A o Tatou Toe Potopoto Ai
Saunia e Peresitene Thomas S. Monson
E silafia e lo tatou Tama Faalelagi i tatou taitoatasi ma mea tatou te manaomia. Tau ina ia faatumulia i tatou i Lona Agaga a o tatou faafofoga ma faalogologo i taualumaga o lenei konafesi.
O’u uso pele, a o tatou toe potopoto i lenei konafesi aoao a le Ekalesia, ou te faafeiloai atu ia te outou ma ta’u atu lo’u alofa ia te outou. Tatou te feiloai i le ta’i ono masina e fefaamalosia’i ai o le tasi i le isi, e ofo atu ai le faamalosiauga, e tuuina atu ai le faamafanafanaga, e faamalosia ai le faatuatua. Ua tatou i ai iinei e aoao. Atonu e i ai nisi o outou o loo sailia ni tali i fesili ma luitau o loo outou feagai i o outou olaga. O nisi o loo tauivi ma le le fiafia po o le oti. E mafai ona faamalamalamaina i tatou taitoatasi ma faagaeetia a o lagonaina le Agaga o le Alii.
Afai e i ai ni suiga e tatau ona faia i lou olaga, talosia ia e maua le lagona faaosofia ma le lototele e te faia ai, a o e faalogologo i upu musuia o le a tautalagia. Talosia ia toe faafou e i tatou taitoatasi se naunautaiga e ola ina ia tatou agavaa o ni atalii ma ni afafine o lo tatou Tama Faalelagi. Talosia ia faaauau pea ona tatou tetee atu i mea leaga po o fea lava e maua ai.
Oka se faamanuiaina o i tatou ina ua tatou o mai i le lalolagi i se taimi faapenei—o se taimi ofoofogia i le talafaasolopito umi o le lalolagi. E le mafai ona tatou potopoto faatasi i lalo ifo o se malu se tasi, a o lea ua mafai nei ona tatou auai i taualumaga o lenei konafesi ona o le ofoofogia o televise, leitio, keipo, satelite, ma le Initoneti—e oo lava i masini feaveai. Ua tatou potopoto faatasi ua tasi, ua tele gagana ua tatou tautatala ai, ua ola i le tele o laueleele, ae tasi lava le faatuatuaga ma le aoaoga faavae e tasi ma le faamoemoega e tasi.
Mai se amataga itiiti i le 182 tausaga ua mavae, a o lea ua lagonaina lo tatou i ai i le lalolagi atoa. O lenei galuega sili ua tatou punouai i ai, o le a faaauau pea ona faatupulaia, e suia ai ma faamanuiaina olaga e pei ona ia faia ai. E leai se mea, leai se malosiaga i le lalolagi atoa e mafai ona taofia le galuega a le Atua. Po o le a lava le mea e oo mai, o le a agai pea i luma lenei galuega tele. E mafai ona outou manatua upu faaperofeta a le Perofeta o Iosefa Samita: “E leai se lima palapala e mafai ona taofia le galuega mai le agai atu i luma; e mafai ona matamataita sauaga, e mafai ona tuufaatasi le au faatupu faalavelave, e mafai ona faapotopoto autau, e mafai ona osofai mai talapepelo taufaaleaga, ae o le a agai pea i luma ma le le fefe le upumoni a le Atua, e viia, ma tutoatasi, seia oo atu i konetineta uma, ma asia itulagi uma, faatumulia ai atunuu uma, ma lagona e taliga uma, seia oo ina faataunuuina faamoemoega o le Atua, ma fetalai mai ai le Ieova Silisili ua mae’a le galuega.”1
E tele naua faigata ma luitau i le lalolagi i nei ona po, o’u uso e ma tuafafine, ae o loo tele naua foi mea lelei ma faagaeetia. A o tatou tautino atu la tatou mataupu faavae lona sefulutolu o le faatuatua, “Afai e i ai nisi mea e mama, matagofie, pe logoleleia pe tauleleia, matou te saili atu i nei mea uma.” Talosia ia tatou faaauau pea ona faia faapea.
Ou te faafetai atu i lo outou faatuatua ma lo outou tuuto i le talalelei. Ou te faafetai atu mo le alofa ma le agalelei o loo faaalia e le tasi i le isi. Ou te faafetai atu mo le tautua o loo outou faia i a outou uarota ma paranesi ma i a outou siteki ma itu. O auaunaga na ua mafai ai e le Alii ona faataunuu le tele o Ona faamoemoega i lenei lalolagi.
E momoli atu la’u faafetai i lo outou agalelei ia te au po o fea lava ou te alu i ai. Ou te faafetai atu mo a outou tatalo mo au. Ou te lagonaina lava nā tatalo ma ou te matua faafetai atu ai lava.
O lenei, o’u uso e ma tuafafine, ua tatou o mai ina ia aoaoina ma ia musuia. E tele savali o le a faasoa atu i nei aso e lua. E mafai ona ou faamautinoa atu o na alii ma tamaitai, o ē o le a saunoa atu, sa latou sailia le fesoasoani ma le taitaiga a le lagi, a o latou saunia a latou savali. Sa musuia i latou e faatatau i mea o le a latou faasoa mai mo i tatou.
E silafia e lo tatou Tama Faalelagi i tatou taitoatasi ma mea tatou te manaomia. Tau ina ia faatumulia i tatou i Lona Agaga a o tatou faafofoga ma faalogologo i taualumaga o lenei konafesi. O la’u tatalo faamaoni lea i le suafa paia o lo tatou Alii, o Iesu Keriso, amene.