O Lo Tatou Tamao i le Lagi

Tatou te aoao e uiga i le Tama Faalelagi mai le amataga o lo tatou aafiaga faale-Lotu—mai la tatou uluai tatalo e oo atu i lo tatou uluai usuina o le pese “O Le Atua Lo’u Tama” (Viiga, nu. 184). O mea e silafia e tagata o le Au Paia o Aso e Gata Ai e uiga i le Atua le Tama e tulaga ese, ma ua faia ai se eseesega tele ia i tatou.

Vaaia o le Tama

O ni tala faaletusi paia nei i ni tagata na vaai i le Tama:

• Setefano (tagai i leGaluega 7:56)

• Iosefa Samita (tagai i leTalafaasolopito—Iosefa Samita 1:17)

• Iosefa Samita ma Sini Rikitone (tagai i le MF&F 76:20)

Ae, e pei ona fetalai Iesu, “o le ua vaai mai ia te au, ua vaai o ia i le Tama” (Ioane 14:9).

Moni ma Patino

“O se tasi o aoaoga faavae maoae ma le silisili o lenei Ekalesia o lo tatou talitonuga i le Atua le Tama Faavavau. O Ia o se tagata, e moni ma patino. O ia o le Pule aoao o le atulaulau, ae o Ia o lo tatou Tama, ma o tatou o Lana fanau.

“Tatou te tatalo ia te Ia, ma o na tatalo o se talanoaga lea i le va o le Atua ma le tagata. Ou te mautinoa Na te faafofogaina a tatou tatalo ma tali mai i ai.”

Peresitene Gordon B. Hinckley (1910–2008), “O Mea Ua Ou Iloa,” Liahona ma le Ensign, Me 2007, 83.

O Le Atua Moni e Toatasi

“O Le Tama o le Atua moni e toatasi. O lenei mea e mautinoa: e leai se tasi e mafai ona alu i luga ae o Ia; e leai se tasi e mafai ona suitulaga ia te Ia. … O Ia o Elohima, le Tama. O Ia o le Atua. O Ia lava e na o le toatasi.”

Peresitene Boyd K. Packer, Peresitene o le Korama a Aposetolo e Toasefululua, “The Pattern of Our Parentage,” Ensign, Nov. 1984, 69.

Faalogoina o le Tama

Pe a fetalai mai le Tama, e molimau mai o Ia i Lona Alo Pele, o Iesu Keriso. Mo se faataitaiga:

• I le papatisoga o Iesu (tagai i le Mataio 3:17)

• I le Mauga o Liua ia Peteru, Iakopo, ma Ioane (tagai i le Mataio 17:5)

• I se faaaliga ia Nifae (tagai i le 2 Nifae 31:11, 15)

• I le faaali mai o Iesu i Amerika (tagai i le 3 Nifae 11:7)

• I le Uluai Faaaliga Vaaia (tagai i le Iosefa Samita—Talafaasolopito 1:17)

O Le Misiona a le Faaola e Faaali mai le Tama

“I mea uma sa afio mai Iesu e ta’u mai ma fai, … sa Ia faaalia mai ia i tatou po o ai ma pe faapeī foi le Atua lo tatou Tama e Faavavau, le tuuto atoa o Ia i Lana fanau i augatupulaga uma ma atunuu uma. I le upu ma le amio, sa taumafai ai Iesu e faaali mai ma faapatino mo i tatou le natura moni o Lona Tama, lo tatou Tama oi le Lagi.”

Elder Jeffrey R. Holland o le Korama a Aposetolo e Toasefululua, “O Le Mamalu o le Atua,” Liahona ma le Ensign, Nov. 2003, 70.

Matua Faalelagi: O Se Upumoni Mamana

“Mafaufau i le mamana o le manatu o loo aoao mai i la tatou pese faapelepele ‘O Le Atua lo’u Tama’ (Viiga, 1985, nu. 184). … O le tali lenei i se tasi o fesili tele o le olaga, ‘O ai a’u?’ O au o se atalii/afafine o le Atua ua i ai se gafa faaleagaga i ni matua faalelagi. O lena tulaga faamātua ua faamatalaina ai o tatou gafatia faaleagaga. O lena manatu mamana o se malosiaga e aveese ai le atuatuvale. E mafai ona faamalosi ai i tatou taitoatasi e fai filifiliga sao ma saili le mea sili o loo i totonu o i tatou.”

Elder Dallin H. Oaks o le Korama a Aposetolo e Toasefululua, “O Manatu Mamana,” Liahona, Ian. 1996, 25.

Ua Aoao Mai Iosefa Samita e uiga i le Atua le Tama

E tele mea ua aoaoina ai i tatou e Iosefa Samita e uiga i le natura moni o le Atua aua sa vaai o ia i le Tama Faalelagi ma Iesu Keriso, ma mauaina le tele o faaaliga.

O le a le ituaiga tagata soifua e i ai o Ia? “O le Atua lava Ia na avea o ia e pei o i tatou nei, ma o se tamalii faaeaina, ma o loo nofotupu o ia i le lagi!”¹

E faapeī Ona foliga? “Ua i ai i le Tama se tino o aano ma ivi e mafai ona pa’i i ai e pei o le tagata.”² “Afai e mafai ona e vaai ia te Ia i le aso, o le a e vaai ia te Ia e foliga i se tagata—e pei o oe lava.”³

O le a le tatou faiā i le Atua? “Afai e le malamalama tagata i uiga o le Atua, latou te le malamalama ia te i latou lava.”⁴ “O loo silasila mai le Matua Sili o le atulaulau i luga o le aiga atoa o tagata … o Ana fanau.”⁵

Aisea na Ia faavaeina ai le ata o le faaolataga mo i tatou? “O le Atua lava ia, i le silafia ai ua i ai o ia i le lotolotoi o agaga ma le mamalu, … [na faavaeina] tulafono e mafai ai e le toatele ona maua le avanoa e alualu ai i luma e pei o Ia lava.”⁶

O le a se mea e taua i le faalatalata atu i le Atua? “A tatou malamalama i uiga o le Atua, ma le ala tatou te o mai ai ia te Ia, o le a amata ona Ia tatalaina mai le lagi ia i tatou.”⁷

Faamatalaga

1. Aoaoga a Peresitene o le Ekalesia: Iosefa Samita (2007), 44.

2. Mataupu Faavae ma Feagaiga 130:22.

3. Aoaoga: Iosefa Samita, 44.

4. Aoaoga: Iosefa Samita, 44.

5. Aoaoga: Iosefa Samita, 42.

6. Aoaoga: Iosefa Samita, 223.

7. Aoaoga: Iosefa Samita, 44.

O Le Uluai Faaaliga Vaaia, saunia e Gary L. Kapp