Faataitaia ma le Faamamaluina o o Tatou Matua Faalelagi

Saunia e Scott Van Kampen

Mekasini a le Ekalesia

Talu ai o le i ai o se mamanu i le vaaiga o o tatou mafaufau e fesoasoani tatou te faataitai ai i amioga faalelagi, ua tuuina mai ai e lo tatou Tama poto ia Lona Alo e avea ma a tatou mamanu moni e mulimuli ai ia te Ia.

Na aoao mai Elder Douglas L. Callister, o le sa avea ma Fitugafulu, o le talalelei a Iesu Keriso o se talalelei o faataitaiga. “O se tasi o faamoemoega o lo tatou olaga faataitai faalelalolagi o le, ia avea e faapei [o o tatou matua faalelagi] i soo se auala e mafai ai ina ia mafai ona tatou maua le fiafia i le afioaga o [o tatou] matua faalelagi.” Tatou te faataitaia i Laua a o tatou taumafai e mafaufau, tautala, faatino, ma foliga foi e pei o i Laua (tagai i le Alema 5:14).¹

I le avea ai ma se tagata mamanu kalafi, ua ou galue ai i le tele o sitaili eseese o faatufugaga e manaomia e tagata eseese. Ina ia faia lea mea, ua ou iloa le taua o le i ai o se mamanu. E ui atonu e faamatala mai e le tagata le galuega ma lona taunuuga moomia i ni faamatalaga auiliili, ae ua ou iloa e fesoasoani tele ia te a’u le i ai o se faatusa ou te tilotilo i ai a o ou galue. O lena mamanu—e tusa lava pe na o se faatusa faalemafaufau— e faamanatu mai ai ia te au lau sini ma ou tumau ai i se tulaga e laugatasia ai.

E faapena foi i lo tatou olaga faataitai i le olaga nei, o faatonuga lava ia e le o taimi uma e lava ai e fesootai atu ai faamatalaga pe faailoa atu ai se manatu fou. Tatou te ono manaomia se ata po o se mamanu i le vaaiga o o tatou mafaufau e fesoasoani tatou te faataitai ai i amioga faalelagi. O lea la, afai tatou te mafaufau o i tatou lava o fanau a le Atua, e mananao e toe foi atu ia te Ia, o le a sili atu ona mamanu o tatou olaga ia te Ia ma taumafai mo uiga o loo faapea ona i ai ia te Ia.²

Sa saunia moni e lo tatou Tama Faalelagi poto ia Lona Alo e Toatasi na Fanaua e avea ma a tatou faataitaiga moni o le auala e faataitai ai ia te Ia. I le taimi o le galuega a le Faaola i le lalolagi, sa Ia faia le finagalo o le Tama, i le faaaluina o Lona taimi e fesoasoani ai i isi. E faapena foi, pe a tatou faataitai i le Tama ma Lona Alo, tatou te faaaoga a tatou meaalofa, taleni, ma le poto e tuuina saoloto atu ai auaunaga. A o tatou auauna atu, ua tatou faamamalu i lo tatou Tama ma e faamamalu e Ia i tatou e ala i le valaauina o i tatou e auai i le fausiaina o Lona malo.

E pei lava ona faia i mamanu faakalafi, o nisi taimi i le olaga, e sui tulaga ai se mamanu vaaia, faitino i se mamanu faalemafaufau. E masani ona tatou aoao mai auaunaga a isi. O loo ou manatuaina lava le taimi muamua, sa avea ai au ma failautusi faapitoa o le uarota, sa le mafai ona ou faatumuina le faasologa faatulagaina o faatalanoaga a le epikopo. Ae peitai, sa faamanatu mai e le epikopo e faapea, e pule le Alii ma sa Ia silafiaina po o ai na manaomia ona vaai le epikopo i lena aso—e tusa lava pe ma te le’i iloaina. Ma na moni lava, soo se taimi lava e oo mai ai lenei “faafitauli,” e tatagi le telefoni pe afe mai foi se tagata e fesili mai pe o avanoa le epikopo. Ona o lana taitaiga musuia, sa i ai lava lona avanoa.

E faaopoopo atu i le i ai o faataitaiga a taitai, sa faamanuiaina au i ni matua o e sa faataitaia le agalelei, galue malosi, lagolago, faamaoni, ma le amiotonu. O a laua faataitaiga sa o se mamanu e mafai foi ona ou mulimuli ai, ma faaali mai ia te au le sootaga i le va o le faataitaia o le Atua ma le faamamaluina o o tatou tama ma tina. O faataitaiga amiotonu a o tatou matua faalelalolagi o se vaega lea o le mamanu a le Tama Faalelagi, ma o le faamamaluina o i latou, e mafai ai ona tatou iloa ia uiga tatou te manaomia ina ia mafai ona tatou toe mafuta faatasi ma lo tatou Tama Faalelagi. Ma a o avea i tatou ma se vaega o le mamanu amiotonu o olaga a a tatou fanau, e mafai ona tatou fesoasoani e faalautele Lana fuafuaga ma faamaea Lana mamanu o le avea ma matua e ala i le aumaia e le gata o i tatou lava ae faapena foi i o tatou aiga e faavavau e toe foi atu ia te Ia.