Aoaoina o A Tatou Fanau ia Malamalama
Saunia e Cheryl A. Esplin
Fesoasoani Lua i le Au Peresitene Aoao o le Peraimeri
O le aoao o a tatou fanau ia malamalama e sili atu i le na ona tuu atu i ai o faamatalaga. O loo fesoasoani ia tatou fanau ia oo atu aoaoga faavae i o latou loto.
A o mavae atu tausaga, e tele auiliiliga i lo’u olaga ua galo atu, ae o nisi o manatua e manino pea, o le fananau mai lea o a ma fanau taitoatasi. Sa foliga ua lalata tele mai le lagi, ma afai ou te taumafai, e toetoe lava ina a ou lagonaina na lagona o le migao ma le maofa sa ou oo i ai i taimi taitasi, sa tuuina mai ai na pepe meamea taitoatasi i o’u lima.
O “fanau o le tofi lea mai ia Ieova” (Salamo 127:3). Na te silafia ma alofa ia i latou taitoatasi i se alofa e atoatoa (tagai Moroni 8:17). E maeu lava se tiutetauave paia ua tuuina mai e le Tama Faalelagi ia i tatou o ni matua, e faapaaga ma Ia e fesoasoani ai i Ana agaga filifilia ia avea ma tagata ua Ia silafia e mafai ona avea ai i latou.
O lenei avanoa paia e tausia ai fanau, o se tiutetauavae e matuai tele naua e le mafai ona tatou faia na o i tatou e aunoa ma le fesoasoani a le Alii. Na te silafia lelei le mea e tatau ona iloa e a tatou fanau, o le mea e tatau ona latou faia, ma le ituaiga o tagata e tatau ona avea ai i latou e toe foi atu ai i Lona afioaga. Na tuuina mai i tina ma tama ni faatonuga patino ma le taitaiga e ala mai i tusitusiga paia, o Ana perofeta, ma le Agaga Paia.
I se faaaliga i nei aso e gata ai e ala mai i le Perofeta o Iosefa Samita, ua faatonuina ai e le Alii ia matua e aoao a latou fanau ia malamalama i aoaoga faavae o le salamo, faatuatua ia Keriso, papatisoga, ma le meaalofa o le Agaga Paia. Matau e le na ona fai mai o le Alii e tatau ona tatou “aoao atu le mataupu faavae”; o Ana faatonuga ia aoao a tatou fanau ia “malamalama i le mataupu faavae.” (Tagai MF&F 68:25, 28; faaopoopo le faamamafa.)
I le Salamo ua tatou faitau ai, “Ia e aoao mai ia te au, ona ou anaana lea i au tulafono; ma ou tausia ma lo’u loto atoa” (Salamo 119:34).
O le aoao o a tatou fanau ia malamalama e sili atu i le na ona tuu atu i ai o faamatalaga. O le fesoasoani ia tatou fanau ia oo atu aoaoga faavae i o latou loto, i se auala e avea ai ma se vaega o o latou lava tagata, ma ia atagia mai i o latou uiga faaalia ma amioga i o latou olaga.
Na aoao mai e Nifae le matafaioi a le Agaga Paia o le molioo atu lea o le upumoni (2 Nifae 33:1). O la tatou matafaioi o ni matua, o le faia lea o mea uma tatou te mafaia e fatu ai se siosiomaga e mafai ai e a tatou fanau ona lagonaina le uunaiga a le Agaga ona fesoasoani ai lea ia latou iloa le mea ua latou faalogoina.
Ou te manatua ai se telefoni sa ou maua i ni tausaga ua mavae mai le ma tama teine o Michelle. Faatasi ai ma se lagona ootia sa fai mai o ia, “Mama, faatoa uma atu nei lava se mea maoae na ou vaaia ia Ashley.” O Ashley o lana tama teine e lima tausaga i lena taimi. Sa faamatala mai e Michelle lena taeao o se tasi o taeao masani o le tauaimisa o Ashley ma Andrew e tolu tausaga—e musu le tasi e faasoa ae musu le isi e po. Ina ua uma ona fesoasoani Michelle e faaleleia, sa alu loa o ia e siaki le pepe.
E lei leva ae tamoe atu Ashley, ua ita i le le manao o Andrew e faasoa atu. Sa faamanatu atu e Michelle ia Ashley le tautinoga sa latou faia i le afiafi faaleaiga, ina ia agalelei atili le tasi i le isi.
