Uo i le Uo

O Se Loli e Tumu i Tagata o le Au Paia

Mai se faatalanoaga ma Elder Benjamín De Hoyos o le Korama a le Au Fitugafulu, o loo auauna atu nei i le Eria i Matu a Amerika i Saute; saunia e Melvin Leavitt, Mekasini a le Ekalesia

“Ia e ulu atu i le fale tatalo ma avatu ai au faamanatuga i lo’u aso paia” (MFF 59:9).

Na ou ola ae i Monterrey, Mekisiko, i le setete o Nuevo León. O o’u matua o ni tagata faamaoni o le Au Paia o Aso e Gata Ai, ma ou te le manatuaina se taimi e tasi na matou le auai ai i le lotu. Ina ua lima pe ono o’u tausaga, na i ai i lo’u tama se loli pusa sasaa na ia faaaogaina e la’u ai mea faufale ma palapala mo faatoaga. I Aso Sa uma na matou feaei ai ma o’u tuafafine i luga o lena loli ae feaei lo’u tama ma lo’u tina i luma. Ona matou tietie lea i le fale o o’u tausoga, lea foi e feaei mai ai lo latou aiga i luga o le loli. Ona matou o lea e piki le aiga o Gonzales, sosoo ai ma le aiga o Solanos, ma faasolo ai lava faapena. E oo ane i le taimi matou te taunuu ai i le falesa, ua le tumu le loli pusa sasaa i palapala ae tumu i le Au Paia.

O nisi tagata e nonofo latalata ane e manatu latou o se mea mataina le matamata atu i le sili atu ma le 20 alii, tamaitai, ma tamaiti i laei papae ma fusiua po o ofu lotu o loo o mai i lalo mai se loli pusa sasaa palapalā. Na o mai i fafo tuaoi i Aso Sa taitasi tau lava ina faafiafiaina i lea mea mataina. Na latou toē mai ia i matou, ae matou te le’i maasiasi ai. Na matou fiafia ua mafai ona matou o i le lotu. Na faalua i Aso Sa taitasi ona matou faia lena tulaga mai le 1960 i le 1970.

A le avanoa le loli, ona savavali lea o le matou aiga. E tusa lava pe timuga pe malulu pe aasa le la, na matou savavali pea, e ui lava e siliga i le itula le alu ma le itula le toe foi mai. O aso foi na sa fai sauniga a le Ekalesia i le taeao ma le afiafi. Na matou auai i sauniga uma i aso uma.

Ou te toe foi atu i Monterrey ina ua mavae le tele o tausaga, o loo toaaga pea i le Ekalesia le pasese uma lava a le loli pusa sasaa. Na fusia faatasi i matou i lena aafiaga ma faamalolosia ai i matou. O loo ou auai i a’u sauniga uma lava. E faapefea ona itiiti mea ou te faia nei nai lo le taimi lena?

Tamaiti, o i a outou sauniga lotu. Savavali. O i taavale. O i se loli pusa sasaa. A ia outou o.