Ia Ogatasi ma le Musika o le Faatuatua
Saunia e Elder Quentin L. Cook
O Le Korama a Aposetolo e Toasefululua
E alofa le Atua i Ana fanau uma. Ua finagalo o Ia ia toe foi uma atu i latou ia te Ia. Ua finagalo o Ia i tagata uma ia ogatasi ma musika paia o le faatuatua.
Pe a feiloai le Pulega Aoao o le Ekalesia ma tagata o le ekalesia i le lalolagi atoa, matou te vaaia patino lava le auala o avea ai le Au Paia o Aso e Gata Ai ma se malosiaga mo le lelei. Matou te faamalo atu ia te outou mo mea uma o loo outou faia e faamanuia ai olaga o tagata uma.
O i tatou o loo i ai ni tofiga o le va i fafo e matua nofouta lava i le toatele o taitai faitofa ma le au tusitala i le Iunaite Setete ma le lalolagi atoa ua faateleina lo latou talanoaina faalauaitele o le Ekalesia ma ona tagata. O se soofaatasiga tulaga ese o mea autu ua iloga ai le siitia o le talaaga o le Ekalesia.1
O le toatele o loo tusitusi e uiga i le Ekalesia o loo faia se taumafaiga faamaoni ia malamalama i o tatou tagata ma a tatou aoaoga faavae. Sa latou faaaloalo ma taumafai ina ia lē faaituau, lea tatou te faafetai i ai.
Matou te iloa foi e toatele tagata e le o malamalama i mea paia. O le A’oa’o Sili o Lord Sacks o Egelani, a o lauga atu i taitai o le Katoliko Roma ia Tesema ua mavae i le Iunivesite o Pontifical Gregorian, sa matauina le matuai liliu atu o nisi o vaega o le lalolagi i le faalelalolagi. Sa ia ta’ua e faapea, o se tasi o faapogai o “mea faasaienitisi faataumaoi ua logonoa ai i le musika o le faatuatua.”2
O le faaaliga tomua sili i le Tusi a Mamona o le miti lea a Liae o le laau o le ola.3 Ua faamatala manino mai i lenei faaaliga ia luitau i le faatuatua lea e tupu i o tatou aso ma le vaeluaina tele i le va o i latou e alolofa, tapuai, ma lagonaina le tali atu i le Atua ma i latou e le usiusitai. Sa faamalamalama mai e Liae nisi o amioga ia e faaumatia ai le faatuatua. O nisi o le mimita, faamaualuga, ma le faavalevalea. Ua na o le pau le mea latou te fiafia i ai lea e ta’ua e nisi o le poto faalelalolagi.4 O isi o loo i ai se naunau i le Atua ae ua leiloloa i ao pogisa faalelalolagi ma le agasala.5 O nisi na tofo i le alofa o le Atua ma Lana afioga ae sa lagona le maasiasi ona o i latou sa faatauemu mai ma pauu ese atu ai i “ala faasaina.”6
Ma le mea mulimuli, o loo i ai i latou o loo ogatasi ma le musika o le faatuatua. Ua outou iloa pe o ai outou. Tou te alolofa i le Alii ma Lana talalelei ma faaauau ai pea ona taumafai e ola ma faasoa atu Lana savali, aemaise lava i o outou aiga.7 O loo outou ogatusa ma uunaiga a le Agaga, fagua i le mana o le afioga a le Atua, o loo i ai ia uiga faalelotu i o outou aiga, ma taumafai ma le maelega e ola i ni olaga faa-Keriso i le avea ai ma Ona soo.
Ua matou iloa lo outou pisi tele. E aunoa ma se totogi o le auaunaga faaletaitaiga, o loo faalagolago ai le tiutetauave o le taitaiina o le Ekalesia ia te outou o tagata faapaiaina. Matou te iloa o se tulaga lautele mo uso o au epikopo ma au peresitene o siteki ma le toatele o isi le tuuina atu o le tele o itula o auaunaga tuuto. O au peresitene o ausilali ma korama o se faataitaiga ia i a latou osigataulaga lē manatu faapito. O lenei auaunaga ma osigataulaga e oo atu i tagata uma o le ekalesia, ia i latou o loo tausia faamaumauga faafailautusi, o faiaoga o aiga ma faiaoga asiasi faamaoni, ma na vasega o aoaoga. Matou te faafetai atu ia i latou o loo auauna atu ma le lototele o ni taitai Sikauti ma taitai foi o vasega pepe. Matou te alolofa ia te outou uma ma talisapaia mea uma o loo outou faia ma tagata ua avea ai outou!
