I Tala Fou

Na Saunoa Elder Oaks i Tamaiti Aoga Faaloia a Harvard

Na saunoa talu ai nei Elder Dallin H. Oaks o le Korama a Aposetolo e Toasefululua i tamaiti aoga o le Aoga Faaloia a Harvard i le taimi ao faia le latou Vasega o le 101 Tala FaaMamona i lona lima tausaga.

O tausaga taitasi e valaaulia ai e le Faalapotopotoga a Tamaiti Aoga o le Au Paia o Aso e Gata Ai i le aoga Faaloia a Harvard se tagata o le Ekalesia e saunoa e uiga i talitonuga faavae FaaMamona ma tali ni fesili a tamaiti aoga.

O Elder Oaks na faamatalaina le talitonuga o le AAG i le Tama Faalelagi, Iesu Keriso, ma le Agaga Paia o ni tagata mavaevae se toatolu, e eseese o latou suafa ae tasi i le faamoemoega. Sa ia faamatalaina foi le faamoemoega o le olaga e ala lea i se otootoga o le ata o le faaolataga.

Sa ia tuuina atu lana molimau ia Iesu Keriso ma le mana o le Togiola, i le faapea atu, “Ia te au lava ia, o le vavega o le Togiola a Iesu Keriso e le mafaamatalaina, ae o le Agaga Paia na ia tuuina mai ia te au se molimau o lona moni a’ia’i, ma e ou te olioli i le mafai lea ona faaaluina lo’u olaga atoa i le folafolaina atu.”

Sa ia faaauau i le faamatalaina o le faalagolago o le Ekalesia i punavai o le upumoni, e aofia ai faaaliga i ona po nei ma tusitusiga paia.

“E le o faavaeina i tatou i le atamai faalelalolagi po o filosofia a tagata—e tusa lava po o a tu ma aga po o lo latou faaaloalogia,” o lana saunoaga lea. “O la tatou molimau ia Iesu Keriso e faaautu i faaaliga a le Atua i Ana perofeta ma mo i tatou taitoatasi.”

O Taumafaiga Tuufaatasi a Katinale Lauds e Puipuia le Saolotoga Faalelotu

I se saunoaga muamua na tuuina atu e se katinale i le Iunivesite a Polika Iaga, na saunoa ai le Afioga Katinale Faranisisi Siaosi e tatau i tagata Katoliko ma le Au Paia o Aso e Gata Ai ona tutu faatasi e puipuia le saolotoga faalelotu i totonu o le Iunaite Setete.

“Pe a toilalo le malo i le puipuiga o le loto fuatiaifo a ona tagatanuu, ona pa’ū lea o lea matafaioi i vaega faalelotu, aemaise i e na faatulagaina e le talalelei a Iesu Keriso, ina ia avea ma e puipuia le saolotoga faaletagata,” na saunoa ai o ia.

Na saunoa ia Katinale Siaosi, o le Aki Epikopō i Chicago ma o le Peresitene o le Mafutaga a Epikopō a le Katoliko i le Iunaite Setete, i se vaega e 12,000 o tamaiti aoga ma tagata faigaluega a le Au Paia o Aso e Gata Ai i le Ofisa Autu o Marriott i Provo, Iuta, ISA.

Na ia faaalia lona agaga faafetai ona “ua mafai e Tagata Katoliko ma le Au Paia o Aso e Gata Ai ona fevaaiai le tasi i le isi o ni paaga faatuatuaina i le puipuia o mataupu faavae moni tutusa.”

E tutu faatasi ekalesia uma e lua i mataupu e pei o le faapau pepe, ponokalafi, ma le faaipoipoga i le itupa e tasi, o lana faailoa mai lea.

“O le saolotoga faalelotu e le mafai ona tuuitiitia i le saolotoga e tapuai ai e oo lava i le saolotoga o le loto fuatiaifo faalilolilo,” o lana saunoaga lea. “O le saolotoga faalelotu o lona uiga o le i ai lea o le aia tatau i vaega faalelotu e oo lava i tagata lotu taitoatasi e faatino ai a latou faatosinaga i nofoaga lautele.”