O Le Au Faigaluega i le Tovine
Saunia e Elder Jeffrey R. Holland
O Le Korama a Aposetolo e Toasefululua
Faamolemole ia faalogo i le uunaiga a le Agaga Paia o loo ta’u atu ia te oe i le taimi nei, i le taimi nei lava, e tatau ona e taliaina le meaalofa togiola a le Alii o Iesu Keriso.
I le ta’ua ai o valaauga ma faamalologa mai valaauga lea na faatoa faasilasila atu nei e le Au Peresitene Sili, ou te fia talanoa ai mo i tatou uma i le fai atu lea o le a tatou manatua ma alolofa pea ia i latou sa auauna atu ma le faamaoni tele, e pei lava ona tatou alolofa nei ma talileleia i latou ia ua faatoa valaauina i tofiga. E momoli atu la matou faafetai mai le taele o o matou loto ia te outou uma taitoatasi.
Ou te fia talanoa atu i le faataoto a le Faaola lea na “vave alu ai le pule o le fanua i le taeao e saili mai ni tagata faigaluega.” Ina ua uma ona faafaigaluegaina le vaega muamua i le 6:00 i le taeao, sa ia toe foi atu i le 9:00 i le taeao, i le 12:00 i le aoauli, ma le 3:00 i le afiafi e saili mai isi tagata faigaluega ina ua matuai manaomia le faatele’ai’ia o le seleselega. O loo faapea mai tusitusiga paia na ia toe foi mai i le taimi mulimuli, “pe o le itula lona sefulutasi” (tusa lea o le 5:00 i le afiafi), ma faafaigaluega se vaega mulimuli. Ona mavae lea o se itula, sa potopoto uma le aufaigaluega ina ia maua o latou totogi o le aso. O se mea na faateia ai, sa tutusa uma o latou totogi na maua e ui e eseese itula sa galulue ai. Sa vave lava ona feitai i latou na muamua galulue, ma faapea atu, “E tasi lava le itu aso na galulue ai i latou nei na mulimuli, a ua e faatusaina i latou ma i matou o ē na tigaina i le galuega ma le vevela o le aso.”1 I le faitauina o lenei faataoto, atonu tou te lagonaina ai foi faatasi ma nei tagata faigaluega, o loo i ai se amioletonu ua faia i i. Sei ou talanoa puupuu atu i lena popolega.
O le mea muamua lava e taua le matau e leai se tagata ua le lelei ona taulimaina i i. Sa malilie le au faigaluega muamua i le totogi atoa o le aso, ma sa latou mauaina. Ma le isi, e mafai ona tau ina ou mafaufau i ai, sa latou matua faafetai lava i le maua o se galuega. I taimi o le Faaola, e le mafai e se tagata masani ma lona aiga ona faia ni mea se tele atu nai lo le ola ai i mea latou te mauaina i lena aso. Afai e te le galue pe faifaatoaga pe fagota pe faatau atu se mea, masalo lava e te le ‘ai. I le tele atu ai o tagata lē faigaluega nai lo galuega, o nei alii na muamua filifilia, o tagata ia sa sili ona faamanuiaina mai le vaega atoa o tagata e le faigaluega i lena taeao.
O le mea moni, afai e i ai so tatou tiga alofa, e tatau ona muai lagonaina mo alii ia sa lei filifilia o e sa i ai foi o latou aiga e fafaga ma faalavalava. O nisi o i latou e foliga mai e le laki lava. I asiasiga taitasi a tausi fanua i le aso atoa, sa latou vaaia pea le filifilia o se isi tagata.
Ae i le faaiuga o le aso, sa toe foi mai le pule o le fanua i le taimi lona lima e faateia ai i se ofo maoae o le itula lona sefulutasi! O nei au faigaluega mulimuli ma le sili ona lotovaivai, lea na o le pau le mea sa faalogo i ai o le a tutusa le taulimaina o i latou, sa latou taliaina le galuega e aunoa ma le iloaina o le totogi, ma le iloaina e sili lava le i ai o se mea nai lo le leai o se mea, aua o le mea lava na i ai. Ae a o latou faapotopoto mo lo latou totogi, sa matua faateia i latou i le mauaina o le totogi lava e tasi pei o isi tagata uma o le au faigaluega! Oka se faateia o i latou ma lo latou matua loto faafetai! E mautinoa lava latou te lei lagonaina lava se agaalofa faapenei i o latou olaga faigaluega atoa.
