Tau Lava o Mataupu Autu o le Amiotonu

Saunia e Elder Larry Y. Wilson

O Le Fitugafulu

O matua atamamai e saunia a latou fanau e ola e aunoa ma i latou. Latou te tuu atu ni avanoa mo le tuputupu ae a o mauaina e le fanau se tulaga faamatua faaleagaga e faatino ai lo latou faitalia ma le talafeagai.

Pe a ma le masina talu ona ma faaipoipo, ae ma malaga ma lou toalua i se malaga umi lava i le taavale. O ia sa avetaavale, ae sa ou taumafai e malolo. Ou te fai atu taumafai ona o le auala lautele lea sa ma malaga ai e i ai se talaaga mo ni mailei o le ave saoasaoa, ma atonu sa i ai sina matele laitiiti o lou toalua i le ave saoasaoa i na aso. Sa ou fai atu, “Ua saoasaoa tele lau alu. Alu lemu.”

Sa mafaufau si ou toalua fou ia te ia lava, “Ia, ua toeitiiti atoa le 10 tausaga talu ona ou aveave, ma e leai lava se tasi, e ese mai lo’u faiaoga ave taavale, ua ia faatonuina mai au i le auala ou te aveave ai.” Ma o lea sa ia tali mai ai, “O le a lau aia e faatonu ai au i le auala ou te aveave ai?”

O le mea moni, o lana fesili sa ou matuai ofo ai. O lea la, o le faia o le mea sili ou te mafaia e taulima ai lo’u tiutetauave fou o se tamaloa ua faaipoipo, sa ou fai atu ai, “ou te le iloa—ona o au o lou toalua ma o loo ou umia le perisitua.”

Uso e, na o se motugaafa faavavevave: afai e te oo i se tulaga faapena, e le o le tali sa’o lena. Ou te fiafia e lipoti atu, na o le pau lena o le taimi sa ou faia ai lena mea sese.

Ua faamalamalama mai i le Mataupu Faavae ma Feagaiga faapea o le aia tatau e faaaoga ai le perisitua i totonu o le aiga po o se isi lava nofoaga ua fesootai tonu lava ma le amiotonu i o tatou olaga: “O mana o le lagi e le mafai ona pulea pe faaaogaina tau lava i mataupu autu o le amiotonu.”¹ Na faaauau pea ona fai mai, e aveesea mai ia i tatou lena mana pe a tatou “faaaoga ai le pule po o le puleaga po o le faamalosi i luga o agaga o [isi], i soo se tikeri o le amioletonu.”²

Ua ta’u mai e lenei mau e tatau ona tatou taitai e ala i “mataupu autu o le amiotonu.” Ua faatatau ia ituaiga mataupu autu i taitai uma o le Ekalesia faapea ma tama ma tina uma o i o latou fale.³ E aveesea la tatou aia tatau i le Agaga o le Alii ma soo se pule na tatou maua mai le Alii pe a tatou pulea nisi tagata i se tulaga le amiotonu.⁴ Atonu tatou te manatu o ia metotia e mo le lelei o le tagata o loo “puleaina.” Peitai soo se taimi lava tatou te taumafai ai e faamalosi se tagata ia amiotonu, o se e mafai ma e tatau ona faaaoga lona lava faitalia lelei, ua tatou faia ma le le amiotonu. Pe a mautu ni faatapulaa mausali mo se isi tagata, o na faatapulaa e tatau i taimi uma ona faatautaia i le onosai ma le agaalofa ma i se ala lea e aoao atu ai ia mataupu faavae e faavavau.

E le mafai lava ona tatou faamalosia isi e fai le mea sao. Ua manino mai lava i tusitusiga paia e le o le ala lena a le Alii. O le fai faamalosi e fatufatuai ai le ita. E ta’u atu ai le le talitonuina, ma lagona ai e tagata le leai o se faamoemoe. E maumau avanoa e aoao ai pe afai e mafaufau ma le faamaualuga tagata o loo pule ua ia te i latou ia tali sa’o uma mo isi. Fai mai tusitusiga paia “o le natura ma le uiga o le toeitiiti lava o tagata uma” o le auai lea i lenei “puleaga le amiotonu,”⁵ ma e tatau ona tatou nofouta i ai o se mailei e faigofie ona pa’u atu i ai. E mafai foi e tamaitai ona faatino lea puleaga le amiotonu, e ui o loo faailoa mai i tusitusiga paia o lenei faafitauli e patino lava i alii.

