Savali a Faiaoga Asiasi

Ia Avea ma Tufugaaao o le Atua e Ala i le Tasi o Loto ma Manatu

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia i latou o loo e aoaoina ia faapena foi ona fai.

O Le a le Uiga o le Tasi o Loto ma Manatu?

1 Korinito 12:20, 27: “O lenei e lasi itu tino, a e tasi lava le tino ia… . A o outou o le tino o Keriso outou, ma itu tino taitoatasi.”

Peresitene Gordon B. Hinckley: “Ua fetalai mai le Alii afai e le tasi outou e le a a’u outou (Tagai MFF 38:27.) O lenei uiga lotogatasi o se faailoga o le ekalesia moni a Keriso. Ua lagonaina e o tatou tagata i le lalolagi atoa. I le tasi ai o i tatou, ua ā Ia i tatou … E tatalo le tasi mo le isi ina ia tatou agai i luma i le lotogatasi ma le malosi. Afai tatou te faia lea, e leai se mana i lalo ifo o le lagi e mafai ona taofia le alualu i luma o lenei malo maoae” (“Except Ye Are One,” Ensign, Nov. 1983, 5).

Peresitene Marion G. Romney (1897–1988), Fesoasoani Muamua i le Au Peresitene Sili: “O le misiona a le Ekalesia i lenei augatupulaga faaiu o le faatupuina o se isi nuu o e o le a ola i le talalelei i lona atoatoa. O lenei nuu o le a avea ma e ‘loto mama,’ ma o le a avea i latou … ma nuu o le Alii. O le a savavali i latou ma le Atua aua o le a tasi lo latou loto ma lo latou manatu, ma o le a latou ola i le amiotonu, ma o le a leai foi se tasi o i latou e mativa” (“O Le Ola E Tusa Ai Ma Mataupu O Le Uelefea,” Liahona, Ianuari 1982, 178).

E Faapefea Ona Fesoasoani Le Tauivi e Avea ma Loto e Tasi ma Manatu e Tasi e Avea Ai A’u ma Tufugaaao Sili Atu o le Atua?

Elder D. Todd Christofferson o le Au Peresitene o Fitugafulu: “Ua tatau ona amata loa ona tasi i tatou i totonu ia i tatou lava. O i tatou o ni tagata vaavaalua o le tino ma le agaga, ma o nisi taimi tatou te lagona ai le le lotogatasi po o le feteenai… . A o tatou taumafai i aso taitasi ma vaiaso taitasi e mulimuli i le ala o Keriso, e tulai mai le tulaga maualuga o o tatou agaga, e faaumatia ai le feteenaiga i totonu, ma te’a ai le faalavelave mai o faaosoosoga. O le a matua faateleina le filemu i le va o le faaleagaga ma le faaletino seia oo ina suia o tatou tino faaletino … e avea ma tufugaaao o le amiotonu i le Atua (tagai Roma 6:13)” (“Ina ia Tasi i Latou ia i Tatou,” Liahona, Nov. 2002, 71–72).

Kathleen H. Hughes, sa avea muamua ma fesoasoani muamua i le au peresitene aoao o le Aualofa: “E manaomia e [le Alii] ‘le loto ma le mafaufau matala’ (MFF 64:34; ua faatusilima mea e faamamafa)… . Ua talosaga mai le Alii ia i tatou ia tatala atu i tatou lava ia te Ia, i mea uma. Ua fetalai mai o Ia ia i tatou, aua nei sailia ‘lou lava ola’, a ua e sailia lo’u loto, ina ia e tausia a’u poloaiga’ (Helamana 10:4). E oo mai le faafouina o le loto pe a tatou faia ma tuuina atu mea uma tatou te mafaia, ona tuuina atu lea o o tatou loto ma manao i le Tama” (“Mai Mea Iti,” Liahona, Nov. 2004, 111).

Elder Neal A. Maxwell (1926–2004) o le Korama a Aposetolo e Toasefululua: “O le usitai faaleagaga o lona uiga … e lotogatasi le nuu o le Ekalesia ma le fesootaiga ma le Atua e pei o le mafaufau ma le loto. Ona matua itiiti ai lea o le taimi e faaalu i le filifiliina, ae faaalu le tele o le taimi i le auauna atu… . O le tuuina atu o le loto o se tasi i le Atua o le faailoga o le laasaga mulimuli i lo tatou tuputupu ae faaleagaga. Pau lava lea o le taimi e amata ai ona atoatoa lo tatou aoga i le Atua! E faapefea ona tatou tatalo faamaoni e avea ma tufuga i Ona aao pe afai o loo saili le tufuga sei fai atu e ia le faatonuga?” (“Naunautai e Usitai,” Ensign, Me 1985, 71).