I lena malamalamaaga o le tala lea ua ou lagona ai le le fiafia na vaaia i le au faigaluega muamua. A o ta’u atu e le pule o le fanua ia i latou i le faataoto (ma ou te toe faaupuina teisi lava): “Au uo, e le faapea ua ou le faamaoni ia te outou. Sa outou malilie i le totogi mo le aso, o se totogi lelei. Sa matua outou fiafia lava i le maua o le galuega, ma sa ou fiafia tele foi i le auala sa outou galulue ai. Ua totogi atu le tau atoa ia te outou. Ave lo outou totogi ma olioli i le faamanuiaga. Ae mo isi, ia mautinoa ou te saoloto e fai le mea ou te manao e fai i a’u lava tupe.” Ona tulai mai lea o le fesili matuitui i soo se tagata i lena taimi po o le taimi nei e fia faalogo i ai: “Aisea e te lotoleaga ai ina ua ou filifili e agalelei atu?”
Uso e ma tuafafine, o le a i ai taimi i o tatou olaga o le a maua ai e se tagata se faamanuiaga e lei faamoemoeina pe maua se faamamaluga faapitoa. E mafai ona ou augani atu ia te outou ia aua nei tiga ai—ma mautinoa ia aua nei lotoleaga ai—pe a oo atu se manuia lelei i le isi tagata? E le faaitiitia ai o tatou manuia pe a tele ni mea e maua e le isi tagata. Tatou te le o i ai i se tū’uga e faasaga le tasi i le isi e iloa ai pe o ai ua sili ona mauoa pe sili ona talenia pe sili ona aulelei pe sili foi ona faamanuiaina. O le tū’uga moni lea tatou te i ai, o le tū’uga e faasagatau i le agasala, e mautinoa lava o le lotoleaga o se tasi o agasala e sili ona taatele o na agasala.
E le gata i lea, o le lotoleaga o se mea sese lea o loo fai pea lava pea. E mautinoa e fai lava si o tatou mafatia pe a oo ina misi se manuia mai ia i tatou, ae o le lotoleaga lea e mafua ai ona tatou mafatia i manuia lelei uma e maua e tagata uma tatou te iloa! Oka se vaaiga ina a mata’ina o lena mea—o le oso o lou le fiafia i taimi uma e fiafia ai tagata o siomia oe! O le a sili atu ona maasiasi i le iuga, pe a tatou iloa e le gata e amiotonu le Atua ae alofa mutimutivale foi, e foai atu i tagata uma o e e usitai ia te Ia “ana mea uma,”2 e pei ona ta’u mai e tusitusiga paia. O le lesona muamua la mai le tovine a le Alii: o le manaonao, faasiasia, po o le taufaaleaga i isi e le siitia ai lou tulaga, ma e le faaleleia ai foi ou uiga faaletagata i le faalumaina o le isi tagata. O lea ia agalelei ai, ma ia loto faafetai aua e agalelei le Atua. O le ala fiafia lena e ola ai.
O se manatu lona lua ou te fia manao e faaaoga mai lenei faataoto o le mea sese faanoanoa e mafai ona fai e nisi pe afai latou te le fia taliaina lo latou totogi i le faaiuga o le aso ona sa latou popole i mea sa latou manatu o ni faafitauli i le amataga o le aso. E le o ta’ua i i e faapea sa toe togi e se tasi ia mata o le pule o le fanua i le tupe siliva ma savali ese ma le ita e aunoa ma se tupe, ae ou te manatu atonu sa i ai se tasi sa faia lena mea.
