Auaunaga i le Ekalesia
Taulimaina o Faitioga i o Tatou Valaauga
O se faamanuiaga ma se luitau mataina e uiga i se ekalesia e le totogiina ona faifeau, o le tatau lea ona tatou onosai o le tasi i le isi ma ia i tatou lava ao tatou aoao ma tuputupu ae i o tatou valaauga. Ina ua tulai mai se tulaga faigata ma maaleale i lo’u valaauga—lea na aofia ai ni nai tagata o le uarota—, sa ou taulimaina i le mea e sili sa ou mafaia ma agai pea i luma, ma lo’u talitonu ua mavae atu lea aafiaga faigata.
Na ou sese. E le’i malilie uma tagata o la matou uarota e uiga i le auala sa tatau ona foia ai le faafitauli, ma na avea ma se vaega o se talanoaga tele. Sa ioe nisi i le mea sa ou faia. Na manatu nisi o se mea sese tele lea sa ou faia. Sa le lelei ou lagona, peitai talu ai ona sa ou faia le mea sili sa ou mafaia, o lea sa ou taumafai ai e aua nei ou popole tele i ai
Ae peitai, ina ua faamaloloina au i sina taimi puupuu mulimuli ane, sa o se tulaga na faateia tele ai a’u. E moni, sa ou iloa o valaauga o le Ekalesia e mo na o sina vaitaimi, ae ona o le taimi, o lea sa ou lagona ai e pei ua tuuaia ma faasala au e taitai ona o le mea sa tupu.
Na foliga mai ua atili faamasinoina au e tagata, ma sa ou le mautinoa pe na ou manao e toe vave feiloai atu i se tagata o le uarota. O le vaiaso la na sosoo ai ma lo’u faamalologa, sa ou nofo ai i le fale. Sa faapea foi i le vaiaso na sosoo ai—ma le isi vaiaso. O le umi lava na ou nofo ai, o le faigata foi lea o lo’u toe foi i le lotu.
Ina ua mavae sina taimi, sa amata ona ou mafaufau i le mea na tupu. Sa ou iloa ai e ui lava sa avea lea tulaga ma se vaega tiga, ae sa lei faatusalia i le lamatia ai o a’u feagaiga. Pe e moni le Ekalesia pe leai?
Atonu sa talafeagai lo’u taulimaina o le faafitauli i lo’u valaauga; atonu foi e leai. O le mea moni lava o loo tatou aoao uma, ma e tofu uma i tatou ma mea sese.
E ui lava i le tiga o le faapea atu [ua e] sese, ae sa le afaina tele i le ata lautele po o ai e sa’o pe sese foi. Ae o le mea o le a afaina, o le, pe sa ou tausia au feagaiga. O le a afaina—uma i lo’u aiga ma a’u—pe na ou alu i le lotu, faafouina a’u feagaiga i le sauniga faamanatuga, ma faaauau ona auauna atu. Ma o le a afaina le auala ou te tali atu ai i le taitai perisitua.
Sa ou toe foi i le lotu. I sina taimi puupuu mulimuli ane sa ou maua ai se isi valaauga. O lena valaauga—ma isi valaauga talu mai lena taimi—na manaomia ai lo matou galulue faatasi ma nisi o tagata sa faitioina a’u faaiuga. Sa faigata lena mea. Ae ua ou fiafia ou te le’i faatagaina o latou manatu faaalia e taofia mai a’u mai le olioli i faamanuiaga o le toaga i le Lotu.