Na Aumai e le Talalelei ia te Au le Filemu
Sina Rogers, Niu Sila
Sa liliu mai lo’u aiga i le Ekalesia ina ua ono ou tausaga, ma sa faamauina i matou i le malumalu ina ua valu ou tausaga. Sa aoaoina ma le maelega au e ou matua i aoaoga faavae o la matou faatuatuaga fou, o lea sa ou tuputupu ae ai ma le iloaina o le a mafai ona maua le filemu sili e ala i le tatalo, suesuega patino o tusitusiga paia, ma isi vaega o le talalelei.
Ae peitai, ana leai la’u misiona, semanu ou te le talisapaia moni lava le ata o le faaolataga. Ao ou faamisiona i Ausetalia, sa maliu lo’u tama. Ina ua sau lo’u peresitene o le misiona e ta’u mai le mea na tupu, sa ia tuuina mai ia te a’u se faamanuiaga faaleperisitua lea na sili ona taulai atu i le ata o le faaolataga. O lena faamanuiaga, faatasi ai ma au suesuega patino i aso, vaiaso, ma masina na sosoo ai, na fesoasoani ia te au ina ia ou aoao ma talisapaia atili lenei aoaoga faavae maoae nai lo se isi lava taimi. Sa mafai ona ou vaai i ou tulaga e ala i le malamalama o le ata o le faaolataga, ma sa mafai ona ou malamalama i lona matagofie moni. Talu mai lena taimi, ua atili taua ai le ata o le faaolataga ia te au.
Ao faaauau pea ona ou suesue i tusitusiga paia talu mai la’u misiona, ua ou iloaina ai o le tele o afioga a le Atua o loo molimau mai i Lana “fuafuaga tele o le fiafia” (Alema 42:8). Ua ou iloa o loo i ai le olaga i talaatu o le oti ma e mafai ona tatou toe faatasi ma e pele ia i tatou pe a mavae lenei olaga. O le iloaina ua faamauina lo’u tina, tama, ma i matou uma ma nai ou tei, ua aumaia ai ia te au le mafanafana sili.
E i ai aafiaga tiga o lenei olaga, ae e le manaomia ai ona faigata le olaga. E faafaigofieina e le talalelei a Iesu Keriso ia mea. Ona o lea tulaga, ou te iloa e mafai ona ou lagonaina le lagona o le filemu ma le mafanafana i taimi uma, e tusa lava po o le a se mea o loo tupu i lo’u olaga.