O Le Manatuaina Pe O Ai i Tatou: O Le Faamanatuga, le Malumalu, ma le Ositaulaga e Ala i le Auauna Atu
Saunia e Elder Robert D. Hales
O Le Korama a Aposetolo e Toasefululua
E liuaina i tatou ma avea ma tagata e ola faalagolago faaleagaga ia i tatou lava pe a tatou ola ma le agaga tatalo ia tatou feagaiga.
Sa ta’u atu e le Faaola i Ona soo se atalii sa tuua lona tama mauoa, ma malaga i se nuu mamao, ma faama’umau ai lona tamaoaiga. Ina ua tulai mai se matelaina, sa galue o ia i se galuega maualalo tele o le fafagaina o puaa. Sa matua fiaai lava o ia, o lea sa ia manao ai e ‘ai i atigi meaai a manu.
I le mamao ese ai mai le aiga, mamao mai le nofoaga sa ia fia manao e i ai, ma i lona tulaga matua mativa lava, sa tupu ai se mea taua e faavavau i le olaga o lenei alii talavou. I upu a le Faaola, “ona atamai ai lea o ia.”1 Sa ia manatuaina pe o ai o ia, iloaina le mea o loo misi ia te ia, ma amata ai ona manao i faamanuiaga o loo maua fua i le fale o lona tama.
I o tatou olaga atoa, po o taimi o le pogisa, luitau, faanoanoaga, po o le agasala, atonu tatou te lagonaina le faamanatu mai a le Agaga Paia ia i tatou, o tatou o atalii ma afafine moni o se Tama Faalelagi e popole mo i tatou, e alofa ia i tatou, ma e mafai ona tatou fia aai i faamanuiaga paia ia e na o Ia lava e mafai ona tuuina mai. I nei taimi e tatau ona tatou tauivi ai ia manatua pe o ai i tatou ma toe foi mai i le malamalama o le alofa o lo tatou Faaola.
O nei faamanuiaga e umia ma le tonu e fanau uma a le Tama Faalelagi. O le mananao mo nei faamanuiaga, e aofia ai se olaga o le olioli ma le fiafia, o se vaega taua lea o le fuafuaga a le Tama Faalelagi mo i tatou taitoatasi. Sa aoao mai le perofeta o Alema e faapea, “E tusa pe ua le mafai ona e faia o se isi lava mea nai lo le fia talitonu, ia tuu lea manao e galue i totonu ia te oe.”2
A o faateleina lo tatou manao faaleagaga, e oo ina avea i tatou ma tagata e faalagolago faaleagaga ia i tatou lava. E faapefea la ona tatou fesoasoani i isi, ia i tatou lava, ma o tatou aiga ia faateleina lo tatou mananao ia mulimuli i le Faaola ma ola i Lana talalelei? E faapefea ona tatou faamalolosia lo tatou manao ia salamo, ia agavaa, ma tumau e oo i le iuga? E faapefea ona tatou fesoasoani i a tatou autalavou laiti ma talavou matutua ina ia galueaiina nei manao i totonu o i latou seia oo ina liuaina i latou ma avea ma “tagata paia [moni] e ala i le togiola a Keriso”?3
E liuaina i tatou ma avea ma tagata e ola faalagolago faaleagaga ia i tatou lava pe a tatou ola ma le agaga tatalo ia tatou feagaiga—e ala i le taumamafa ma le agavaa i le faamanatuga, ola agavaa mo se pepa faataga o le malumalu, ma le ositaulaga e auauna atu i isi.
Ina ia taumamafa ma le agavaa i le faamanatuga, tatou te manatua ai o loo tatou faafouina le feagaiga sa tatou faia i le papatisoga. Mo le faamanatuga ina ia avea ma se aafiaga faaleagaga o le faamamaina i vaiaso taitasi, e manaomia ona tatou saunia i tatou lava a o le’i o mai i le sauniga faamanatuga. Tatou te faia lenei mea e ala i le faataatia ese ma le loto i ai o a tatou galuega o aso taitasi ma mea faafiafia ma lafoai ese manatu ma popolega faalelalolagi. A tatou faia lea mea, ua tatou faaavanoaina o tatou mafaufau ma loto mo le Agaga Paia.
Ona tatou saunia lea e mafaufau loloto i le Togiola. E sili atu nai lo le na ona mafaufau i mea moni o puapuaga ma le maliu o le Faaola, o lo tatou mafaufau loloto e fesoasoani lea ia i tatou ina ia iloa e ala i le taulaga a le Faaola, tatou te maua ai le faamoemoe, avanoa, ma le malosi e faia ai ni suiga moni ma le faamaoni i o tatou olaga.
