O Se Leo mo Tulaga Faatonuina Maualuluga
O moli susulu. Feei o le motu o tagata. Faitau afe o le au faamemelo i luga o le Facebook. Ina ua avea Gerson Santos e 17 tausaga ma se tasi o le au tauva o le 10 pito i luga i le tauvaga taleni musika na faasalalauina i le televise a Potukale o le Ídolos, o lea sa fetuutuunai ai o ia i le lauiloa ma le taulaiga lea na o mai faatasi ma lona faamanuiaina. Sa filifili Gerson e faaaoga lenei avanoa tulaga ese e talai atu ai le talalelei ma sa vave lava ona lauiloa ai i faasalalauga i Potukale o le “tagata tauva Mamona” sa naunau e tali fesili e uiga i lana tapuaiga.
Na faapefea ona e filifili e ulufale i le Ídolos? Na faapefea ona e sauniuni?
O le Ídolos o se faaaliga i le televise e ese lo’u fiafia e matamata ai. Sa ou fiafia lava e faafiafia ma sa ou faamoemoe ia i ai se aso ou te ulufale ai i se tauvaga musika. O le tausaga la lenei, ou te le’i faatali; sa na o le tusi lava o lo’u igoa mo le faaaliga ma sa ma o atu loa ma lo’u tama i le faataitaiga. Atonu e mafai ona ou faapea atu, sa ou sauniuni lava mo le Ídolos i lo’u olaga atoa. O aafiaga uma lava sa ou maua i le Ídolos sa matuai matagofie, e aunoa ma se faitioga. Sa ou taumafai e faaaoga avanoa uma na ou maua.
O a ni avanoa faafaifeautalai sa e maua i le taimi o le tauvaga?
I se tasi taimi i se taumafataga i le afiafi ma isi sui tauva, sa matou talatalanoa ai e uiga i ekalesia, ma sa ou talanoa e uiga i la’u tapuaiga ma tulaga faatonuina o le Ekalesia. Mulimuli ane, sa ou tuuina atu ai i sui tauva taitasi se kopi o le tamaitusi o le Mo Le Malosi o le Autalavou ina ia latou malamalama lelei ai i mea ou te talitonu i ai. Fai mai nisi, o tulaga faatonuina o le Ekalesia e foliga mai o ni tulaga ua leva lava, ae o isi sa latou viia a’u ona o le i ai o ni tulaga faatonuina maualuluga faapea i nei vaitaimi.
E masalo ua tele ou taimi ua ave e le Ídolos. Na faapefea ona e maua le taimi mo ou tiute faale-Ekalesia?
Sa faaauau pea ona fai au tatalo, faitau au tusitusiga paia, auai i le seminare, ma ai ma inu i le faamanatuga i Aso Sa uma. O loo ou sauniuni nei e faia se misiona, o se mea lea sa ou manao lava e fai talu mai lo’u laitiiti. Ou te galue i la’u uarota o se ta piano o le uarota, faifeautalai o le uarota, ma o se fesoasoani i le epikopo i le korama a ositaulaga. Sa tatau ona ou tuuto atu le toetoe lava o lo’u taimi atoa i le tauvaga, ae sa ou faamautinoaina lava ia muamua tuuto atu lo’u taimi i le Alii.
Ata pue mai faaaloaloga a Gerson Santos