Matou te faailoa atu o loo i ai tagata e itiiti le fiafia ma itiiti le faamaoni i nisi o aoaoga a le Faaola. O lo matou manao, e mo nei tagata ina ia ala mai atoatoa i le faatuatua ma faateleina lo latou toaaga ma le naunautai. E alofa le Atua i Ana fanau uma. Ua finagalo o Ia ia toe foi uma atu i latou ia te Ia. Ua finagalo o Ia i tagata uma ia ogatasi ma musika paia o le faatuatua. O le Togiola a le Faaola o se meaalofa lea mo tagata uma.
E manaomia ona aoaoina ma ia malamalama tatou te alolofa ma faaaloalogia tagata uma ia na faamatala mai e Liae.8 Manatua, e le o so tatou le faamasino atu. O le Alii e ana le faamasinoga.9 Sa talosagaina faapitoa lava i tatou e Peresitene Thomas S. Monson ina ia maua le “lototele e aloese ai mai le faamasino atu i isi.”10 Sa ia talosagaina foi ia tagata faamaoni uma ina ia laveai i latou na tofo i le fua o le talalelei ae ua pauu ese, faapea ai ma i latou e lei mauaina lava le ala sa’o ma le vaapiapi. Matou te tatalo ina ia latou pipii i le ai uamea ma aai i le alofa o le Atua, lea o le a faatumulia ai o latou “agaga i le olioli tele.”11
E ui o le faaaliga na vaaia e Liae na aofia ai tagata uma, ae o le manatu faaleaoaoga faavae e sili ona taua, o le taua e faavavau o le aiga. “O le aiga ua faauuina e le Atua. O se iunite aupito sili ona taua lea i le olaga nei ma le faavavau.”12 A o taumafa ai Liae i le fua o le laau o le ola (le alofa o le Atua), sa ia manao ina ia “aai ai foi [lona] aiga.”13
O lo tatou manao sili lava ia tausi a tatou fanau i le upumoni ma le amiotonu. O se tasi mataupu faavae o le a fesoasoani ia i tatou e ausia ai lenei mea, o le aloese lea mai le soona faamasinoina o amioga e faavalevalea pe le atamai ae e le o se agasala. I le tele o tausaga ua tea, a o matou i ai ma lo’u toalua ma le ma fanau i le fale, sa aoao mai ai Elder Dallin H. Oaks e faapea e taua le tuueseeseina o mea sese faaletalavou lea e tatau ona faasa’oina mai agasala, lea e manaomia ai le aoaiina ma le salamo.14 Pe a leai se atamai, e manaomia e a tatou fanau le faatonuga. Pe a i ai se agasala, e manaomia le salamo.15 Sa ma iloa le aoga tele o lenei aoaoga i lo ma aiga.
O le tausia o tulaga faalelotu i le fale e faamanuiaina ai o tatou aiga. E patino lava le taua o faataitaiga. E leotetele atu a tatou faatinoga nai lo a tatou upu ia e ono le lagona ai e a tatou fanau mea o tatou fai atu ai. Ina ua toeitiiti atoa le lima o ou tausaga, sa maua e lo’u tina se tala ua fasiotia lona tuagane laitiiti ina ua fanaina i lalo le vaatau sa i ai i le talafatai o Iapani a ua tulata i le faaiuga o le Taua Lona Lua a le Lalolagi.16 O lenei tala sa nutimomoia ai o ia. Sa matua mafatia ona lagona ma alu ai i le potumoe. Ina ua mavae sina taimi sa ou autilo atu ai i le potu e vaai pe o a mai o ia. O loo tootuli o ia i talaane o le moega o loo tatalo. Sa oo mai ia te au se filemu tele ona sa ia aoao mai au ia tatalo ma alofa i le Faaola. O se mea masani lea o le faataitaiga na te faia i taimi uma mo au. O le tatalo o tina ma tamā faatasi ma le fanau atonu e sili atu ona taua nai lo se isi lava faataitaiga.
O le savali, galuega, ma le togiola a Iesu Keriso, lo tatou Faaola, o mataupu aoaoina taua lea a lo matou aiga. E leai se isi mau e sili atu ona faavasegaina ai lo matou faatuatua nai lo le 2 Nifae 25:26: “Ma ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala.”
