Ua Tuuina Mai ia i Tatou e le Alii se Tulafono o le Soifua Maloloina

O se tasi o faamanuiaga silisili ua tatou maua ina ua tatou o mai i le lalolagi, o le mauaina lea o se tino faaletino. E paia o tatou tino ma ua matua taua lava ua ta’ua ai e le Alii o ni malumalu o le Atua (tagai i le 1 Korinito 3:16). Ua ia ta’ua mai foi ia i tatou e leai Sana poloaiga e faaletino ae o Ana “poloaiga [uma] ua faaleagaga” (MF&F 29:35). O lea la, o Ana poloaiga e faatatau i lo tatou soifua maloloina faaletino e mo lo tatou foi manuia faaleagaga (tagai i le MF&F 89:19–21).

Ona e finagalo lo tatou Tama Faalelagi ia tatou tausia lelei o tatou tino, ua Ia faaalia mai ai ni faamatalaga taua i le auala e faia ai. O le tele o ia faamatalaga o loo maua i le Mataupu Faavae ma Feagaiga e 89 ma ua ta’ua o le Upu o le Poto.

O iina tatou te aoao ai i le tele o mea e tatau ma e le tatau foi ona tatou faia e tausi ai ia maloloina o tatou tino. O le agaga o lenei tulafono o le tausami lea i meaai tatau ma aloese mai i soo se mea e avea ma mausa pe faaleagaina ai o tatou tino. O isi mea ua poloaiina i tatou e le Alii e aua nei o tatou tuuina i totonu o o tatou tino o alakaholo ma sikaleti, lea e avea ma vailaau oona (tagai i le MF&F 89:5–8). E le tatau ona tatou faaaogaina vailaau oona, sei vagana ua tatau ai e avea ma vailaau mo gasegase. O i latou o e faaaoga sese ia vailaau ua faatagaina pe e le’i faatagaina foi e manaomia ona sailia se fesoasoani ina ia mafai ona toe mama ma saoloto o latou tino mai mea ua fai ma vaisu. O se tino mama e sili atu ona taliagofie i le Agaga Paia.

Ua lapatai mai le Alii ia i tatou e faatatau i le faaaogaina o “mea inu vevela” (MF&F 89:9). Ua faamalamalama mai e perofeta o lenei mea e faatatau i le kofe ma le lauti, lea e i ai ni vailaau oona. E tatau ona tatou aloese mai nei meainu uma, e tusa lava pe vevela pe malulu, o loo i ai i totonu mea faataumaoia.

E tatau foi ona tatou aloese mai soo se mea e faaleagaina ai o tatou tino, e pei o le soona taumafa po o le le lava o le taumafa i meaai tatau e faatumauina ai lo tatou ola maloloina.

E le gata i lea e le tatau ona tatou faia, o loo tau mai ia i tatou e le Upu o le Poto mea e tatau ona tatou faia. O le tele o na mea o loo faailoa mai iinei.

O i latou o e usitai i le tulafono a le Alii mo le soifua maloloina “o le a latou maua le maloloina i o latou pute ma le su i o latou ivi; ma o le a latou maua le poto ma oa silisili o le malamalama, o oa natia lava; ma o le a taufetuli ae le vaivai, ma o le a savavali ae le matapogia” (MF&F 89:18–20).

Ua faaalia mai e le Alii i le Upu o le Poto ma isi mau, ia ni taiala mo le soifua maloloina:

O fualaau aina, fualaau faisua, ma laau-afu lelei e tatau ona faaaogaina “i lona lava tau” ma “le faautauta ma le faafetai” (tagai i le MF&F 89:10–11).
O aano o manu ma manufelelei ua “faauuina mo le faaaogaina e le tagata ma le faafetai; e ui i lea, ia itiiti ona faaaoga o ia mea” (MF&F 89:12).
“O kuranuma uma ua lelei mo meaai a le tagata” (MF&F 89:16).
E le tatau ona “galue sili atu nai lo le malosi ua ia te i [tatou]” (MF&F 10:4).
E tatau ona tatou atiina ae ni o tatou uiga masani lelei e faatatau i le moe ina ia “olaola o [tatou] tino ma o [tatou] mafaufau” (MF&F 88:124).