O Le Po o le Suega
A o ou i ai i lo’u tausaga faaiu i le aoga maualalo, na o uma lava tamaiti aoga e tolauapi i Negros Occidental, Filipaina, ao lumanai lo matou faauuga. Na faatu lo matou faleie i le nofoaga o le tolauapiga ma sa matou fiafia e sailiili i le faatoaga kuava ma mago. Ina ua oo mai le po, na o mai o’u matua e asi mai a’u. Sa fai mai i la’ua ia ou matua faaeteete, ona la o ai lea.
Na valaaulia matou ma nisi o a’u uo e se tasi o la’u vasega matou te tietie ma lona tausoga e matua atu. Na aveina e lona tausoga i matou i nofoaga eseese, ma na matua malie seia oo ina faateia a’u—ina ua aumai—e la’u vasega ia pia ma sikaleti. Na faatu le taavale e latalata i le nofoaga o le tolauapiga, ma amata loa ona latou inu pia ma ulaula i totonu o le taavale. Na latou valaaulia a’u ou te auai, ae na ou musu.
Na ou faapea atu ou te le auai ona o le ulaula e faapuupuu ai lo’u olaga. Na ou fai foi i ai e le ogatasi ma o’u talitonuga, aua ua aoaoina a’u i le Upu o le Poto. Na ou fai atu o le Upu o le Poto o se tulafono ua aoao mai ai e tatau ona tausi ia mama o tatou tino, aua o malumalu o le Atua. Na ou fai atu ia i latou e tatau ona tatou alo ese i le ulaula; inu pia, lauti, ma le kofe; faapea ma le faaaogaina o fualaau faasaina. Na ma tuua ma la’u uo mamae le vaega lea, ae ma o loa ma momoe i lo ma faleie.
Ina ua ou foi i lo’u aiga, na ou fiafia e ta’u atu i lo’u tama ou te le’i auai i mea na faia e la’u vasega ae na ou aoaoina atu i latou e uiga i le Upu o le Poto. Na ou fiafia na i ai le Agaga Paia e taitaia a’u ma tuuina mai ia te a’u le lototoa e tautala atu ai i a’u uo.
Mai lenei aafiaga na ou aoao ai o le a tofotofoina lo tatou usiusitai pe a na o i tatou, e aunoa ma ni matua po o nisi e lagolagoina i tatou. Ou te lagona le faafetai mo le Upu o le Poto ma ua ou tautino atu ou te usitai i ai. A oo ina ou matua, o le a ou alu i se misiona ma aoao atu i le tele o tagata le taua o le Upu o le Poto.