A o tatou usuina le viiga o le faamanatuga, ia auai i le tatalo o le faamanatuga, ma taumamafa i faatusa o Lona tino ma le toto, tatou te saili atu ma le agaga tatalo le faamagaloga mo a tatou agasala ma lē atoatoa. Tatou te mafaufau i folafolaga sa tatou faia ma tausia i le vaiaso ua tuanai ma faia ni tautinoga patino faaletagata e mulimuli i le Faaola i le vaiaso a sau.
Matua ma taitai, e mafai ona e fesoasoani i le autalavou ia iloaina faamanuiaga le mafaatusalia o le faamanatuga e ala i le sauniaina o avanoa faapitoa mo i latou e suesue ai, talanoa, ma iloa le taua o le Togiola i o latou olaga. Tuu atu ia i latou e suesue i tusitusiga paia mo i latou lava ma aoao e le tasi le isi mai o latou aafiaga.
Ua i ai i tamā, taitai perisitua, ma au peresitene o korama se tiutetauave faapitoa e fesoasoani i e umia le Perisitua Arona ia saunia ma le naunautai e faatino o latou tiute paia o le faamanatuga. O lenei sauniuniga e fai i le vaiaso atoa e ala i le ola i tulaga faatonuina o le talalelei. Pe a saunia e alii talavou, faamanuia, ma tufatufa atu le faamanatuga i le agavaa ma le migao, ua latou mulimuli moni lava i le faataitaiga a le Faaola i le Tausamaaga Mulimuli4 ma avea ai e faapei o Ia.
Ou te molimau atu ua tuu mai e le faamanatuga ia i tatou se avanoa e manatua ai pe o ai i tatou ma oo ai i “se liuga tele” o le loto5—ina ia manatua ai pe o ai i tatou ma pe o le a le mea sili tatou te mananao i ai. Pe a tatou faafou le feagaiga e tausi ia poloaiga, ua tatou maua le mafutaga ma le Agaga Paia e taitai i tatou e toe foi atu i le afioaga o lo tatou Tama Faalelagi. E leitioa a poloaiina i tatou ia “potopoto soo faatasi e taumamafa i le areto ma le [vai]”6 ma taumamafa i le faamanatuga i o tatou agaga.7
E faateleina lo tatou naunau e toe foi atu i le Tama Faalelagi, e le gata i le taumamafa i le faamanatuga, a o lo tatou agavaa e maua se pepa faataga o le malumalu. Tatou te agavaa e ala i le tausia pea lava pea o poloaiga. O lenei usiusitai e amata mai i le taimi o laiti ma faateleina ai e ala i aafiaga i le Perisitua Arona ma Tamaitai Talavou i tausaga o tapenaga. Ona faamoemoe lea e faatutuina e ositaulaga ma Lora ni sini ma saunia patino i latou lava ina ia maua faaeega paia ma faamauina i le malumalu.
O a tulaga faatonuina mo e umia pepa faataga? Sa faamanatu mai e le fai Salamo ia i tatou:
“O ai ea se alu ae i le mauga o Ieova? O ai se tumau i lona afioaga paia?
“O le ua i ai lima mama, ma le loto mama.”8
O le agavaa e umia ai se pepa faataga o le malumalu tatou te maua ai le malosi e tausia ai a tatou feagaiga o le malumalu. E faapefea ona tatou mauaina patino lena malosiaga? Tatou te taumafai ia maua se molimau i le Tama Faalelagi, o Iesu Keriso, le Agaga Paia, le moni o le Togiola, ma le moni a’ia’i o le Perofeta o Iosefa Samita ma le Toefuataiga. Tatou te lagolagoina o tatou taitai, taulimaina o tatou aiga i le agalelei, tutu atu o ni molimau i le Ekalesia moni a le Alii, auai i a tatou sauniga a le Ekalesia, faamamalu a tatou feagaiga, faataunuu ia matafaioi faamatua, ma ola i se olaga mama. Atonu e te faapea e foliga mai lena mea o se tagata faamaoni o le Au Paia o Aso e Gata Ai! E sa’o oe. O le tulaga faatonuina mo e umia pepa faataga o le malumalu e le maualuga tele mo i tatou e ausia. Tau lava ia ola ma le faamaoni i le talalelei ma mulimuli i perofeta.
I le avea ai la ma e umia pepa faataga o le malumalu, tatou te faamautuina ni mamanu o le ola e faapei o Keriso. E aofia ai i nei mea le usiusitai, faia o osigataulaga e tausi ia poloaiga, alofa o le tasi i le isi, o le mama i mafaufauga ma amioga, ma le tuuina atu o i tatou lava i le fausiaina o le malo o le Atua. E ala mai i le Togiola a le Faaola ma le mulimuli i nei mamanu autu o le faamaoni, tatou te maua ai le “mana mai luga”9 e fetaia’i ai ma faigata o le olaga. Tatou te matua manaomia lenei mana faalelagi i aso nei nai lo se isi lava taimi muamua. O lea mana e na o sauniga o le malumalu tatou te maua ai. Ou te molimau atu o osigataulaga tatou te faia e maua ai sauniga o le malumalu e tauia mo taumafaiga uma e mafai ona tatou faia.
