Ua Valaaulia e le Tauvaga Faavaomalo o Faatufugaga le Autalavou e Faasusulu Atu Taleni

I le Mataupu Faavae ma Feagaiga 115:5–6, ua valaauina ai e le Alii ia tagata uma o Lana Ekalesia, ma valaaulia i latou e “tutulai ia ma susulu atu” ina ia avea lo latou “malamalama ma tagavai mo atunuu.” Sa Ia fetalai atu ia i latou ia aufaatasi e lagolago e le tasi le isi ma avea “o se sulufaiga mai le afā.”

O le toe fofogaina foi o lenei valaau, ua valaaulia ai e le Falemataaga o Talafaasolopito o le Ekalesia le autalavou a le Ekalesia o le vaitausaga 13 i le 18 e auai i le uluai Tauvaga Faavaomalo o Faatufugaga mo le Autalavou. Mo ni nai tausaga, sa faia ai e le mataaga se tauvaga faavaomalo o faatufugaga mo tagata matutua o le Ekalesia, ae o lenei ua avanoa se poto masani faapena i le autalavou i lenei tauvaga fou.

Ua luiina le autalavou e fatufatuai ni galuega o faatufugaga e faapea ona faaalia ai le uiga o le fetalaiga a le Alii—“tutulai ia ma susulu atu”—ia i latou. Na amata ona taliaina e le falemataaga ia faatufugaga mo le tauvaga i le Aso Gafua, 2 o Ianuari, 2012.

“E tusa lava pe o le a le le atoatoa o le vaai a o tatou talavou i a latou taleni o faatufugaga, ae e ese le manaia, o le ala e mafai ai e se mea faatauvaa e pei o se ata tusi, se ata pue, po o se ata vane ona pai atu i le agaga o se isi tagata ma avea ai o se punavai maoae o le malosiaga faaleagaga ia i latou,” o le faamatalaga lea a Angela Ames, o le taitai lagolago o aoaoga i le falemataaga. “Ma a o faaaoga e le autalavou a latou taleni fatufatuai e aoaoina faaleagaga ma musuia ai isi, o le a faapena foi ona musuia ai ma i latou.”

Soo se galuega o faatufugaga e auina atu i le tauvaga e tatau ona fatuina i le tuanai ai o le aso 1 o Ianuari, 2009. E mafai e tagata tauva ona auina atu a latou galuega i le initoneti seia oo atu i le Aso Faraile 1 o Iuni, 2012. E mafai e tufuga taitoatasi ona auina atu se galuega se tasi i le tauvaga. E mafai ona maua faamatalaga ma taiala mo faatufugaga e auina atu i le lds.org/youthartcomp.

Soo se tetelē ma soo se sitaili lava o faatufugaga e taliaina i le tauvaga—atavali, ata tusi, ata pue, ata vane, galuega i metala, ie, teuga [asoa, taulima, mama, tautaliga], ma ipu ele, ma isi mea faapena. E tusa ai ma tulafono ma mea e manaomia o le tauvaga, “e mafai ona faaalia i le galuega o faatufugaga se vaega o aganuu ma agaifanua matagofie mai le lalolagi atoa. E taliaina uma ia faaliliuga faafaatusa ma faaliliuga moni o faatufugaga.”

E le o toe mamao ae faalauiloa e le saite o le tauvaga se vitio o fegalegaleaiga, i lalo o le vaega “Your Creative Process,” lea e mafai ai e tufuga talavou ona tagai i ai pe a latou manaomia le fesoasoani e palepalealuga ai se manatu pe filifili foi pe faapefea ona momoli atu a latou savali.

A mavae ni taamilosaga se lua o le faamasinoina e se au faamasino toatele o tagata o le ekalesia, ona filifili loa lea o le au manumalo ma talosagaina e auina atu a latou uluai faatufugaga i le falemataaga. O a latou saofaga o le a faaalia i se faaaliga o le a faia mai le aso 16 o Novema, 2012, e oo atu i le aso 17 o Iuni, 2013.

Mai na vaega o faatufugaga e faaalia i le faaaliga, e oo atu i le 20 o faatufugaga o le a maua ni Taui o le Tulaga Maoae, e tuuina atu e faafetaia ai se galuega maoae, ma e tolu o le a mauaina Taui o le Filifiliga a Tagata Asiasi, lea e tauaaoina atu pe a lata ina tapunia le faaaliga.

E valaaulia le autalavou a le Ekalesia o le vaitausaga 13 i le 18 e auina mai ni faatufugaga i le uluai tauvaga mo faatufugaga a le autalavou.