Iloaina o le Faaola
Sa matou nofonofo ma ni uo i se laulau i le faleaiga o le matou aoga tulagalua ina ua talanoaina le mataupu o le Toe Afio Mai o Keriso. E le ni tagata lolotu tele a’u uo, ae ua lava lava ni nai taimi na lolotu ai e faalogo ai e uiga i le fuafuaga valoia. Na latou iloa foi ou te toaga i le lotu ma na mautu lo’u talitonuga i le Faaola.
Na matou talanoa e uiga [i lea mataupu] i ai mo sina taimi, ma o le tali ai i a latou fesili na ou faapea atu ai ia i latou e le iloa tino lava e se tasi po o afea e toe afio mai ai Keriso. Na liliu mai se tasi o a’u uo ia te a’u ma fai mai ma le faamaoni lava, “Jade, afai e vave ona oo mai le Toe Afio Mai ma afio mai Iesu Keriso, atonu o le a ou le iloaina o Ia. Pe e te faasino maia o Ia ia te au?”
O lea na ou fai atu ai ia te ia o le a ou faia lea, ma amata loa ona matou talanoa i isi mea.
Atonu e lei toe mafaufau lava a’u uo i lena talanoaga, ae sa ou mafaufau i ai i le tele o taimi. E faavae i luga o mea ou te tautala ai ma ou faia, na faapea ai a’u uo ou te iloa le Faaola. O le mea moni na faamoemoe i latou ia te a’u ou te iloaina o Ia! Ae ou te iloa moni ea o Ia? E mafai ea ona ou talia i le ioe le fesili a Alema, “Po ua outou maua ea Lona foliga i o outou mata” (Alema 5:14)?
O lena fesili na soona fesiligia e a’u uo ua mafua ai ona ou iloiloina la’u fesootaiga ma le Faaola i le tele o taimi. Mo se faataitaiga, o loloto ea le aoga o a’u tatalo ma suesuega o tusitusiga paia ou te latalata atili ai ia te Ia? Ou te faamoemoe o loo faapena. Ma ou te faamoemoe a oo i le aso e afio mai ai Keriso, e mafai ona ou tulai i Ona luma ma se loto mama ma lima mama. Ona le gata lea ina o le a faigofie ona ou iloa o Ia, ae o le a Ia iloa foi a’u aua o le a vaaia Ona fofoga i o’u mata (tagai Alema 5:19).