A o faateleina lo tatou manao e aoao ma ola i le talalelei, tatou te saili ma le lotofuatiaifo e auauna atu i le tasi ma le isi. Na fetalai atu le Faaola ia Peteru, “Pe a liua mai oe, faamalosi i lou uso.”10 Ua faagaeetia lava au o loo i ai i le autalavou o aso nei le manao loloto e auauna atu ma faamanuia isi—ina ia faia ai se eseesega i lenei lalolagi. Latou te mananao foi i le olioli e maua mai i a latou auaunaga.
Peitai, e faigata mo le autalavou ona malamalama i le auala e saunia ai e amioga o le taimi nei i latou pe faalēagavaaina ai foi i latou mo avanoa e auauna atu ai i le lumanai. Ua ia i tatou uma se “tiute le maalofia”11 e fesoasoani ai i a tatou autalavou e sauni mo auaunaga i le olaga atoa e ala i le fesoasoani atu ia i latou ia avea ma tagata e faalagolago faaleagaga ia i latou lava. E faaopoopo atu i le ola faalagolago faaleagaga o le tagata lava ia ua tatou talanoaina, o loo i ai le ola faalagolago faaletino, lea e aofia ai le a’otauina pe a uma aoga maualuluga po o aoga o matata eseese, aoao ia galue, ma le ola ai e tusa ma mea ua maua. E ala i le aloese mai le aitalafu ma teu ni tupe i le taimi nei, tatou te saunia ai mo auaunaga i le Ekalesia i le olaga atoa i tausaga o lumanai. O le faamoemoega o le ola faalagolago o le tagata lava ia i le faaletino ma le faaleagaga o le ave lea o i tatou i tulaga maualuluga atu ina ia mafai ai ona tatou siitia i luga isi o manaomia se fesoasoani.
Pe tatou te talavou pe matutua, o mea tatou te faia i le taimi nei e iloa ai pe o a auaunaga o le a mafai ona tatou tuuina atu ma olioli ai i le lumanai. E pei ona faamanatu mai e le tusisolo ia i tatou, “Mai upu faanoanoa uma e tusia ma tautalagia, o upu e sili ona faanoanoa o upu nei: ‘Maimau e, pe ana!’”12 Aua nei o’o o tatou olaga i le toe salamo ai i mea sa fai po o mea sa le’i faia!
Uso e ma tuafafine pele, o le alii talavou lea na faatatau i ai le fetalaiga a le Faaola, le ua tatou faasino i ai o le atalii faamaumauoa, na toe foi mai i le aiga. E le’i faagaloina o ia e lona tama; sa faatalitali i ai lona tama. Ma na “tulai [le atalii] ua alu i lona tama. Ua iloa mamao atu foi o ia e lona tama, ona mutimutivale lea o lona alofa, ua momoe atu ia, ma … sogi atu ia te ia.”13 I le faamamaluina o le toe foi atu o lona atalii, sa ia aumaia le ofu talaloa, se mama, ma fai se fiafia i se povi peti14—o le faamanatu, o le a le taofia lava se faamanuiaga pe a tatou tumau ma le faamaoni i le savavali ai i le ala e toe foi atu ai i lo tatou Tama Faalelagi.
Faatasi ai ma Lona alofa ma le alofa o Lona Alo i lo’u loto, ou te lu’iina i tatou taitoatasi ina ia mulimuli i o tatou manaoga faaleagaga ma manatua pe o ai i tatou. Ia e fesili oe lava ia ia te oe i le faaata, “O fea o o’u tu ai i le tausiga o a’u feagaiga?” Tatou te i ai i le ala sa’o pe a mafai ona tatou faapea atu, “O loo ou ai ma inu ma le agavaa i le faamanatuga i vaiaso taitasi, o loo ou agavaa e umia se pepa faataga o le malumalu ma alu i le malumalu, ma o loo ou ositaulaga e auauna atu ma faamanuia isi.”
Ou te faasoa atu la’u molimau faapitoa, ua alofa tele le Atua ia i tatou taitoatasi “lea na ia auina mai ai lona atalii e toatasi”15 e togiola mo a tatou agasala. Na te silafia i tatou ma o loo faatalitali mai ia i tatou, e tusa lava pe ua matua mamao ese lava lo tatou ala. Pe a tatou faatino e tusa ma o tatou manaoga ma manatua pe o ai i tatou, o le a “siosiomia [i tatou] e faavavau i aao o lona alofa”16 ma talileleia i tatou i le aiga. Ou te molimau atu ai i le suafa paia o lo tatou Faaola, o Iesu Keriso, amene.