Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nai faataitaiga nei.
“O Le Aoaoga Faavae a le Tama,” itulau e 20: Amata i le fesili atu i tagata o le aiga e faasoa mai ni mea latou te iloa e uiga i le natura o le Tama Faalelagi. Ia talanoaina le tusiga lenei, ma otooto ia manatu na o loo ta’ua i vaega taitasi o loo faapea ona aumai ai ni vaaiga manino po o ai le Atua le Tama. Mafaufau e faaiu i lau molimau i le alofa o le Tama Faalelagi ma Lona Alo, o Iesu Keriso.
“O Lau Galuega Lenei,” itulau e 42: Muamua, ia faitau le autu o loo i le autafa “O Le A Se Mea e Mafai Ona Ou Faia?” ma filifili se manatu se tasi o le a fesoasoani i lou aiga ia aofia ai i le galuega o talafaasolopito o aiga ma le galuega o le malumalu (tagai foi i le lds.org/familyhistoryyouth). I le taimi o le afiafi faaleaiga, faitau faatasi ma lou aiga le tusiga ona fesili atu lea po o a faamanuiaga na folafola mai e Sister Beck ia i latou o e auai i lenei galuega taua. Ia faatino le manatu sa outou fuafuaina ma mafaufau e faaauau lenei galuega faatino i vaiaso a sau.
“O Le Alofa Mutimutivale o le Alii,” itulau e 48: Faitau le tala e uiga i le aiga talavou lea na maua se kata faapitoa o le Kerisimasi ma le tala a le taitai perisitua o lē na iloaina igoa o le autalavou i lana siteki. Fai atu i tagata o le aiga e mafaufau i alofa tunoa na latou mauaina mai le Alii. Mafaufau e fesili atu, “O le a le alofa mutimutivale? O ai e mauaina ia alofa mutimutivale? E faapefea ona e faaali atu le agaga faafetai mo le alofa mutimutivale ua e maua?” Atonu o le a e manao e tulitatao atu i tali a Elder Bednar i nei fesili mai le tusiga.
“Tapeina [o Masini Faatekinolosi],” itulau e 61: Faitau mea o loo fai e nei tamaiti ma o latou aiga e faaaoga ai se vaega talafeagai o ala o faasalalauga. Atonu o le a e manao e talanoaina po o a ni auala o loo tausisia ai e lou aiga se paleni lelei o le Televise, komepiuta, ma isi “taimi e matamata ai televise po o le komepiuta.” I le konafesi aoao ia Oketopa 2011, sa saunoa ai Elder Ian S. Ardern o le Fitugafulu e uiga i le faaaogaina ma le poto o tekinolosi eseese: “Po o le a lava le lelei o nei mea, e le mafai lava ona tatou faatagaina ia mea e suia ai mea e sili atu ona taua” (“O Se Taimi e Saunia Ai” Liahona ma le Ensign, Nov. 2011, 32). Mafaufau e faatutu ni sini e talitutusa ma sini o loo i lenei tusiga ina ia avea ai lou aiga o se nofoaga e mafai ona nofo ai le Agaga.
Lesona o le Aso Sa i Po o Aso Gafua
Sa ou manao lava ia maua se lesona manaia o le afiafi faaleaiga i vaiaso taitasi, ae o le tau mafaufauina o se autu ma le saunia o se lesona sa avea o ni luitau masani mo a’u.
I se tasi Aso Gafua, sa ou iloaina ai ua galo ia te au ona saunia se lesona. Ona ou iloa ai lea o se faamanuiaga natia o le avea ma se faiaoga i le Peraimeri. E le’i leva ona valaauina au e faiaoga i tamaiti e tailima tausaga le matutua ma sa faatoa uma ona ou aoaoina atu se lesona i le aso ua mavae. Sa ou filifili loa e faaaoga se vaega faafaigofie (ma e talafeagai ma le matutua) o le mea sa ou aoaoina atu i le Aso Sa mo le AAF. O lena po o le Aso Gafua sa matou talanoa ai e uiga i le usiusitai, ma sa ou toe faamatalaina ai ni tala se tolu sa ou faasoaina atu i le aso ua mavae i le Peraimeri.
O le fetuunaia o la’u lesona o le Peraimeri i lo’u aiga ua avea o se auala lelei mo au e ausia ai la’u sini o le faia o se lesona saunia lelei ma le manaia mo le afiafi faaleaiga i vaiaso taitasi.
Christina Sherwood, Arisona, ISA