E Faapefea ona Maua ia Faaaliga ma Musumusuga mo Lou Olaga Patino
Saunia e Elder Elder Richard G. Scott
O Le Korama a Aposetolo e Toasefululua
Aisea e finagalo ai le Alii ia tatou tatalo ma ole atu ia te Ia? Aua o le auala lena e maua ai faaaliga.
Soo se tasi e tu atu i lenei pulelaa e tuuina atu se savali e lagonaina le malosi ma le lagolago a tagata o le ekalesia i le lalolagi atoa. Ou te faafetai lava aua e mafai foi ona maua mai lena lava lagolago mai se soa faapelepele o i le isi itu o le veli. Faafetai lava, Jeanene.
E fesootai mai e le Agaga Paia ia faamatalaga taua tatou te manaomia e taiala ai i tatou i la tatou malaga o le olaga faaletino. Pe a tulaga ese ma manino ma taua lea faamatalaga, ua onomea ai loa le ulutala o faaaliga. Pe a avea ma se soloaiga o uunaiga, e tele lava ina tatou faia e taiala ai i tatou i lea laasaga ma lea laasaga i se faamoemoega agavaa, mo le faamoemoega o lenei savali, o se musumusuga.
O se faataitaiga o faaaliga o le faatonuga lea na maua e Peresitene Spencer W. Kimball ina ua mavae se taimi umi o ana aioiga faifai pea i le Alii e faatatau i le tuuina atu o le perisitua i alii agavaa uma i le Ekalesia i le taimi lea sa na o nisi o i latou sa mauaina.
O se isi faataitaiga o faaaliga i le taiala lenei na tuuina atu ia Peresitene Iosefa F. Samita: “Ou te talitonu tatou te agai atu ma tuu o tatou tagata i le mea o i ai ia avefeau faalelagi ma tagata faalelagi. E le o vavaeeseina i tatou mai ia i latou. … Tatou te felata’i i o tatou ituaiga, i o tatou tuaa, … o e ua muamua atu ia i tatou i le lalolagi o agaga. E le mafai ona tatou faagaloina i latou; e le mafai ona taofi lo tatou alolofa ia i latou; tatou te teumalu pea i latou i o tatou loto, ma manatua pea, ma o lea tatou te fesootai ai ma tuufaatasia ma i latou i noanoa e le mafai ona tatou motusiaina. … Afai o le mea lea i lo tulaga faaletino, siosiomia i o tatou vaivaiga faaletagata, … o le a se isi tele o le mautinoa … e talitonu ai o i latou o e faamaoni, ua maliliu … e mafai ona iloa lelei atili i tatou nai lo le mafai ona tatou iloaina o i latou; latou te iloa i tatou e sili atu nai lo le tatou iloaina o i latou. … O loo tatou ola faatasi ma i latou, latou te iloaina i tatou, o loo latou popole mo lo tatou tulaga manuia, latou te alolofa ia i tatou i le taimi nei nai lo se isi lava taimi. Mo le taimi nei ua latou vaaia tulaga lamatia ua luitauina ai i tatou; … o lo latou alolofa mo i tatou ma lo latou mananao mo lo tatou tulaga manuia e ao ona sili atu nai lo mea tatou te lagonaina mo i tatou lava.”1
E mafai ona faamalolosia ia sootaga e ala mai i tagata o i le isi itu o le veli tatou te iloaina ma alolofa i ai. E faia lena mea e ala i a tatou taumafaiga ma le naunautai e fai pea lava pea le mea sa’o. E mafai ona faamalosia la tatou sootaga ma le tagata ua maliu tatou te alolofa i ai e ala i le iloaina o le valavala ai e lē tumau ae o feagaiga e osia i le malumalu e faavavau. Pe a usitaia i taimi uma, o ia feagaiga e faamautinoa mai ai le faataunuuina o folafolaga o loo i ai.
E tasi se tulaga manino tele o faaaliga i lo’u lava olaga na tupu ina ua uunaia malosi lava au e le Agaga e talosagaina ia Jeanene Watkins ina ia faamau ia te au i le malumalu.
