Taimi o Fetufaaiga

Na Auauna Atu le Matai

Saunia e Elizabeth Ricks

“Pe a i ai outou i le galuega a o outou uso ua na ona i ai outou i le galuega a le Atua” (Mosaea 2:17).

Na fiafia Iesu e auauna atu i isi. O Ia o le faataitaiga sili o le auauna atu. Ua fetalai mai o Ia, “A o a’u nei, o loo ia te outou pei o le auauna ia” (Luka 22:27). Na Ia silafia na afio mai o Ia i le lalolagi e auauna atu i isi, e le ina ia auauna mai ia te Ia. E te manatu ea e uiga ese le auauna atu o le Matai i isi? O upu Matai ma le auauna o upu faafeagai. Atonu e te manatu o se mea e faateia ai le faapea, o matai silisili ona maoae o i latou ia e auauna atu.

I le taimi o le soifuaga faaletino o Iesu, na auauna atu ai o Ia i e matitiva. Na aoao atu e Ia le talalelei. Na fafagaina e Ia motu o tagata fia aai. Na mulumulu e Ia vae o Ona soo. Na faamalolo e Ia e mamai ma faapea foi ona faatu mai e na oti.

Na aoao mai e Iesu le taua o le auauna atu. A oo ina toe afio mai o Ia i le lalolagi, o le a Ia fetalai atu i e amiotonu: “Aua na ou fia ai, ona outou avane ai lea ni mea ou te ai ai: na ou fia inu, ona outou avane ai lea ni vai ou te inu ai: sa fai a’u ma tagata ese, ona outou talia lea o a’u: na ou le lavalava, ona outou faaofuina lea o a’u: na ou ma’i, ona outou asiasia mai lea o a’u: na ou i le fale puipui, ona outou o ane ai lea ia te a’u” (Mataio 25:35–36).

Na fetalai mai Iesu o le a le manatuaina e e amiotonu lo latou faia o soo se mea o na mea mo Ia. O le a Ia fetalai atu ia i latou, “Aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:40). Afai tatou te auauna atu o le tasi i le isi, o loo tatou auauna atu foi ia te Ia.

E mafai ona e auauna i le Alii e ala i le auauna atu i e o loo siomia oe. E le manaomia lou faia o se mea tele e auauna atu ai i isi. O se laufofoga ataata e mafai ona faafiafiaina ai se loto o se uo. O le tautala atu i upu alofa, o le fesoasoani atu i se uso po o se tuafafine, o le usitai i ou matua—o auala uma lava ia e mafai ona e auauna atu ai. A tatou naunau e auauna atu, e avea atili ai i tatou e faapei o Keriso, ma e tupu ai lo tatou faatuatua.

Gaoioiga

Faapipii le itulau U4 i luga o se pepa malo. Oti ese vaega e iva. Faapu pito o loo faailoga. Faaaoga se vulu po o se manoa, nonoa se lave i le pu i le pito i luga o le ata o le Faaola. Faaaoga se isi fasi manoa e sosoo ai le pito i lalo o le ata o le Faaola i le mau. Faaaoga nisi fasi manoa se fitu, nonoa ata taitasi o gaoioiga auauna atu i le pito i lalo o le ata o i luga. Faatautau lau ata i se mea o le a faamanatu atu ai ia te oe a oo ina e auauna atu i isi, o loo e auauna atu foi ia Iesu Keriso.

Manatu Faaopoopo mo Taimi o Fetufaaiga

1. Faamatala le tala i le aufana na gau a Nifae (tagai 1 Nifae 16:18–32) i le faaaoga o se ato e tuu ai aū. E mafai ona e tusiina se ata o le ato ma aū i luga o le laupapa pe faaaoga pepa e fai ai. I luga o aū taitasi, faapipii i ai se fesili. Mo se faataitaiga, tusi “O ai na fesili i ai Nifae mo se taitaiga i le mea e fanafana ai?” (o lona tama o Liae) ma “O le a le mea na faia e Nifae i le meaai na ia maua?” (faasoa atu i lona aiga). I luga o aū taitasi, tusi ai se upu e fesootai ma le fesili, e pei o le usiusitai po o le fetufaai. A maea ona taliina uma fesili, tusi lou lima i aū taitasi, ma fai atu i tamaiti pe faapefea ona faaaoga le amioga o loo tusia i luga o aū e faamanuiaina ai o latou aiga. Talosaga atu e tuuina mai ni faataitaiga patino e pei o le “E mafai ona ou fesoasoani i lo’u tama e fai le meaai o le aoauli.” Faasoa atu se aafiaga pe na faapefea ona faamanuiaina oe i se auaunaga a se tasi o lou aiga.
2. Alu atu i le potu a o e ofuina se talieleele ma sii mai se apa mafolafola lautele o loo ufiufi i se solo. Fai i tamaiti e te manao e te auauna atu ia i latou. Fai i ai e sue le Kalatia 5:13–14. Fesoasoani ia i latou e tusi se laina i lalo o upu, “Ia outou auauna le tasi i le tasi i le alofa,” ma, “Ia e alofa atu i le lua te tuaoi, ia pei o oe lava ia te oe.” I luga o le apa mafolafola lautele, ia i ai ni mau eseese, ata o auaunaga, po o upusii mai tala o le a e faamatala atu. Atonu e te aumai ni tamai ipu faiau e i ai mau i tua, o se ata o le auauna atu i luga o le ipu mafolafola, po o upusii ua faapipii i tui ma sipuni. A maea ona filifilia e tamaiti taitasi se aitema ma tilotilo i ai ma faitau, fai i ai e faasoa mai se mea na latou aoaoina mai. Faamatala atu tala o auaunaga. E mafai ona e faasoa atu tala mai le Liahona.