Sa ia fesili atu ia Ashley pe manao e tatalo ma ole atu i le Tama Faalelagi mo se fesoasoani, ae sa ita tele Ashley ma sa tali atu, “Leai.” Ina ua fesili atu i ai, pe talitonu o ia o le a tali mai le Tama Faalelagi i lana tatalo, sa fai mai Ashley na te le iloa. Sa fai atu i ai lona tina e tago e uu faalelei lona lima ona la tootutuli lea e tatalo.
Sa fautuaina e Michelle e mafai e Ashley ona ole atu i le Tama Faalelagi e fesoasoani ia Andrew e faasoa—ma fesoasoani ia te ia ia agalelei. O le mafaufau ia fesoasoani le Tama Faalelagi i lona tuagane laitiiti ia faasoa, atonu na faaosofia ai le manao o Ashley, ma sa amata loa ona tatalo, muamua sa ole atu i le Tama Faalelagi e fesoasoani ia Andrew ia faasoa. A o ole atu o ia e fesoasoani mai ia te ia ia agalelei, sa amata ona tagi. Sa faauma e Ashley lana tatalo ae sulu ane lona ulu i tauau o lona tina. Sa opoina o ia e Michelle ma fesili atu pe ua tagi i se a. Sa fai mai Ashley na te le iloa.
Sa fai atu lona tina, “Masalo ua ou iloa le mea ua e tagi ai. O e maua se lagona lelei i totonu?” Sa lue atu le ulu o Ashley, ma sa faaauau le tala a lona tina, “O le Agaga lena ua fesoasoani ia e maua lena lagona. O le ala lena ua ta’u atu ai e le Tama Faalelagi ia te oe e alofa o Ia ia te oe ma o le a fesoasoani atu ia te oe.”
Sa ia fesili ia Ashley pe talitonu o ia i lena mea, ma pe e talitonu e mafai ona fesoasoani le Tama Faalelagi ia te ia. I nai ona mata laiti ua tumu i loimata, sa fai atu ai e talitonu.
O nisi taimi o le ala aupito sili ona mamana e aoao ai a tatou fanau ia malamalama i se aoaoga faavae o le aoao atu lea i le matalalaga o mea ua latou oo i ai i lena taimi. O na taimi e te’i lava ua tupu mai ma e le fuafuaina, ma e tupu mai lava i le gasologa masani o le olaga faaleaiga. E vave lava ona oo mai ma toe mou atu foi, o le mea lea e tatau ai lava ona tatou mataala ma ia iloa le taimi e aoao atu ai pe a o mai a tatou fanau ma se fesili po o se popolega, pe a i ai o latou faafitauli e le o mafai ona fealofani ma o latou tei po o uo, pe a moomia le taofiofi o lo latou ita, pe a latou faia se mea sese, pe latou te moomia foi ona faia o se faaiuga. (Tagai O Le Aoao Atu, E Leai Se Isi Valaauga e Sili Ai: O Se Punaoa Taiala mo le Aoaoina Atu o le Talalelei [1999], 140; Marriage and Family Relations Instructor’s Manual [2000], 61.)
Afai tatou te saunia ma tuu atu i le Agaga e taialaina nei tulaga, o le a aoaoina a tatou fanau ma tele atu ai se poto masani ma se malamalama.
E tutusa lava le taua o taimi e oo mai e aoao atu ai pe a tatou fuafuaina ma le agaga tatalo e pei o tatalo faaleaiga, suesuega faaleaiga o tusitusiga paia, afiafi faaleaiga, ma isi gaoioiga faaleaiga.
I tulaga uma lava e aoao atu ai, o le aoao mai ma le malamalama uma e sili ona faafaileleina i se siosiomaga o le mafanafana ma le alofa i le mea e i ai le Agaga.
Pe tusa ma le lua masina a o lei atoa le valu o tausaga o lana fanau, e seti e se tasi tamā se taimi i vaiaso taitasi e sauniuni ai i latou mo papatisoga. Fai mai lona afafine, ina ua oo atu le faasologa ia te ia, sa tuu atu e lona tama ia te ia se api o talaaga ma sa la nonofo i lalo, na o i la’ua, ma talanoa ma faasoa o la lagona e uiga i mataupu faavae o le talalelei. Sa fai atu lona tama ia te ia e tusi se fesoasoani faitino a o la talanoa. Sa faaalia ai le muai olaga, o le olaga nei, ma sitepu taitasi e tatau ona ia uia e toe foi atu ai ma ola faatasi ma le Tama Faalelagi. Sa tuuina atu e lona tama lana molimau e uiga i sitepu taitasi o le ata o le faaolataga a o ia aoaoina o ia.
