Faamanatuina o Paionia

O masina taitasi o Iulai, e faamamaluina ai e le toatele o tagata o le Ekalesia i le lalolagi atoa ia paionia o e na ulufale atu i le Vanu o Sate Leki i le aso 24 o Iulai, 1847. O se tasi lenei o aafiaga sa faasoa mai e se tamaitai talavou ia i matou:

“O nisi taimi e fai ai gaoioiga faapaionia a le matou uarota,” o le tala lea a Analee B. o Burke, Virginia, ISA. “E laei tagata i laei faapaionia, ma e masani lava ona matou o i se ituaiga o ‘savaliga umi’—o se savaliga moni lava. Matou te talanoa foi e uiga i paionia, ma e matou te taaalo i taaloga sa taaalo ai paionia. I Virginia e vevela ma e susu i le taumafanafana, ma e masani lava ona faia nei faafiafiaga i fafo, o lea la ona o le tau vevela matou te lagona ai lava le pei o paionia.

“Mo au lava ia e tele lava ina ou faitauina pea i taimi uma se tusi e uiga i le talafaasolopito o le Ekalesia. O le faitauina o na tusi ou te lagona atili ai le agaga faafetai mo paionia ma fesoasoani ia ou malamalama atili ai i le tulaga sa latou oo i ai.”

E faapefea, i lo outou eria, ona outou faamanatuina paionia ua tuanai po o le taimi nei i le Ekalesia? Manatua, o paionia e aofia ai soo se tasi lava o le sa saunia le ala mo isi e mulimuli ai.

O Le Mau e Sili Ona Ou Fiafia i Ai

2 Nifae 32:5 sa avea ma se mau sa ou fiafia i ai ao ou i ai i le Peraimeri aua e ta’u mai ai le mea e fai pe a e maua le meaalofa o le Agaga Paia. E tatau ona e mauaina ma agavaa mo ia, ma o le a taitaia oe e le Agaga Paia i le ala sao.

Peaches C.,16 tausaga, Trinidad, Initia i Sisifo

E Faapefea ona Maua se Molimau

O le molimau o se vaega taua i o tatou olaga i le avea ai ma tagata o le Ekalesia. Ina ia maua se molimau, fai le mea o loo valaaulia tatou e Moronae e fai: manatunatu loloto i lou agaga i le savali po o mataupu faavae e te manao e iloa pe moni; ona ole atu lea i le Atua i le suafa o Iesu Keriso pe moni ea. O i latou e faia lea mea ma ole atu i le faatuatua o le a maua se molimau i le moni e ala lea i le mana o le Agaga Paia (tagai i le Moronae 10:3–5). Ou te molimau atu afai e te ole atu ma le faatuatua uma o lou loto, o le a tali mai lo tatou Tama Faalelagi i au tatalo.

A o avea au ma se tagata sailiili, sa ou filifili e tatalo ma fesili atu i le Tama Faalelagi pe moni mea uma sa ou aoaoina. Ou te lei mauaina i lo’u olaga atoa upu e faamatalaina ai le lagona sa ia te au, ae sa ou iloa o le tali lea mai lo’u Tama Faalelagi aua sa ou maua mai ai le tele o faamanuiaga.

Jordi R., 20 tausaga, Santo Domingo, Dominican Republic

“Ioe, o mea uma e maua mai le eleele, i lona lava tau, ua faia mo le lelei ma le aoga i tagata, ina ia fiafia ai mata ma faaolioli ai le loto” (MFF 59:18).

Taumatau: ata pue o paionia na toe faaleleia e Welden C. Andersen; ata o le natura na saunia e Deanna Van Kampen