Mauaina o se Aiga i le Talalelei
Ao ou tuputupu ae i Perth, Ausetalia, o le lotu e le o se mea sa ou tausisi i ai. Sa faamanuiaina au o se Metotisi, auai i aoga a lotu, ma mai lea taimi i lea taimi ma te o ai ma lo’u tina matua i se lotu Papatiso. E ui lava i le le mautonu faaleagaga, ae sa avea lava le tatalo ma se mea masani ia te au-faafetai ai i lou tina matua, o le na faasoaina mai lona faatuatua ma aoao au e faitau i le Tusi Paia. Ou te faafetai mo lana faatosinaga faifaipea i lou olaga aua, e ui i au sailiiliga faalelalolagi, ae na amata lava ona ou fausia se talitonuga ia Iesu Keriso. A ou toe tepa i tua, ou te matauina na saunia lo’u loto e le Tama Faalelagi e talia le talalelei toefuataiina.
O se tasi aafiaga sauniuni na tupu ina ua ou aafia i se faalavelave tau taavale ao ou asiasi atu i Farani. I ni nai minute talu ona uunaia malosi au e faamau lo’u fusipau, na sesee ai le taavale ma tifato i lalo o se puipui e 20-futu (6-m). Ona o le leo o le lapataiga ma ina ua toe mafai ona faaaoga ou vae ma ogavae ao nisi na i ai manu’a faapena e tele lava ina pipili tumau ai, ua amata nei ona ou malamalama o se mana paia e matua sili atu i lo a’u na tautai.
I le lua tausaga mulimuli ane, ina ua ou toe i Farani o se tamaitiiti aoga o faafesuiaiga, na valaaulia ai au ma le lototoa e Kayla Barth, o se tamaitai aoga mai Kalefonia, ma te o i le lotu. O le fiafia le faatuaoia o Kayla mo le talalelei na mataina ia te au. Sa ou taofimau i upu uma taitasi ao ia faasoa mai le ata o le faaolataga. Sa masani la’u faalogo i na mea uma, e pei sa ou faalogo i ai muamua.
Ina ua ou savali atu i totonu o le falelotu a Angoulême mo le taimi muamua, sa pei ua faapulupulu au i se palanikeke mafanafana. Ua ou sau i le “aiga.” I lena lava aso, i le vasega o Aoaoga o le Talalelei mo tagata fou, sa faasoa mai ai e le faifeautalai na faiaoga se molimau malosi lava i le Uluai Faaaliga. Ao ia faamatalaina le auala e molimau mai ai le Agaga Paia ia i tatou, na sosolo mai le mafanafana mai lo’u loto ma faatumulia ai lo’u tino atoa. O lenei molimau malosi na tuua se lagona e le matineia ia te au, lea na tauaveina au i faigata ma tofotofoina ai lo’u faatuatua.
Pe a ma le masina talu la’u laa muamua i le falelotu o Angouleme, sa ou filifili loa ou te papatiso. Sa 18 ou tausaga ma na le manaomia se faatagaga mai matua. Ae peitai ina ua ou valaau atu i lo’u aiga i Ausetalia ma le tala fiafia, sa ou tei ma faanoanoa i le iloaina e le lelei o latou lagona i le Ekalesia ma na tetee i lo’u naunau e fia papatiso.
Sa mamafatu lenei mea i lo’u loto. Pe tatau ea ona fai lo’u loto e ui ina tetee lo’u aiga, o e ou te alofa tele i ai? Pe tatau ea ona tolo lo’u papatisoga seia ou toe foi i Ausetalia, lea o le a ou feagai ai ma le tele atu o le tetee?
O le Mataio 19:29 na fesoasoani ia te au i la’u filifiliga: “Ai se tasi ua ia tuua o fale, po o uso, po o tuafafine, po o le tama, po o le tina, po o le ava, po o le fanau, po o le fanua ona o lo’u igoa, e maua e ia e taisautuaselau, e fai foi mona tofi le ola faavavau.” Pe na ou naunau ea e faamuamua le Faaola—e muamua i lo’u lava aiga? O le tali o le ioe, ma i le aso 16 o Tesema, 1989, sa papatisoina ai au ma faamauina o se tagata o Le Ekalesia a Iesu Keriso o le Au Paia o Aso e Gata Ai. O le taimi uma na totoe ou te i ai i Farani sa faatumuina i se fiafia filemu ou te lei iloaina lava muamua.