Ina ua tomanatu lona afafine i lenei aafiaga ina ua matua, fai mai a ia, “O le a le galo lava ia te au le alofa sa ou lagonaina mai lo’u tamā ao ia faaavanoaina lona taimi mo au. … Ou te talitonu o lenei aafiaga o se mafuaaga tupito lea na ou maua ai se molimau ina ua ou papatiso.” (Tagai Aoao Atu, E Leai Se Isi Valaauga e Sili Ai, 129.)
O le aoao atu ia maua le malamalama e manaomia ai le taumafaiga naunautai ma e le motusia. E manaomia ai le aoao atu auauai o mataupu ma ala i faataitaiga aemaise lava e ala i le fesoasoani i a tatou fanau ia ola i mea latou te aoaoina.
Na aoao mai Peresitene Harold B. Lee, “A aunoa ma le faatinoina o mataupu faavae o le talalelei, e … sili atu ona faigata ona talitonu i lena mataupu faavae” (Aoaoga a Peresitene o le Ekalesia: Harold B. Lee [2000], 121).
Sa muamua ona ou aoao e tatalo e ala i le tootutuli ma lo’u aiga i lotu faaleaiga. Sa aoaoina au i le gagana o le tatalo a o ou faalogologo i o’u matua o tatalo, ma a o la fesoasoani mai e fai la’u uluai tatalo. Sa ou aoaoina e mafai ona ou talanoa i le Tama Faalelagi ma fesili atu mo se taitaiga.
O taeao uma lava e lei misi, sa faapotopoto ai i matou e lo’u tina ma lo’u tama i le laulau i le umukuka a o lei inuina le ti o le taeao, ona matou tootutuli ai lea e fai la matou tatalo faaleaiga. Sa matou tatalo i ‘aiga uma. I le afiafi a e matou te lei momoe, sa matou tootutuli faatasi i le potu malolo ma tapunia le aso i se tatalo faaleaiga.
E ui ina tele naua ni mea sa ou lei malamalama ai e uiga i le tatalo o se teineitiiti, ae sa amata ona avea ma se vaega o lo’u olaga ma sa tumau ai ia te au. O loo faaauau pea ona ou aoao, ma o loo tuputupu ae pea lo’u malamalama i le mana o le tatalo.
Na saunoa Elder JeffreyR. Holland, “Ua tatou malamalama uma lava o le manuia o le savali o le talalelei, e faalagolago i lona aoaoina atu ona malamalama ai lea ma ola ai i se ala e mafai ai ona tino mai le fiafia ma le faaolataga o loo folafola mai ai. (“Teaching and Learning in the Church” [worldwide leadership training meeting, Feb. 10, 2007], Liahona, Iuni 2007, 57).
O le aoao ia matua malamalama i aoaoga faavae o le talalelei o se faagasologa i le olaga atoa ma e oo mai i “lea fuaiupu ma lea fuaiupu, o lea mataupu ma lea mataupu, o si mea itiiti iinei ma si mea itiiti iina” (2 Nifae 28:30). A o aoao e le fanau ma galueaiina mea latou te aoaoina, e faateleina lo latou malamalama, lea e tau atu i nisi aoaoga, ma nisi faatinoga, e oo lava i se malamalama e sili atu ma sili ona mautu.
E mafai ona tatou iloa ua amata ona malamalama a tatou fanau i aoaoga faavae, pe a tatou vaai ua faaalia mai i o latou uiga faaalia ma faatinoga e aunoa ma le taufaamata’u i ai po o ni taui foi. A o aoao a tatou fanau ia malamalama i aoaoga faavae o le talalelei, o le a tele ona latou faalagolago ia i latou lava ma tele ina faatuatuaina. E avea i latou ma se vaega o vaifofo i luitau a o tatou aiga, ma latou saofagā lelei atu ai i le siosiomaga ma le manuia o o tatou aiga.
O le a tatou aoao atu a tatou fanau ia malamalama pe a tatou faaaogaina tulaga faaleaoaoga uma, valaaulia le Agaga, fai se faataitaiga, ma fesoasoani ia latou ola i mea latou te aoaoina.
A tatou vaavaai atu i mata o se pepe meamea, e faamanatu mai ai ia i tatou le pese:
O le Atua lo’u Tama,
Lea ua ua ou taua ai;
O ana upu ia ou fai
Ta’u mai a e le’i tuai.
Ta’ita’i a’u, faasino mai,
Le ala e ui ai,
A’oa’o mai mea e ao na ou fai,
Ma te toe mafuta ai.
(O Le Atua Lo’u Tama, Viiga, nu. 184; ua faaopoopo le faamamafa)
Ia tatou faia faapena. I le suafa o Iesu Keriso, amene.