Ua Saunoa Mai i le Aso
Ua Asiasi Atu Elder Ballard ma Elder Jensen i le Au Paia i Mekisiko
I le faaiuga o le vaiaso i le aso 10–11 o Setema, 2011, sa feiloai ai Elder M. Russell Ballard o le Korama a Aposetolo e Toasefululua ma Elder Jay E. Jensen o le Au Peresitene o Fitugafulu, ma le au paia ma faifeautalai i Cuernavaca, Mekisiko. Sa talosagaina e Elder Ballard le au paia ina ia teuloto le talalelei i loto o tagata Mekisiko e ala i aafiaga faaleagaga. “Ua tele naua le taliaina faalemafaufau o le talalelei e aunoa ma le i ai o se taliaina faaleagaga,” na ia saunoa ai. “O le liua moni o le agaga e manaomia e o tatou tagata e faailoa atu ai i o latou loto mea ua latou malilie i ai i o latou mafaufau.”
Ua Asiasi Atu Elder Oaks ma Elder Andersen i Peru, Polivia
Ia Aokuso 2011 sa malaga atu ai Elder Dallin H. Oaks ma Elder Neil L. Andersen o le Korama a Aposetolo e Toasefululua i Polivia ma Peru i Amerika i Saute. O le savali a Elder Andersen sa aofia ai ana aoaoga e faapea, i le lalolagi atoa, o loo tauivi ai tagata uma e filifili i le va o le lelei ma le leaga. “O le faigata ona fai o filifiliga e uiga i le olaga nei e tutusa lelei lava mo oe faapena foi mo a’u,” sa ia saunoa ai. “Ua tatou i ai iinei e aoao pe faapefea ona [tatou] ola i le faatuatua.”
Ua Faataunuu e Elder Bednar Se Tofiga i Europa
I le amataga o Setema, sa feiloai ai Elder David A. Bednar o le Korama a Aposetolo e Toasefululua ma le Au Paia i Egelani, Siamani (o le atunuu lea sa faamisiona ai o ia i le toeitiiti 40 tausaga talu ai), ma Tenimaka. I ia nofoaga taitasi, sa aoao atu ai e Elder Bednar le aoaoga faavae a Keriso ma faamamafa atu le mana o le Togiola. Sa faaauau foi ona ia aoao atu le mataupu faavae o le faitalia e fai ai amioga lelei ma lo tatou tiutetauave patino e fai ai. “O le faitalia e fai ai se amioga lelei o le malosi ma le gafatia lea o faatinoga faitoatasi,” na ia saunoa ai. “Ma a o tatou faia amioga talafeagai ma e tusa ai ma aoaoga a Iesu Keriso, e faapea ona suia ai o tatou lava natura e ala i Lana Togiola ma e ala i le mana o le Agaga Paia.”
caption here?
ata pue na saunia e Craig T. Olson