Tele ma Tele o Ataata
“Ia faia uma a outou mea i le alofa” (1 Korinito 16:14).
E faavae i se tala moni
Na matamata Marcus i le gapapa o le afi o le tolauapiga a o faalogologo o ia i le lesona a lona tama. “E tatau ona tatou mulimuli i faataitaiga a Iesu Keriso ina ia tatou fiafia ai,“ o le tala lea a Papa i le aiga. Na nonofo i latou i luga o se ogalaau e siosio le afi. “E matua taua le faaali atu e i tatou taitoatasi o le alofa o le tasi i le isi,” na ia fai mai ai.
“O le a le uiga o le alofa, Papa?” o le fesili lea a Marcus.
Na faaopoopo e Papa nisi fafie i le afi. “O le alofa o le alofa mama lea o Keriso,” o lana faamalamalamaga lea. “E le mafai ona faasaoina tatou i le malo o le Atua e aunoa ma le alofa mama.”
Na foliga le mautonu Marcus. Na tilotilo Papa i tagata taitoatasi o lona aiga ma fesili atu, “E mafai e outou taitoatasi ona mafaufau i se faataitaiga o le alofa mama, e fesoasoani ai ia Marcus ia malamalama lelei i lona uiga?”
Na liuliu e Mama se masimelo i luga o le afi i se fasilaau. “Ina ua pau le Faletua o Clanton ma lavea ai lona vae, na ou alu ou fesoasoani i ai e fai feau i lona fale,” o lana tala lea.
Na faamatala e Tanner lana fesoasoaniga i le korama a tiakono e ao mai meaai ma lavalava mo ni tagata matitiva ma leai ni aiga o le aai.
Na faauo e Ashley se teine o le latou tuaoi na le amanaia e isi teineiti.
“Na fesoasoani Tama e faalelei le taualuga o le fale o le Toeaina o Johnson ona e fealuai le Toeaina o Johnson i le nofoa faataavalevale,” o le tala lea a Tina.
“E taulia le tausiga o Jo-Jo?” o le fesili lea a Marcus. O Jo-Jo o lana tamai isumu fagafao. “Ou te tago fafaga ma sui lana vai ma ave i ai se totini fou mo lona moega.” Na u e Marcus lana masimelo panunununu.
“Soo se ituaiga uiga agalelei po o se auaunaga lava tatou te faia mo se isi—e aofia ai ma Jo-Jo—o le alofa lena,” o le tala lea a Tama.
“Ou te manao e faia ni mea mo se isi e matua atu nai lo Jo-Jo, e pei ona faia e oe ma Tina ma Tanner ma Ashley,” o le tala lea a Marcus. “Ae ou te matea ou te laitiiti tele.”
“E le faapea seiloga e te matua ona mafai lea ona e fesoasoani i se isi, a ea, Marcus?” o le fesili lea a Papa. “Pe taliaina foi au tatalo?”
Na ataata Marcus, “Leai.”
“Aisea e te le fesili ai i le Tama Faalelagi e fesoasoani mai ia te oe ia maua se tasi e mafai ona e fesoasoani atu i ai, ma le taimi sa’o e fai ai, o le a e iloa lava.”
“E faapefea ona ou iloa?” o le fesili lea a Marcus.
Na aapa atu Ashley ma soloi le masimelo sa pipii i le gutu o Marcus. “O le a loloto i totonu ia te oe lou lagonaina e pei lava o le masimelo lena na e aia,” o lana tala lea.
Mulimuli ane i lena po, na faapupuu Marcus i totonu o lana ato moe. Na faalogologo i lala laau o loo oloia ai fafo o le faleie. “Tama Faalelagi, faamolemole fesoasoani mai ia te a’u ia maua se isi ou te fesoasoani i ai,” o lana tatalo lea. “O a’u ua na o se tamaitiiti e laitiiti, ae fai mai Papa e le faapea seiloga ou te matua ona mafai lea ona ou agalelei pe feasoasoani atu i isi. Ou te fesoasoani ia Jo-Jo ma lo’u aiga i lo’u agalelei lea ma le faia o a’u feau, ae ou te manao e faia se mea mo se isi tagata. Na fesoasoani Iesu i le toatele o tagata, ma ou te fia pei o Ia.”
I le aoauli o se tasi Aso Toonai i le lua vaiaso mulimuli ane, na galue ai Marcus i talaane o lona tina i lo latou togalaau. Na ia iloa atu lona tuaoi o loo nofonofo na o ia i lana taupega i luma o le fale. Na foliga faanoanoa o ia. “Tina, o le a le mea ua tupu i si olomatua o Walton?” o le fesili lea a Marcus.
Na tu sao Tina lea sa punou i luga o fugalaau ma tilotilo atu i lo latou tuaoi. “Ua toeitiiti atoa le tausaga talu ona maliu le Toeaina o Walton. O nisi aso e faigata tele ia te ia, ma e foliga mai o nei o se tasi o na aso.”
Na tu i luga Marcus ma tilotilo atu i le olomatua o Walton mai le pa aute maualalo lea e vaelua ai o latou fanua. Na lagona e ia se lagona loloto lava i totonu. Na faasolo ina tele ma mafanafana e pei lava o le afi o le tolauapiga ina ua faaopoopo i ai e lona tama ia fafie. “E mafai ona ou tauina se tasi o fugalaau samasama tele ma avatu i si olomatua o Walton?” o le fesili lea a Marcus.
Na ataata Mama ma luelue lona ulu.
E lei umi ae tu Marcus i luma o Tinā Walton. Na faateia o ia. Na tuu atu e Marcus le fugalaau ia te ia. “O le fugalaau lea mo oe,” o lana tala lea.
Na tago o ia i le fugalaau ona tilotilo lea ia Marcus. Na a’e Marcus i le taupega ma nofo i ona tafatafa. E leai sana tala na faia. Sa na o le ataata lava. Na po po e Tinā Walton le lima o Marcus, ona la nofonofo faatasi ai lea iina ma faalogologo i pese a manulele mumu e lua i luga o lona laau. Ona toe tilotilo foi lea o Tinā Walton ia Marcus. O loo foliga ataata pea Marcus.
“E matuai tele naua au ataata,” o lana tala lea. “Na e iloa lena mea?” Na ataata pea Marcus. “Na oo mai ou foliga ataata i le taimi ua ou matuai manaomiaina ai lava. Faafetai lava.”
I le po lena na tuu e Marcus ni fasi pa’u laau i le pa o lana fagafao a o lei alu e moe. “Jo-Jo, o le aso lenei na ma galulue ai ma Mama i le togalaau, ma na ou fesoasoani e faafiafia ia Tinā Walton. Na faafiafiaina ai foi a’u. E le manaomia ona ou matua ou te fesoasoani ai i isi. Ua mafai i le taimi lava lenei ona faapei a’u o Iesu.”
“E mafai ona tatou faasoa atu le alofa o Keriso e ala i auaunaga faatauvaa.”
Elder M. Russell Ballard o le Korama a Aposetolo e Toasefululua, “O Le Lima o le Faaaumea,” Liahona, Ian. 1989, 30.