Faamanuiaina i Galuega Faatino o Vai ia Nuu e 15 o Meleisia

E sefululima nuu o Meleisia i le eria taumamao o Simunjan Junction i Sarawak, ua i ai nei se sapalai lelei o vai mama, e faafetaia ai le fesoasoani mai Galuega Alofa a le Au Paia o Aso e Gata Ai (LDSC), o se vaega o fesoasoaniga alofa a le Ekalesia.

I le faaaogaina o sapalai na saunia e le LDSC, na galulue faatasi ai le tusa o le 100 tagata o le nuu, tagata matutua ma talavou e faatele se faatanoa ma ta’i se paipa e tolu inisi le lautele e oo atu ai le suavai i nuu i lenei eria, pe a ma le lua masina.

“E faigofie ona manatu māmā i le suavai mama,” o le saunoaga lea a George Mak, o le sooupu a le Ekalesia o loo faamautu i Hong Kong o le ua molimauina le tele o ia ituaiga o galuega faatino i le atu Asia. “Ae a faia se faatanoa po o se vaieli po o se isi sapalai i se nuu, … o se tulaga ootia i le vaai.”

I aso la a o maua le vai mama, sa tele lava ina le lava se suavai, ma sa na o nofoaga mamao foi na maua ai. O le mauaina o le vai e aluese ai se tagata mai lona aiga ma le galuega, ma o ese ai tamaiti mai a latou vasega mo ni itula i taimi taitasi.

O galuega faatino o fesoasoaniga alofa na lagolagoina e le Ekalesia o loo uunaia ai le auai o tagata i le lotoifale pe a mafai. O le faamamafa o loo tuuina atu lea i le fesoasoani i tagata ina ia fesoasoani ia i latou lava ma ia sili atu ona faalagolago le tagata ia te ia lava.

I se sauniga e faailoga ai le faamaeaina o le galuega faatino, na faaalia ai le agaga faafetai o le taitai o le alaalafaga o Taitai Augustine ia i latou uma o e na fesoasoani e aumaia le vai manino i ona tagata. Sa ia faapea mai “Na o le lagi o loo silafia le ala o le a mafai ai ona matou faapea atu ai, faafetai.”

O isi tagata o le nuu ma malo valaaulia na saunoa i le sauniga na aofia ai Jimmy Donald, o se sui o le Palemene o le Malo o Meleisia.

Sa faia le sauniga e latalata i le faatanoa o loo amata ta’i mai ai paipa. Sa masani lava o lenei vaega o le nuu, e oo atu i ai pe a a’ea laufanua gaoa, ae na asaina e tagata o le nuu ma faatulaga se auala i le vaomatua. Na aofia ai le fausiaina o ni alalaupapa ofe na sai i lima a e sopoia ai ni vanu va iti matautia mo le saogalemu o tagata asiasi.

Ina ua maea le sauniga, na ki e taitai le ki ma mafai ai ona tafe atu le vai i se faatanoa laitiiti.