Nai Otootoga o le Lalolagi
Ua Faafofoga le Au Paia i le Konafesi i le gagana Siaosiana mo le Taimi Muamua
O le aso 9 o Oketopa, 2011, sa faapotopoto ai se aofia e 35 o le Au Paia e maimoa i le konafesi aoao—ma faalogologo mo le taimi muamua i la latou lava gagana moni, o le Faasiaosiana. A o le’i oo ia Oketopa, sa i ai se filifiliga a i latou pe tusa ma le 50 o tagata malolosi o le ekalesia i le atunuu o le a faalogologo ai i le konafesi i gagana Rusia, Aremania, po o le Peretania. Ae peitai, o le toatele lava sa na o le Faasiaosiana lava e tautatala ai, o lea la, o le faaliliuga na tuuina atu i lena gagana sa o se mea taua tele.
“Sa matuai ou fiafia lava ina ua mafai ona ou faalogologo i le saunoaga a Peresitene Thomas S. Monson ia i matou i le Faasiaosiana,” o le tala lea a Lela Tsnobiladze. “E i ai se eseesega tele pe a e faalogologo i le konafesi i lau lava gagana.”
Ua Tali Atu le Ekalesia i Faatafunaga a le Afa Fulifao i Filipaina
Ina ua uma Afa o Nesat ma Nalgae i Filipaina i le faaiuga o Setema, lea na toeitiiti atoa le 200,000 o tagata na aafia ai, sa faapea ona muamua tali atu le Matagaluega o le Uelefea a le Ekalesia i le Eria i ni taga araisa e 600, lea na tilivaina atu i Pampanga. O le Social Action Center o Pampanga o le Matagaluega o San Fernando Pampanga, o se faalapotopotoga faapaaga e tutoatasi, sa taulimaina le tufatufaga o araisa sa foai atu.
Sa galulue soosoo tauau volenitia Katoliko ma le AAG e toe utu ma tufatufa le foai o araisa i afioaga e 352 i Pampanga na aafia.
Na Auai le Au Paia i Aferika i le Lona Lima o Aso o Auaunaga
Ua lima tausaga sosoo, o auai le au paia i Aferika i le Aso o Mamona Lima Fesoasoani i Aferika Atoa, o se taumafaiga tuufaatasi i le va o Eria i Aferika Sautesasae ma Aferika i Sisifo. I se aso e tasi o tausaga taitasi, e faatino ai e le au paia i nei eria ni auaunaga o ituaiga eseese i o latou afioaga i le lotoifale. O le fuafuaga o le tausaga lenei sa faia i le aso 20 o Aokuso, 2011; o loo maua nisi o lipoti o galuega fesoasoani i le news.lds.org.
O le Au Paia i Lagos, Nigeria, o loo auai i se Aso o Lima Fesoasoani i Aferika Atoa i le aso 20 o Aokuso, 2011.
o ata na pueina e ebere evans