O puleaga le amiotonu e masani lava ona o faatasi ma faitioga faisoo ma e taofia ai le lagolagosua po o le alofa atu. E lagona e i latou o i le itu e taliina ia mea, e le mafai lava ona latou faamalieina ia ituaiga o taitai po o matua ma o le a toilalo pea i latou. E tatau i matua ona mafaufau pe ua lava le matutua o fanau e amata ai ona faaaoga o latou lava faitalia i se vaega faapitoa o o latou olaga. Ae afai e uuina e matua le aia atoa e faia ai ni filifiliga ma manatu i ai o i latou e ana le “aia tatau,” ua latou faatapulaaina ma le saua le tuputupu ae ma le alualu i luma o a latou fanau.

E faatapulaa le taimi e i ai a tatou fanau i o tatou aiga. Afai tatou te faatalitali seia lē toe nonofo i o tatou fale ina ia faamatuu atu ai ia i latou le pule e faaaoga ai la latou filifiliga saoloto, ua tuai tele i tatou. E le mafai ona latou atiina ae faafuasei se tomai e faia ai ni filifiliga atamamai pe afai latou te le o saoloto lava e faia soo se filifiliga taua a o i totonu o o tatou fale. O ia fanau e masani lava a le o le tetee i lenei tulaga faamalosi pe ua faatapulaaina le le agavaa e faia ni filifiliga mo i latou lava.

Sa i ai se mea na tupu i lo matou aiga na matou aoao mai ai e uiga i le fesoasoani atu i le fanau ia atiina ae o latou tulaga gafatia e faia ai ni filifiliga. O le ma afafine o, Maria, o se tagata soka tulaga ese a o tuputupu ae. I se tasi tausaga na oo atu ai lana au i le suega siamupini ma, tou te silafia, o lena taaloga o le a faia i le Aso Sa. A o avea ai ma se talavou, e tele tausaga sa aoaoina ai Maria o le Sapati o se aso e malolo ai ma toe faamalosia ai faaleagaga, e le mo ni gaoioiga faafiafia. Ae sa ia lagonaina pea le uunaiga mai ana faiaoga ma le au ia taalo, faapea foi ma se naunautaiga ina ia aua nei ona faatoilaloina lana au.

Sa ia fesili mai ia i maua po o le a se mea e tatau ona ia fai. Na faigofie lava ona mafai ona ma faia ma lo’u toalua lena filifiliga mo ia. Ae peitai, sa ma filifili ina ua mavae ni feutagaiga ma le agaga tatalo, ua saunia i lenei taimi le ma tama teine e fai lana lava filifiliga. Sa matou faitauina faatasi ma ia ni mau, ma faamalosiau atu ia Maria e tatalo ma mafaufau i ai.

Ina ua mavae ni nai aso sa ia faailoa mai lana filifiliga. O le a ia taalo i le taaloga i le Aso Sa. O le a la le mea o le a ma faia? I le mavae ai o nisi talanoaga ma faamautinoaga na maua mai le Agaga, sa ma faia e pei ona ma folafola atu ma faataga o ia e faia lana filifiliga e taalo. Ina ua uma le taaloga, sa savali lemu mai Maria i lona tina o loo faatali atu. “Oi, Tina,” o lana tala lea, “e leaga lea lagona. Ou te le toe fia oo i lena lagona. Ou te le toe taalo lava i se isi taaloga i le aso Sapati.” Ma e na te lei toe faia lava.

Ua iloa nei e Maria mo ia lava le mataupu faavae o le faapaiaina o le Sapati. Pe ana ma faamalosia o ia e aua le taalo i le taaloga, semanu ma te taofia o ia mai se aafiaga taua ma le mamana faaleaoaoga ma le Agaga.

