’u tina, o Filavia, ma lona aiga ao auauna atu i le misiona i Pasila.) Sa ou mautinoa o le a mafai e Elder Faust ona faamafanafanaina au.
Sa ou fesiligia le tele o ni fesili ao ia faalogologo ma le onosai. Sa ioeina e Elder Faust le mea lea na tupu ia te au ma sa mautinoa lava le tiga ma le matua faigata tele. Na ia faasoa mai ni nai mau ma talanoa e uiga i le manaomia ona ou galue i lo’u lototiga ma saili le usiusitai atoa i le finagalo o le Alii ina ia mafai ai ona toe faatasia ma la’u tama. Sa ia saunoa mai, “Sylvia, o le mea lenei e faatatau ia te oe i le taimi lenei. Ou te matauina o loo e popole i lau tama, ao le mea moni, e tatau ona e popole mo oe lava ia ma pe faapefea ona toe fausia lou olaga. O le a lē faigofie, ae e mafai ona toe fonoina lou loto e ala i le Togiola a Iesu Keriso.”
Ona ia tuuina mai lea o se faamanuiaga ia te au ina ia mafai ona ou malamalama i le taua o le matafaioi a Iesu Keriso o loo faia i lo tatou lalolagi ma faatagaina o Ia e avea ma puna o malosiaga ou te manaomia.
Sa ou tuua le ma feiloaiga a o tumau pea le loto vaivai; sa foliga mai o ana fautuaga sa faigofie lava ae sa faigata ona faatino. Sa lagona foi e lo’u tina le leai o se faamoemoe ona sa leai se mea na ia fai mai ia te au sa foliga na fesoasoani. Ou te manatua lona fai mai, “Faamolemole ia i ai le faatuatua ma le faamoemoe i lo tatou Faaola, ma faataga se taimi e faamaloloina ai ou manu’a.”
I la’u malaga patino i le toe mauaina o le fiafia, sa ou filifili ai e talia i lo’u loto le fautuaga na tuuina mai ia te au ma saili po o le a tonu lava le uiga o le tuuina o lo’u faatuatua i le Faaola. E lei suia loa lava ia mea. Ae peitai mai lea aso i lea aso ma lea tausaga i lea tausaga, faatasi ai ma le fesoasoani a le tatalo ma se molimau tuputupu ae, na ou iloaina ai e aunoa ma le masalosalo e mafai e le Faaola ona faamaloloina o tatou manu’a.
Na ou iloaina e le maua e tagata uma le avanoa e feiloai ai ma se Aposetolo, e pei o au. Ae peitai e mafai e tagata uma—ma e maua—le avanoa e iloa ai le Faaola ma sui lana avega ia te Ia. Ma ioe, o le faatasi mai o Iesu Keriso i o tatou olaga e faamama ai soo se tiga.
Ou te iloa o le i ai o le Alii i o tatou olaga e mafai ona aumaia le olioli i o tatou tulaga faaletagata. O Ia o la tatou uo, lo tatou faiaoga, ma o se faataitaiga o le onosai seia oo i le iuga. Na Ia onosai moni lava i mea uma, ma Na te silafia mea o loo tatou mafatia ai (tagai Alema 7:11–12). O Lana Togiola ua oo mai ai le vavega o le toe tuufaatasia o vaega ua gaui i lenei olaga e saunia ai mo le isi olaga.
O le a ou faafetaia pea upu a Elder Faust ma lo’u tina. Sa la fesoasoani mai ia te au ia iloa e tusa lava po o a lava o’u mafatiaga, o Iesu Keriso o le puna mautinoa lea e tasi o le lagolagosua ma le faamoemoe o loo ia te au.
Tauagavale: Faamatalaga mai le Keriso ma le FaitulafonoTaulealea Mauoa, na saunia e Heinrich Hofmann, faaaloaloga a le C. Harrison Conroy Co.