Manatu Faaopoopo mo Taimi o Fetufaaiga, Setema 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Setema 2007. Mo le lesona, faatonuga ma le gaoioiga e o faatasi ma nei manatu, tagai i le “Na Auauna Atu le Matai” i itulau U4 ma le U5 i le vaega a tamaiti o le lomiga lenei.

Ia faamalamalama atu o le “Ina alu ia ma ia e faapea ona fai” (Luka 10:37) o le laina mulimuli lea i se tala taua lava na faamatalaina e Iesu. Ia faaali atu le ata mai le Taga Ata o le Talalelei 218 (O Le Samaria Agalelei). Ia faaaoga faamatalaga o loo i tua o le ata e faamalamalama ai le mafuaaga na faamatala ai e Iesu le tala. Faitau upu a Iesu mai le Luka 10:30–37, ma ia mulimuli mai ai tamaiti. A uma ona faamasani tamaiti i le tala, ia fai atu i ni tamaiti se toafa e faatino mai le tala (tagai “Tala Faatino,” O Le Aoao Atu E Leai Se Valaauga e Sili Ai [1999], 174–75). Ia faaaoga tamaiti e fai ma ositaulaga, sa Levi, ma le Samaria, ma le tagata manu’a. Toe faitau le tala mai le mau a o faatino e tamaiti.

Toe foi atu i le “Ina alu ia ma ia e faapea ona fai.” Ia faamalamalama atu o se tasi o faamoemoega o le tala a Iesu, ia aoao atu i tagata le ala e avea ai ma tuaoi lelei. Fesili i tamaiti pe faapefea ona avea i latou ia faapei o le Samaria. Ia faaali atu i tamaiti matutua le tamaitusi o le Faatuatua i le Atua. Ia faitau manatu o loo lisiina i lalo o le Auauna Atu I Isi o loo i itulau 8 ma le 9. Tuu se lu’i i tamaiti ina ia avea atili e pei o Iesu e ala i le auauna atu i isi.

Mo tamaiti laiti ifo: Tusi [lou] lima i vaega eseese o le tino, ma fai atu i tamaiti e mafaufau i auala e mafai ona latou auauna atu ai e ala i le faaaogaina o le itu tino lena o o latou tino. Mo se faataitaiga, o vae, e mafai ona latou faapea mai, “E mafai ona ou aveina atu se mea mo lo’u tina i le isi potu,” po o taliga, “E mafai ona ou faalogo ai ma usiusitai i ou matua.”

Na aoaoina i tatou e Iesu ia auauna atu i isi e ala i Ana upu ma faataitaiga. Ia usu le “O Loo Ou Taumafai e Avea e Pei o Iesu” (Tusipese a Tamaiti, 40–41; Liahona, Ape. 1990, U6–7). Vaevae tamaiti i ni vaega. Ia usuina e vaega taitasi se fuaiupu se tasi ma faasino o latou lima ia i latou lava pe a usuina le “Ou te.” Ia usuina faatasi le tali. Ia tuuina atu lau molimau e uiga i le alofa o le Tama Faalelagi ma Iesu mo i tatou. Na faaalia e Iesu Lona alofa sili i le tuuina mai o Lona ola mo i tatou. Molimau atu o Ia o le Alo o le Atua.
Faaali atu se tusi ua faia i ni pepa lapopoa ua tusia ai i luma le “O Le Mealilo M217.” Ia susue i le itulau muamua o le tusi ma faitau, “O le a le M217? Faaataataga: O se mau e faatatau i le auauna atu.” Fai atu i tamaiti e fesoasoani atu ia te oe e sue le mealilo e ala i le sueina o le mau (Mosaea 2:17). Tuu atu i le afa o tamaiti e sue i le faasino mataupu o le Tusi Paia ma faailoa mai soo se tusi e amata i le mataitusi o le M. Tuu atu i le isi afa o tamaiti e sue i le faasino mataupu o le Tusi a Mamona ma faia le mea lava lena e tasi. Tuu atu i tamaiti e sue i tusi e amata i le M ia le 2:17 (mo se faataitaiga, Malaki 2:17). Ia faailoa atu, o nisi tusi e le maua ai le mataupu e 2:17. Ia tau faaataata atu ia i latou o loo latou sueina le mau patino e tasi e uiga i le auauna atu.

A maua e tamaiti le mau sa’o o le Mosaea 2:17, fai atu i ai e vase ma makaina le mau lea i totonu o a latou tusitusiga paia pe a latou mananao ai. Faamalamalama atu, o loo tau mai ia i tatou le ala e auauna atu ai i le Alii. Faaali atu le “Pe a i ai outou i le galuega a outou uso, ua na ona i ai outou i le galuega a le Atua” o loo i le itulau e sosoo ai o le tusi.

Valaaulia tamaiti e sue itulau o lau tusi, o loo faaalia ai ala e mafai ona tatou auauna atu ai i le Atua. Ia talanoaina le ala o loo auauna atu ai tagata a o e faaali atu ata e pei o le Taga Ata o le Talalelei 612 (O Loo Aoao Atu e Faifeautalai le Talalelei a Iesu Keriso), 611 (O Le Epikopo), ma le 607 (O Se Tamaitai Talavou o loo Lauga i le Lotu). Ia faaopoopo atu i ai ni ata eseese mai le Taga Ata a le Peraimeri e faaali ai le fesoasoani i totonu o le aiga. Ia talanoaina auala e mafai ai e tamaiti ona auauna atu i isi ma faapea ai ona auauna atu ia Iesu Keriso.

Tufatufa atu fasi pepa ina ia mafai ai e tamaiti ona faia a latou lava tusi. Ia tuu atu i tamaiti e gau lua a latou pepa ma fai atu i ai e tusi le “O Le Mealilo M217” i luma o le faavaa ma kopi le mau i totonu o le faavaa. Tuu atu se lu’i ia i latou e tusi ni ata pe tusi foi ni auala o le a latou auauna atu ai i le Alii i le vaiaso a sau. Ia valaaulia i latou e faailoa atu a latou tusi i o latou aiga i afiafi faaleaiga. Ia faamalosiau atu ia i latou e faatino galuega auauna atu i le gasologa o le vaiaso. Ia faamalamalama atu o le a tuputupu ae le faatuatua ia Iesu Keriso pe a tatou auauna atu i isi.