O se tasi o mataupu faavae o le faaaliga a Liae e faapea e tatau i tagata faamaoni ona pipiimau i le ai uamea ina ia latou tumau ai i le ala sa’o ma le vaapiapi e taitai atu ai i le laau o le ola. E taua mo tagata le faitau ma mafaufau loloto, ma suesue i tusitusiga paia.17
E matuai silisili lava le taua o le Tusi a Mamona.18 Ioe, o loo i ai pea i latou e manatu faatauvaa i le taua o le tusi e oo lava i le faitioina o lenei tusi paia. O nisi ua talasua ai. Ae ou te le i auauna atu faamisiona, sa sii mai e se polofesa o le iunivesite se faamatalaga a Mark Twain e faapea, afai e aveese le faaupuga “Ma sa oo ina” mai le Tusi a Mamona, “semanu ua na o se lautusi.”19
I nai masina mulimuli ane, a o ou auauna ai i se misiona i Lonetona, Egelani, sa faitau ai se faiaoga iloga sa aoaoina i Oxford i le iunivesite o Lonetona, o se tagata tomai faapitoa o le Tele o gagana faa-Aikupito i le Tusi a Mamona, na fetusiai ma Peresitene Tavita O. MaKei, ma sa feiloai atu i faifeautalai. Sa ia faailoa atu ia i latou ua ia talitonu o le Tusi a Mamona o se faaliliuga moni “o le aoaoina o le Iutaia ma le gagana o le faa-Aikupito” mo le vaitaimi o loo faamatalaina i le Tusi a Mamona.20 O se tasi o le mau faataitaiga sa ia faaaogaina o le fasifuaitau soofuaiupu o le “Ma sa oo ina,” lea sa ia fai mai ai sa atagia ai le auala na te faaliliuina ai ia fasifuaitau o loo faaaogaina i tusitusiga o gagana e Tele faaanamua.21 Sa faailoa atu i le polofesa e ui sa fesoasoani atu ia te ia lana suesuega faaleatamai e faavae i lona tulaga faapolofesa, ae sa manaomia pea ona i ai sana molimau faaleagaga. E ala mai i suesuega ma le tatalo sa ia maua ai se molimau faaleagaga ma sa papatisoina ai. O lea la, o le mea sa vaai i ai le tasi tagata faimeamalie lauiloa o se mea e tausuai i ai, sa iloa e se tagata atamai o se faamaoniga a’ia’i o le moni o le Tusi a Mamona, lea na faamautinoa atu ia te ia e le Agaga.
O le aoaoga faavae taua o le faitalia e manaomia ai se molimau o le talalelei toefuataiina lea e ao ona faavae i le faatuatua nai lo le na o se faamaoniga faaletino pe faasaienitisi. O le taulai atu ma le faananau i mea e le faaalia atoatoa mai e pei o le soifua mai ma le Toetu o le Faaola sa ono tupu ai po o le auala tonu sa faaliliu ai e Iosefa Samita a tatou tusitusiga paia, o le a le aoga pe tupu ai se alualu i luma faaleagaga. O mataupu nei o le faatuatua. O le mea sili, o le fautuaga a Moronae ia faitau ma mafaufau loloto ona ole atu ai lea i le Atua i le faamaoni atoa o le loto, ma le manatu moni i ai, ia faamautu mai ia upumoni faatusitusiga paia e ala i le molimau a le Agaga, o le tali lea.22 Ma le isi, pe a tatou atiina ae i o tatou olaga ni mea sili ona taua faaletusitusiga paia ma ola ai i le talalelei, e faamanuiaina i tatou e le Agaga ma tofo i Lona lelei ma lagona o le olioli, ma le fiafia aemaise lava o le filemu.23
E manino lava, o le eseesega i le va o i latou e faalogoina le musika o le faatuatua ma i latou e le lagonaina se faatuatua pe ua leai atoa se faatuatua, o le suesuega mataalia lea o tusitusiga paia. Sa matua tuia lava au i tausaga ua mavae ina ua faamamafa mai e se perofeta pele o, Spencer W. Kimball, le manaomia ona faaauau le faitauina ma le suesueina o tusitusiga paia. Sa ia fai mai: “Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga.”24
Ou te faamoemoe o loo tatou faitauina soo ma a tatou fanau le Tusi a Mamona. Sa matou talanoaina lenei mea ma la’u lava fanau. Sa latou faasoa mai ia te au ni mea se lua sa latou matauina. Muamua, o le tumau i le faitauina o tusitusiga paia i aso taitasi o se aiga o le ki lea. Sa faamatala e lo’u afafine i se ala agavaivai a latou taumafaiga i vaveao ma le tele o lana fanau talavou ina ia faitauina pea ia tusitusiga paia. E ala i la’ua ma lona toalua i le taeao po ma gaoioi ai ma le tautulemomoe ia pipii i le pa uamea lea e sau mai le fasitepu i luga e agai atu i le potu e faapotopoto ai lo latou aiga e faitau le afioga a le Atua. O le naunautaiga tali lea, ma e fesoasoani foi se lagona o tala malie. E manaomia ai se taumafaiga tele mai tagata uma o le aiga, i aso uma, ae e tauia ia taumafaiga. O mea faalavefau le tumau e faatoilaloina e le naunautaiga.
