Autalavou
Alii Fou
Sa faigata ia te au ona maua se lagona lelei faapea e fetaui mo a’u. Faatoa sii mai le matou aiga mai le isi itu o le atunuu. O le uarota sa matou sii mai i ai e toatele le vaega o le autalavou, ao le taimi muamua lenei o le a avea ai au ma se “alii fou.” O le vaega sili ona leaga o le tatau lea ona ou alu i se aoga fou, ma na vave oo mai se manatu i lo’u mafaufau, “O ai o le a ma nonofo faatasi i le malologa?” Atonu o le a ou vaai i se tasi mai le ekalesia, peitai ou te le fia faalavelave i se laulau ’ai a se isi, ae maise lava ou te le iloa pe latou te mananao ia te au iina!
O le aso muamua i le aoga na foliga mai ua matua umi tele. Na iu a ina ta le logo o le malologa. Ao faatuai ona ou ulu atu i le potuai, sa ou tatalo i le Tama Faalelagi e fesoasoani mai ia ou maua se tasi ou te iloaina. Sa ou tilotilo solo e vaai pe ou te iloaina se tasi. E leai se tasi. O lea na ou agai atu ai i se laulau i le pito i tua o le potuai ma ‘ai ai la’u meaai.
I se taimi mulimuli ane i le vasega o le numera, na ou matauina ai se foliga masani. Na ou vaai ia Tavita i le seminare i lena taeao. Sa fai mai e fia vaai i le faasologa o a’u taimi ma sa iloa ai e tutusa taimi o ma periota ‘ai. “Sole, o fea na e i ai i le taimi o le malologa ananei?” o lana tala lea.
“Sa ou ‘ai i le isi itu i tua o le potu,” sa ou tali atu ai.
“Ia, sau la taeao ta te nonofo faatasi i le malologa,” o lana tala lea.
Ou te faafetai i se Tama Faalelagi alofa, e silafia o tatou manaoga taitoatasi ma tali mai ia tatou tatalo taitoatasi. Ou te faafetai foi mo se tasi sa naunau e faamafola mai se lima o le faauo. O se mea e faigofie e pei o se valaaulia e mafai ona faia se eseesega tele.