Ina ua ou foi atu i Perth, sa faafeiloaia au e lo’u aiga ma lima mafola. Ae o au taumafaiga e faasoa atu le talalelei ia i latou sa faafetauia e se tetee malosi. Na oo ina latou faia ni fuafuaga mo au e vaai tagata failotu “popoto” o e atonu e mafai ona “faamalamalamaina” au ma fesoasoani ia te au e iloa le “sese” o la’u auala filifilia. O se tofotofoga tele lenei o lo’u faatuatua, ma ina ua mae’a le osofaiga o aoaoga sese faasaga i Mamona, sa ou fesiligia la’u faaiuga.
Ae ui i lea i totonu o potu filemu o lo’u loto, e le mafai ona ou teena le aafiaga na ou oo i ai i Farani na mai le Atua, ma na ou saili i le Agaga o le Alii ia faamalosia au. Sa ou anapogi ma tatalo i Aso Sa taitasi mo ni vaiaso, sa ou suesue punouai i tusitusiga paia, na ou mauaina faamanuiaga faaleperisitua mo le taitaiga ma le malosiaga, ma na ou auai i le lotu i vaiaso uma e mafuta ai ma le Au Paia. Nai lo le nofo ai pea i mea sa le mafai ona ou malamalama ai po o mea sa ou le iloaina, na ou taulai atu ai i mea na ou iloa: O au o se afafine o le Atua, o Iesu o le Keriso, na toefuatai e Iosefa Samita le Ekalesia a le Alii, o le Tusi a Mamona ma le Tusi Paia o afioga a le Atua, ma e faavavau aiga. Faatasi ai ma lenei malamalamaaga fou, na amata ona tupu la’u molimau ma toe faamalosia.
O le luitau mulimuli e tatau ona ou foia i lena tausaga o le mataupu tau faaipoipoga i totonu o le malumalu e aunoa ma le i ai o lo’u aiga. O se alii talavou na ma feiloai i Farani ma na ma fetusiai na sau mai Kalefonia e asi a’u mo le tolu vaiaso. Sa manino ia i ma’ua uma ua ma fia faaipoipo, ae ua ou feagai ma se isi faaiuga faigata: pe ou te faaipoipo ea i le malumalu ina ia faamauina mo le taimi nei ma le faavavau atoa, pe ou te faaipoipo i se isi nofoaga ina ia auai lo’u aiga i le sauniga?
Sa ou mulimuli i le fautuaga a lo’u peresitene o le siteki ma faaipoipo ai i le malumalu ia Fepuari 1991. O le taimi lena, na matua ootia lo’u aiga i le tiga, ae na latou iloaina o le Ekalesia o se faamanuiaga i lo’u olaga. Ao latou vaavaai i le ma fanau o ola ae i le talalelei, na latou faaalia le faafetai mo mea o loo ma aoaoina ai i latou ma ituaiga o tagata ua avea ai i latou. Talu ai nei lava na faaalia ai e se tasi o la’u fanau lona agaga faafetai mo la’u filifiliga na faia i le taliaina o le talalelei ma tausia se aiga i le Alii. O lona agaga faamaoni na uunaia ai au i loimata ona ua ou iloaina o filifiliga e ola ai i le talalelei e le gata na faamanuia ai lo’u olaga ae na faapena foi ma lona olaga.
E faavavau lo’u faafetai i le Tama Faalelagi mo le tuuina mai ia te au o le avanoa e talia ai le talalelei ma le tuuina o tagata i lo’u ala o e ua faamanuiaina ai lo’u olaga e faavavau. Ou te fiafia i le talalelei a Iesu Keriso ma lo’u loto atoa. E moni le Ekalesia, ma e ou te matuai faafetai i lo’u avea ai ma sona vaega.
Ata na tusia e Jeff Ward
Ina ua ou savali i totonu o le falelotu a Angouleme mo le taimi muamua, sa pei ua faapulupulu au i se palanikeke mafanafana. Ua ou sau i lou “aiga.”