Na E Iloaina?

Manatu mo Tusi o Talaaga

Afai o loo faigata ia te oe ona maua ni mataupu e tusi i lau tusi o talaaga, amata i mea nei: “O le mea muamua e mafai ona ou manatuaina e uiga i lo’u laitiiti o le …” po o le “O le mea sili ona ou manatuaina e uiga i le aoga o le …” po o le “O se aafiaga faaleagaga na maua lata mai nei o le …”

Na saunoa mai Peresitene Spencer W. Kimball (1895–1985): “Ia avane nei se tamaitusi, lau fanau talavou e, se tusi o le a tumau e faavavau, ma atonu e mafai e agelu ona faitau mai ai mo le faavavau. Amata nei lona ona tusia ai au femalagaaiga, ou manatu e sili ona loloto, mea ua lelei ona faataunuuina ma mea e le’i lelei ona faataunuuina, au fegalegaleaiga ma mea na e faatoilaloina, ma na faagaeetia ai oe ma au molimau” (“E Mafai e Agelu Ona Faitau mai Ai,” Liahona, Iuni 1977, 17).

Motugaafa Faaleautaitai

Na saunoa Peresitene Tavita O. MaKei (1873–1970), le Peresitene lona iva o le Ekalesia e faatatau i ni uiga e faaalia ai se taitai po o se faiaoga faamanuiaina:

“Faatuatua atoatoa i le talalelei a Iesu Keriso o le malamalama o le lalolagi, ma se naunautaiga faamaoni e auauna ia te Ia. O lenei tulaga o le agaga o le a avanoa ai mo le mafutaga ma le taitaiga a le Agaga Paia.”
“Alofa faamaoni mo … tagata o le Ekalesia, e taitaiina e le naunautai e taulimaina faamaoni ma le tonu ia tagata taitoatasi o le Ekalesia. Faamamaluina le … tagata, ma o le a … faamamaluina e le tagata oe.”
“Sauniuniga atoatoa. E iloa e le taitai faamanuiaina ana matafaioi ma ona tiutetauave faapea foi ma tagata e i lalo o lana taitaiga.”
“Laufofoga fiafia—e le tau faamalosia ae o le laufofoga fiafia faanatura, e tupu fua lava mai i se agaga e tumu i faamoemoega.” (In Conference Report, Oke. 1968, 144.)

I se Upu

Oti faaleagaga: O le oti faaleagaga o le vavae ese lea mai le Atua. E lua mafuaaga o le oti faaleagaga: o le Pa’ū ma lo tatou lava le usiusitai.

“Aua ua pei ua oti tagata uma lava i mea faalelalolagi atoa ma mea faalelagi ona o le solitulafono a Atamu, aua ua vavaeeseina ai i latou ai luma o le Atua” (Helamana 14:16). I lo tatou olaga i le lalolagi, ua vavaeeseina i tatou mai luma o le Atua. E ala i le Togiola, ua togiolaina e Iesu Keriso tagata uma mai lenei oti faaleagaga. “E togiolaina tagata uma i le toe tu mai o Keriso, ioe, o tagata uma lava, ma toe aumaia i latou i luma o le Atua” (Helamana 14:17).

E oo mai le isi oti faaleagaga o se taunuuga o a tatou agasala e eleelea ai i tatou ma le mafai ai ona nonofo i luma o le Atua (tagai Helamana 14:18). Ua ofoina mai e le Faaola le togiola mai le oti faaleagaga, (tagai Helamana 14:19). (Tagai Faamaoni i le Faatuatua [2004] “Oti, Faaleagaga,” 121)

“Vagana ua atoatoa ona outou feagai ma ola i le talalelei—ola ai ma o outou ‘loto atoa, ma mafaufau atoa, manatu atoa ma le malosi atoa’ (MFF 4:2)—e le mafai ona lava le malamalama faaleagaga e te faatupuina e tetee atu ai i le pouliuli.”

Elder Robert D. Hales o le Korama a Aposetolo e Toasefululua, “Nai le Pouliuli i Lona Lava Malamalama e Matua Ofo Ai,” Liahona, Iulai 2002, 77.