E pei ona outou tagai mai, o le fesoasoani i le fanau e faaaoga ma le tatau lo latou faitalia e manaomia ai le aoaoina o i latou i le auala e tatalo ma maua ai tali o a latou tatalo. E tatau foi ona i ai se aoaoga e faatatau i le tulaga faatauaina ma le faamoemoega o le usiusitai faapea foi ma le toetoe lava o isi mataupu faavae taua o le talalelei.⁶

O le tausiaina o lo ma aiga, sa ma filifili ai o la ma’ua sini e sili ona taua o le fesoasoani lea i le ma fanau e faatulaga a latou lava fesootaiga ma le lagi. Sa ma iloa e iu lava ina latou manaomia le faalagolago i le Alii, ae le o ma’ua. Na saunoa Polika Iaga, “Pe a ou faavasegaina ia tiute uma lava e manaomia mai … le fanauga a tagata, … ou te tuu le faamuamua ma le silisili o mea uma i le tiute o le saili … atu i le Alii lo tatou Atua seia tatou tatalaina le ala o fesootaiga mai le lagi i le lalolagi—mai le Atua i o tatou lava agaga.”⁷

Sa maua e Maria tali o ana tatalo faapea ma isi, i tulaga na muamua atu, ma o lea sa ma talitonuina ai sa atiina ae e lo ma afafine lenei ala o fesootaiga ma le lagi i lona olaga. O lea sa ia aoaoina ai se mea lelei mai lona aafiaga ma faaauupegaina ai o ia e fai ni filifiliga sili atu i le lumanai. A aunoa ma se sootaga i le Agaga, o le a mafai e fanau faapea matua ona faaufiufi ni filifiliga le lelei ma tuuaia faapea ona o le faatinoina o lo latou faitalia. O le folafolaga a le mau o loo faapea mai “o i latou o e e popoto … ma ua latou ave le Agaga Paia mo o latou taiala [ua le] faaseseina.”⁸

O se faaopoopoga ma se mea matautia e tupuga mai i le puleaga le amiotonu o le aveesea lea o le faalagolago i le alofa o le Atua. Na ou iloa nisi o tagata na aafia i lalo o se vaaiga a ni taitai po o ni matua faasaua ma pulepuletutu, ma sa faigata ia i latou ona lagonaina le alofa o lo latou Tama Faalelagi lea na tausia ma uunaia i latou i le ala o le amiotonu.

Afai o le a tatou fesoasoani atu i e o loo tausiaina ina ia faia se sootaga taua ma le lagi, e ao ona avea i tatou ma matua ma taitai o loo faamatalaina mai i le Mataupu Faavae ma Feagaiga vaega 121. E tatau ona tatou galulue “na o le faatauanau, i le tali-tiga, i le agamaualalo ma le agamalu, ma le alofa faamaoni.”⁹ Sa saunoa mai Peresitene Henry B. Eyring, “Mai fesoasoaniga uma e mafai ona tatou tuuina atu … i tagata talavou, o le fesoasoaniga aupito maoae lava o le tuu atu ia i latou ia lagona lo tatou talitonu mautinoa ua latou i ai i le ala e toe foi atu ai i le Atua, ma e mafai ona latou ausia.”¹⁰

A o tatou mafaufau i mataupu faavae lea e tatau ona taitaia ai i tatou i le Ekalesia ma i le aiga, sei ou faaiu atu ma se ata mai le talaaga o le soifuaga o Peresitene Thomas S. Monson. Fai mai Ann Dibb, o le tama teine a le au Monsons, e oo mai le asō, soo se taimi lava na te ulufale atu ai i le faitotoa i luma o le fale lea sa ia ola mai ai, e fai mai lona tama, “Oi, vaai po o ai lea ua iinei. Ma e ese lo tatou fiafia a ea, ma le, e ese le lalelei a ea?” Na faaauau pea lana tala: “E masani lava ona fai mai e ou matua ni upu faaviivii; e le afaina pe faape’i o’u foliga po o le a sa’u mea sa fai. … Afai ou te alu ma asiasi i ou matua, ou te iloa o loo alofagia au, e tuu mai ni upu faaviivii ia te au, e talisapaia au, ua ou i ai i lo’u aiga.”¹¹

Uso e ma tuafafine, o le ala lea a le Alii. E tusa lava pe na le lelei le tausiga o oe i le taimi ua tea, ou te iloa e finagalo le Alii ina ia outou o mai ia te Ia.¹² E alofa o Ia i tagata uma. E talisapaia e Ia tagata uma. I le suafa o Iesu Keriso, amene.