“Ua tetea o’u matua. O nisi o taimi ou te maua ai se fautuaga mai le tasi o i laua ma e feteenai ma le fautuaga mai le isi. O le a le mea ou te faia?”

Ose tulaga faigata lenei. O le tete’a e faigata tele i se aiga. O lea la ua ia te oe le luitau o le faamamaluina ae le o le faafiafiaina o ou matua uma e toalua.

Afai e mafai, talanoa atu ia i laua e uiga i ou atugaluga. Atonu la te filifili e toe faatasia ona o oe. Afai la te le mananao e toe suia o laua mafaufau, e mafai ona e mulimuli i le fautuaga a le matua o lē e sili le malosi o lona lagona e uiga i [le toe faatasia]—pe afai e le fai atu ai ia te oe e soli ni poloaiga.

Afai o le fautuaga la te tuuina atu ia te oe e lelei ae eseese—e pei o le taumafai e auai i le aufaipese a le aoga po o le au volipolo—ona e filifili lea ma le agaga tatalo pe a maea ona e faalogo atu i a laua fautuaga. O le a taialaina oe e le Tama Faalelagi e ala i le Agaga Paia. Afai e fesiligia oe e se tasi o ou matua, e mafai ona e faamalamalama atu i ai ma le alofa, sa e tatalo ma ua e filifilia le mea ua e lagona e sili ona lelei.

Afai e fautuaina oe e se tasi o ou matua e fai se mea sese, e manaomia lou taumafai e saili se auala e filifili ai le mea sao. Mo se faataitaiga, afai e fai atu lou tama ia te oe e te nofo aua e te alu i le lotu ae ia faaalu faatasi le taimi e te lua mafuta ai, e mafai ona e taumafai e saili se auala e te alu ai i le lotu ona lua mafuta ai lea ma lou tama. Manatua o le filifilia o le mea sao o se tasi lea o auala e faamamaluina ai ou matua.

Fesili i Lou Epikopo

E mafai ona e fesili i lou epikopo po o le peresitene o le paranesi mo se fautuaga. O le a ia fesoasoani tele ia te oe, aua ua tuuina atu ia te ia e le Tama Faalelagi le mana e fesoasoani ai ia i tatou. Ou te iloa e matua faigata lava le faia o ni filifiliga i nei faaiuga, ae e tatau ona e iloiloina ma le totoa ia fautuaga uma mai ou matua ona filifili lea o le mea e sili ona lelei ina ia mafai ona e fetaomi atu i luma ma agai pea i luma.

Joseph S., 17 tausaga, La Libertad, Peru

Aoaoina o Tomai Fou e Taulima ai Faafitauli

Atonu e foliga faigata, ae e mafai lava ona taulimaina se teteaga—ma maua se aiga lelei. O se mea e tupu e suia ai olaga e pei o se teteaga e oo atu ai se tagata i ni tulaga faigata, ae e mafai foi ona fesoasoani ia i latou e iloa ai o latou malosiaga ma faatulaga ai ni tomai fou e taulima ai. Afai e te manaomia se fesoasoani ina ia e iloa ai le auala e taulimaina ai, fesili atu i se tagata o lou aiga e sili ona e fiafia i ai po o le faufautua i lau aoga, po o lou epikopo. Ma afai e faigata ona e talanoa i ou matua, taumafai e tusi atu ia i laua se tusi.

James P., 17 tausaga, Cebu, Filipaina

Tatalo mo le Taitaiga

Ua ou oo foi i le faafitauli lava lea e tasi. Soo se taimi lava ou te maua ai se fautuaga e feteenai, ou te alu ifo i ou tulivae ma tatalo atu i lou Tama Faalelagi ina ia iloa po o fea o fautuaga e tatau ona ou faaaogaina, e pei foi ona faia e le Perofeta o Iosefa Samita e iloa ai po o fea o lotu e moni. O taimi uma lava e oo mai ia tali i le leotele ma le manino, ma ou te iloa lelei ai lava le fautuaga sao e mulimuli i ai.