O se tasi o lesona sili lea e manaomia ona aoaoina e i tatou taitoatasi, o le ole atu lea. Aisea e finagalo ai le Alii ia tatou tatalo ma ole atu ia te Ia? Aua o le auala lena e maua ai faaaliga.
Pe a ou fetaiai ma se mataupu faigata tele, o le auala lea ou te taumafai ai e malamalama i le mea e fai. Ou te anapogi. Ou te tatalo ia maua ma malamalama i mau ia o le a aoga. O lena faagasologa o se taamilosaga. E amata ona ou faitauina se mau mai tusitusiga paia; ou te mafaufau loloto i le uiga o le fuaiupu ma tatalo mo se musumusuga. Ona ou mafaufau loloto lea ma tatalo ia iloa pe ua ou mauaina uma mea ua finagalo le Alii ou te faia. E tele lava ina oo mai uunaiga faatasi ma se malamalama faateleina o aoaoga faavae. Ua ou iloaina lena mamanu o se auala lelei lea e aoao ai mai tusitusiga paia.
O loo i ai ni mataupu faavae aoga e faateleina ai ia faaaliga. Muamua, o le usitaia o na lagona e pei o le ita po o le tiga po o le faatautee o le a tuliesea ai le Agaga Paia. E ao ina aveesea na lagona, a leai o le a itiiti lava se avanoa mo faaaliga.
O le isi mataupu faavae ia faaeteete i ai o uiga malie. O le ‘ata leoleoa lē talafeagai o le a faatiga ai i le Agaga. O se uiga malie lelei e fesoasoani lea i faaaliga; ae o le ata leoleoa e leai. O se uiga malie o se ki lea e faasopoloa ai atugaluga o le olaga.
O le isi fili o faaaliga e sau mai faamatalaga soona lafo po o le soona leoleoa a o tautala. O le tautala atu ma le mālū ma le faaeteete o le a lelei atili ai le mauaina o faaaliga.
I le isi itu, e mafai ona faaleleia ia fesootaiga faaleagaga e ala i le lelei o gaoioiga faalesoifua maloloina. O le faamalositino, o le lava o le moe, ma le mausa lelei o le tausami e faateleina ai lo tatou malosi e maua ai ma malamalama i faaaliga. O le a tatou ola mo o tatou aso atofaina o le olaga. Ae peitai, e mafai ona faaleleia uma le tulaga lelei o a tatou auaunaga ma o tatou lava tulaga lelei faaletagata e ala i le faia o filifiliga talafeagai ma le faaeteete.
E taua le aua nei avea a tatou gaoioiga o aso uma e faalavelave ia i tatou mai le faalogo atu i le Agaga.
E mafai foi ona oo mai se faaaliga i se miti pe a i ai lava se fesuiaiga e toetoe ina a lē iloaina mai le moe i le tei valevale. A e taumafai e pueina vave le uiga, e mafai ona e faamaumauina ni auiliiliga sili, ae a leai e vave lava ona mou atu. O fesootaiga musuia i le po e masani lava ona o mai faatasi ma se lagona paia mo le aafiaga atoa lava. E faaaogaina e le Alii ni tagata ia tatou te matua faaaloalogia e aoao maia upumoni ia i tatou i se miti ona tatou te faatuatuaina i latou ma o le a tatou faalogo i la latou fautuaga. O le Alii o loo faia le aoaoga e ala mai i le Agaga Paia. Peitai, e mafai ona Ia faia i se miti ia faafaigofie ai ona malamalama ma sili atu ai ona pa’i mai i o tatou loto e ala i le aoaoina o i tatou e auala mai i se tagata tatou te alolofa ma faaaloalo i ai.
