Pe a Tatou Filifili le Mea Sa’o, E Faamanuiaina i Tatou

E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.

Sa taaalo lakapi ia Tanielu ma ana uo, ae ona vaaia ia Iosefa o nofonofo na o ia, ma matamata mai. O Iosefa e le lelei tele lana taalo lakapi. Ae sa filifili Tanielu e sili atu lona manao ia aofia ai Iosefa nai lo le malo i le taaloga. Sa tamoemoe atu o ia ia Iosefa ma fesili atu i ai, “E te fia taalo ma i matou?”

Sa filifili e Tanielu le mea sao.

Ua folafola mai e le Tama Faalelagi ma Iesu Keriso ia i tatou e faapea, pe a tatou filifili le mea sao, o le a faamanuiaina i tatou. Ua tatou maua i tusitusiga paia ni faataitaiga amiotonu e mulimuli ai. O faataitaiga nei e lua:

Ina ua mulimuli Noa i le poloaiga a le Alii e fau se vaa, sa ia faasaoina nisi o lona aiga mai le Lolo. (Tagai i le Kenese 6–8.)
Ina ua gau le aufana a Nifae, sa ia faia se isi aufana fou nai lo le faavaivai. Sa tatalo lona tama o Liae, mo se fesoasoani, ma sa taitai atu e le Alii ia Nifae i le mea e maua ai meaai. (Tagai i le 1 Nifae 16:18–32.)

O nisi taimi e faigata ai ona filifili le mea sao, ae e faamanuiaina i tatou e le Tama Faalelagi pe a tatou faia. Pe a tatou faia faaiuga lelei, e mafai ona tatou lagonaina le toafilemu ma le fiafia.

Taaloga FMT

Faapipii le itulau e 65 i luga o se pepa malo. A mago loa, ooti ese ia kata. E auauai ia tagata taaalo e sue ni kata tailua e fetaui: e tasi le kata o loo faaalia ai se tulaga lea e manaomia ai le faia o se filifiliga, ae o le kata e fetaui i ai e faaalia ai se tagata o filifilia le mea sao. Mo se faataitaiga, o le kata o loo faaalia ai se tamaitiiti o loo mauaina se tupe e fetaui ma le kata o loo faaalia ai lona totogiina o le sefuluai.

Auala e Taaalo ai: Ia faafefiloi ia kata ma faafao. E fuli i luga e se tagata taalo ni kata se lua. Afai e fetaui ia kata, ona tuu lea e le tagata ia kata ae toe fuli i luga nisi kata se lua. Afai e le fetaui ia kata, ona toe faafao lea o kata ae taalo le isi tagata. E mafai ona taaalo tamaiti laiti ifo i ni kata e le tele tele pe faataliaga foi kata.

Ata na tusia e Apryl Stott