Anita O., 17 tausaga, Sisifo, Ghana

O Lau Faaiuga

E faigata tele pe afai o tagata e toalua e te faalagolago tele i ai mo se fautuaga e feeseesea’i i laua. O le a eseese manatu o tagata. Peitai i tulaga faapenei, e manaomia lou faalogo atu ia i laua uma, tatala lou mafaufau, ma o le iuga e fai lava e oe lau faaiuga po o fea o auala e sili ae po o fea foi o auala o le a au i ai le Alii. E faigata ona teena se tasi po o le isi o matua, ae e tatau ona e manatua e le o se tauvaga. O le a e alofa pea ia i laua uma, ma atonu o le a la fiafia ona sa e faia le faaiuga sa’o, e tusa lava pe afai e le o le faaiuga tonu lea sa la fautuaina mai.

Janiece H., 18 tausaga, Karolaina i Matu, ISA

E Fesoasoani le Tatalo

Tatalo ina ia e iloa mea uma na e talosagaina ai se fautuaga mai ou matua. O nisi taimi e eseese ai vaaiga a matua i tulaga e tutupu mai. E mafai ona fesoasoani atu le Tama Faalelagi ia te oe e fai le faaiuga sa’o. E taua fautuaga faamātua, ae afai e feeseeseai ou matua, alu i lou Tama Faalelagi mo se taiala ma se fautuaga. O le a fesoasoani ia te oe e le aunoa le tatalo e taulima nei tulaga.

Lea H., 17 tausaga, Kalefonia, ISA

Mulimuli i le Faataitaiga a Nifae

I le avea ai ma se faifeautalai sa ou oo ai i ni tulaga faapena, ma e masani lava ona ou tepa i le faataitaiga o le usiusitai o Nifae. O taimi uma lava na te maua ai ni fautuaga mai ona matua, na te faatinoina aua e lelei ma e sau mai le Atua. Peitai ina ua gau lana aufana, sa muimui lona tama faapea ma isi. Sa taitaiina e Nifae, e ala i lana faataitaiga, lona tama ina ia tatalo mo le taitaiga. (Tagai i le 1 Nifae 16:18–25.) O la tatou faataitaiga lea. Talia fautuaga mai ou matua, peitai afai e tuuina atu e se tasi se fautuaga e ese mai se mea e finagalo ai le Tama Faalelagi e te faia, ia e maua le lototele e te tauina atu ai ma le faaaloalo ia te ia le mafuaaga o le a e le mulimuli ai i lena fautuaga. Ma o le mafuaaga sili lava o lou manao lea ia filifili le mea tonu.

Elder Kapila, 21 tausaga, Misiona a le Ripapelika Temokarasi o Congo Kinshasa

Iloaina o le Mea Tonu

E eseese fautuaga e tuu mai ia te au e ou matua, peitai e masani lava ona ou iloa le mea sa’o. Sa ou fanau i le talalelei. Ua ou iloa le upumoni, ma o lea na mafai ai ona ou iloiloina po o fea o fautuaga e tatau ona ou mulimuli i ai. I nisi o tulaga, e manaomia ona tatou tatalo i le Tama Faalelagi ma tau lava o le faalogo atu i le leo filemu o le Agaga Paia pe alu i le epikopo ma faalogo i mea e fai mai ai.

Erika C., 18 tausaga, l, Pasila

Liliu Atu i Ou Taitai

E mafai lava ona e fesili atu i ou taitai i soo se taimi. E ala atu i faalapotopotoga a Tamaitai Talavou ma Alii Talavou, ua auina mai ai e le Alii ni taitai maoae e musuia le autalavou. Ua valaauina i latou ina ia fesoasoani ia te outou ma aoao outou, o lea la, o i latou o ni sosia lelei o musumusuga ma tali. E mafai foi ona e liliu atu i lou epikopo mo lena lava mafuaaga e tasi. Ua uma ona vaetofiaina nei taitai ina ia fesoasoani faapitoa i le autalavou.

Repeka S., 18 tausaga, Uosigitone, ISA