Pe afai e mo faamoemoega o le Alii, e mafai ona Ia aumai soo se mea i lo tatou manatua. O lena manatu e le tatau ona faavaivaia ai lo tatou naunautaiga e faamaumau ni uunaiga a le Agaga. O uunaiga ua faamaumauina ma le faaeteete ua faaali atu ai i le Atua e paia Ana fesootaiga ma i tatou. O faamaumauga o le a faalelei ai foi lo tatou gafatia e toe manatua ai ia faaaliga. O ia faamaumauga o taitaiga a le Agaga e tatau ona puipuia mai le leiloloa po o le sagoleina e isi.
Ua tuu mai e tusitusiga paia ia faamatalaga faatauanau i le auala e tatala ai e upumoni, pe a ola ai pea, ia faitotoa i musumusuga e iloa ai mea e fai, ma le mea e manaomia ona maua ai le mana faalelagi e faaleleia ai le malosiaga o se tagata. Ua faaali mai e tusitusiga paia le auala na faamalosia ai e le Alii le malosiaga o se tagata e faatoilalo ai ia faigata, masalosaloga, ma luitau ua foliga mai ua matua lofituina i taimi o mafatiaga. A o e mafaufau loloto i na faataitaiga, o le a oo mai se faamautinoaga filemu e ala mai i le Agaga Paia e moni o latou aafiaga. O le a oo ina e iloa o loo avanoa foi lena lava fesoasoaniga e tasi mo oe.
Ua ou vaai i tagata o fetaiai ma luitau o e sa iloaina le mea e fai ina ua le gafataulimaina e lo latou malosi, aua sa latou faalagolago i le Alii ma sa iloa o le a Ia taialaina i latou i tali sa manaomia vave.
Sa folafola mai e le Alii: “Ma o le a aoaoina outou mai luga. Ia outou faapaia outou lava ma o le a faaeeina outou i le mana, ina ia mafai ona outou avatu e pei lava ona Ou tautala atu ai.”2 Atonu o upu faapaia outou lava e ono fenumiai. Sa faamalamalama mai e Peresitene Harold B. Lee ia te au e mafai ona e suia na upu i le fasifuaitau “tausi au poloaiga.” O le faitauina i le ala lena, e ono foliga manino atili ai le fautuaga.3
E tatau i se tagata ona mama faalemafaufau ma faaletino ma ia mama faamoemoega ina ia mafai ai ona musuia o ia e le Alii. O se tagata e usitai i Ana poloaiga ua faatuatuaina e le Alii. O lena tagata na te mauaina Ana musumusuga e iloa ai le mea e fai, ma a manaomiaina, e oo mai le mana po o le malosiaga faalelagi e fai ai.
Mo le tulaga faaleagaga ina ia tuputupu ae malosi atu ma sili ona avanoa, e ao ona totoina i se siosiomaga amiotonu. O le vaai maualalo, faamaualuga, ma le faasausili ua pei lava o vaega papa ia o le a le mafai ai lava ona fua mai ni fua faaleagaga.
O le lotomaualalo o se eleele lauusiusi lea e ola ae ai le faaleagaga ma fua mai ai fua o musumusuga e iloa ai le mea e fai. E maua ai le avanoa i le mana faalelagi e faataunuu ai mea e tatau ona fai. O se tagata e uunaia ona o se manao mo viiga po o le fiailoa o le a le agavaa ia aoaoina e le Agaga. O se tasi e faasausili, ma tuu ona lagona e uunaia faaiuga o le a le taitaiina i le mana e le Agaga.
Pe a tatou galulue o ni meafaigaluega e fai ma sui o isi, o le a faigofie atu ona musuia i tatou nai lo le tatou manatu mo na o i tatou lava. I le faagasologa o le fesoasoani atu i isi, e mafai ona fafao mai ai e le Alii ni faatonuga mo lo tatou manuia.
E le i tuuina mai i tatou e lo tatou Tama Faalelagi i le lalolagi ina ia toilalo ae ia faamanuiaina ma le mamalu. Atonu e foliga mai e feteenai, ae o le mafuaaga lena e faigata tele ai i nisi taimi ona iloaina ia tali i tatalo. O nisi taimi tatou te taumafai ai ma le leai o se atamai e faafetaiaia le olaga e ala i le faalagolago i lo tatou lava poto masani ma malosiaga. E sili atu lo tatou atamamai pe a tatou saili atu e ala i le tatalo ma musumusuga faalelagi e iloa ai le mea e fai. E faamautinoa mai e lo tatou usiusitai pe a manaomia, e mafai ona agavaa i tatou mo le mana faalelagi e ausia ai se faamoemoega musuia.