O le mea lona lua o le auala o loo faitauina ai e lo’u atalii laitiiti ma lona toalua ia tusitusiga paia faatasi ma le la fanau laiti. O le toalua mai le toafa o le la fanau e le i matutua lelei e iloa ai faitau. Mo le tamaitiiti e lima tausaga, e i ai ia faailoga o tamatamailima e lima lea e tali mai ai ina ia mafai ai ona ia auai atoa i le faitauga o tusitusiga paia a le aiga. O le faailoga mo le tamatamai lima 1 e mo ia ina ia toe ta’u le, “Ma sa oo,” i soo se taimi e tu mai ai i le Tusi a Mamona. Ou te tautino atu ou te fiafia i le tu soo mai o le fasifuaitau lea. O le isi, mo le fiafia o aiga talavou lava, o le faailoga o le tamatamailima 2 o le “Ma ua faapena ona tatou vaai”; o tamatamailima 3, 4, ma le 5 e filifilia e matua e tusa ai ma upu o loo i ai i le mataupu o loo latou faitauina.
Matou te iloa o suesuega faaleaiga o tusitusiga paia ma afiafi faaleaiga e le atoatoa lava i taimi uma. Pe o le a lava le luitau o loo outou feagai ai, ia aua lava nei faavaivai.
Faamolemole ia malamalama o le mauaina o le faatuatua i le Alii o Iesu Keriso ma le tausiaina o Ana poloaiga e avea ma o le a avea pea ma tofotofoga taua o le olaga faaletino. E sili atu i lo mea uma, e ao ona iloa e i tatou taitoatasi pe a le lagonaina e le tasi le musika o le faatuatua, o lona uiga ua le maua e ia le Agaga. E pei ona aoao mai le perofeta o Nifae, “Sa oulua faalogo i lona siufofoga … ; ma sa fetalai mai foi o ia ia te oulua i se leo filemu itiiti, peitai ua oulua te’a atu ma le toe lagonaina, na oulua le mafafai ai ona lagona ana fetalaiga.”25
Ua manino lava a tatou aoaoga faavae; e ao ona tatou manatu tonu ma ia fiafia. Tatou te faamamafa atu lo tatou faatuatua, ae le o lo tatou fefefe. Tatou te fiafia i le faamautinoaga a le Alii o le a Ia tu i tafatafa o i tatou ma tuu mai ia i tatou le taiala ma le taitaiga.26 Ua molimau mai i o tatou loto le Agaga Paia o loo i ai so tatou Tama i le Lagi, lē ana le fuafuaga mutimutivale mo lo tatou togiola o le a faataunuu i tulaga uma ona o le taulaga togiola a Iesu Keriso.
E pei ona tusia e Naomi W. Randall, le na tusia le “O Au o Se Atalii o le Atua,”: “E taiala mai Lona Agaga; e faamautinoa mai e lona alofa le aveesea o le fefe pe a tumau le faatuatua.”27
O le mea lea, pe o fea lava o tatou i ai i le ala o le avea ma soo i le faaaliga a Liae, ia tatou filifili e faaosofia i totonu o i tatou ma o tatou aiga se manao tele e maua le meaalofa le mafaamatalaina a le Faaola o le ola e faavavau. Ou te tatalo ia tatou tumau i le ogatasi ma le musika o le faatuatua. Ou te molimau atu ai i le paia o Iesu Keriso ma le moni o Lana Togiola, i le suafa o Iesu Keriso, amene.