E pei lava o le toatele o i tatou, e le’i iloaina e Oliva Kaotui le faamaoniga o tali i tatalo ua uma ona tuuina atu e le Alii. Ina ia tatalaina ona mata, ma o tatou mata, na tuu mai ai lenei faaaliga na auala mai ia Iosefa Samita:
“Amuia oe ona o mea ua e faia; aua sa e ole mai ia te a’u, ma faauta, o le tele o taimi na e ole mai ai na e maua ai faatonuga mai lo’u Agaga. A na fai e le faapea, pe ua e le oo mai i le mea ua e i ai i le taimi nei.
“Faauta, ua e iloa na e ole mai ia te a’u ma sa Ou faapupulaina lou mafaufau; ma o lenei ua Ou ta’u atu ia te oe nei mea ina ia mafai ona e iloa ai sa faapupulaina oe e le Agaga o le upumoni.”4
Afai e te lagonaina e le’i tali atu le Atua i au tatalo, mafaufau loloto i mau nei—ona tagai lea ma le totoa mo ni faamaoniga i lou lava olaga atonu ua uma ona Ia tali atu ia te oe.
O faailoga e lua e iloa ai o se lagona po o se uunaiga ua sau mai le Atua, o le mauaina lea o le filemu i lou loto ma se lagona mafanafana o le filemu. A o e mulimuli i mataupu faavae sa ou talanoaina, o le a e saunia ina ia iloa faaaliga i taimi taua o lou lava olaga.
O lou latalata atili atu e mulimuli i le taitaiga faalelagi, o le sili atu foi lena o lou fiafia iinei ma le faavavau—ma le isi, o le a faateleina ai lou alualu i luma ma le malosiaga e auauna atu ai. Ou te le o malamalama atoatoa pe faapefea ona fai, ae o lena taitaiga o i lou olaga e le aveesea ai lou faitalia. E mafai ona e faia ni faaiuga e te filifili e fai. Ae ia manatua, o le naunautaiga e fai le mea sa’o e aumai ai le filemu o le mafaufau ma le fiafia.
A sese ni filifiliga, e mafai ona toe faaleleia e ala i le salamo. Pe a faamalieina uma ona tuutuuga, o le Togiola a Iesu Keriso, lo tatou Faaola, e maua ai se faasaolotoina mai iuga o le faamasinoga mo mea sese sa fai. E maofa lava i le faigofie ma le matagofie tele e le mafaatusaliaina. A o faaauau ai ona e ola amiotonu, o le a uunaia pea oe ia iloa le mea e fai. O nisi taimi o le iloaina pe o le a se faaiuga e fai e ono manaomia ai se taumafaiga taua ma le faatuatuaina mai lau vaega. Ae o le a uunaia oe e iloa le mea e fai a o e faamalieina ia tuutuuga mo sea taitaiga faalelagi i lou olaga, e i ai le usiusitai i poloaiga a le Alii, faalagolago i Lana fuafuaga paia o le fiafia, ma le aloese mai soo se mea e feteenai ma [Lana fuafuaga].
O le fesootaiga ma lo tatou Tama i le Lagi e le o se mataupu faatauvaa. O se avanoa paia. O loo faavae i luga o mataupu faavae le masuia e faavavau. Tatou te mauaina le fesoasoaniga mai lo tatou Tama i le Lagi mai tali i lo tatou faatuatua, usiusitai, ma le faaaogaina tatau o le faitalia.
Ia musuia outou e le Alii ia malamalama ma faaaoga ia mataupu faavae ia e taitai atu ai i faaaliga ma musumusuga faaletagata lava ia i le suafa o Iesu Keriso, amene.