Ou uso e ma tuafafine pele, o le mea na tupu i lenei tala i le 9:00 po o le aoauli po o le 3:00 e le taua pe a faatusatusa i le totogi agalelei ma le maofa na tuuina atu i le au faigaluega uma i le faaiuga o le aso. O le mamanu o le atiina ae o le faatuatua o le tumau lea, galue pea, ma vaai ua faamaeaina, lafoai ese atu ia popolega o itula amata—moni po o ni mafaufauga—pe a faatusatusa i le anoanoai o taui mulimuli. Aua le mafaufau pea i faafitauli ua tuanai po o ni faitioga—ia te oe lava ia po o lou tuaoi, ou te fia faaopoopo atu, i lenei Ekalesia moni ma le ola. O le mamalu o lou olaga, le olaga o lou tuaoi, ma le talalelei a Iesu Keriso o le a faaalia i aso amulī, tusa lava pe le iloaina lena mamalu e tagata uma i le taimi muamua. O le mea la lea, aua le soona popolevale i se mea na tupu i le 9:00 i le taeao a o taumafai le alofa tunoa o le Atua e tauia oe i le 6:00 i le afiafi—pe o a lava ni fetuunaiga o au galuega sa i ai i le aso.
Tatou te faaaogaina ia malosiaga taua faalelagona ma faaleagaga e manatua ai pea se nota pa’ulua na tatou taina i se faaaligā tapiano a o tatou laiti, po o se mea sa fai mai ai se toalua po o se mea na ia faia i le 20 tausaga talu ai lea tatou te naunau lava ia ona manatuaina pea ma lagona ai pea le ta’usalaina mo le isi 20 tausaga, po o se mea na tupu i le talafaasolopito o le Ekalesia lea ua faamaonia ai o le a faigata pea i tagata o le olaga nei ona faatutusa lo latou lelei i faamoemoega o le Atua mo i latou. E tusa lava pe e te lei amataina se tasi o na faitioga, e mafai lava ona faaiu ia te oe. Ma o le a sili atu se taui mo lena saofaga pe a silasila atu le Alii o le tovine i ou fofoga ma ua faamagaloina uma a tatou agasala i le faaiuga o o tatou olaga faalelalolagi.
Lea ua taitai atu ai a’u i lo’u manatu lona tolu ma o le toe manatu foi lea. O lenei faataoto—e pei o faataoto uma—e le o faatatau tele i le au faigaluega po o totogi, e sili atu nai lo isi faataoto ia e faatatau i mamoe ma oti. O le tala lenei i le lelei o le Atua, o Lona onosai ma le faamagaloga, ma le Togiola a le Alii o Iesu Keriso. O se tala e uiga i le agalelei ma le agaalofa. O se tala e uiga i le alofa tunoa. Ua faamamafa mai ai le manatu sa ou faalogo i ai i le tele o tausaga ua mavae e mautinoa lava o le mea e sili ona fiafia i ai le Atua i le avea ai ma Atua, o le fiafia lea e maua le alofa mutimutivale, aemaise lava ia i latou e le o faamoemoeina lena mea ma e tele lava ina lagona latou te le agavaa i ai.
Ou te le o iloaina pe o ai o loo i ai i lenei aofia toatele i le asō o manaomia e faalogo i le savali o le faamagaloga lea o loo i ai i lenei faataoto, ae pe o le a lava le tuai ua e mafaufau i ai, pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso e aapa atu ai ia te oe.
Pe lei avea oe ma se tasi o lo matou faatuatuaga pe sa e i ai muamua ma i matou ae lei tumau, e leai ma se mea na e faia pe o le a lava le tulaga sa i ai, e le mafai ona le toe faaleleia. E leai se faafitauli e le mafai ona faatoilaloina. E leai se miti i le gasologa o le olaga nei ma le faavavau e le mafai ona mauaina. E tusa lava pe e te lagonaina o oe o le tagata faigaluega mulimuli ua leiloa o le itula lona sefulutasi, o loo tu mai pea le Alii o le tovine ma talotalo mai. “Tatou faalatalata atu ai ma le faamalosi i le nofoalii o le alofa tunoa,”3 ma faapauu atu i aao o Lē Paia o Isaraelu. O mai ma aai “e leai se tupe, e leai foi se tau”4 i le laoai a le Alii.
Ou te augani faapitoa atu i tane ma tamā, o e o umia le perisitua po o e o faamoemoe e umia le perisitua, e pei ona fai mai ai Liae, ia “Ala mai ia! Ma tutulai mai i le efuefu … ma ia faatamatane.”5 E le o taimi uma ae o alii, ua tele lava ina filifili e le tali atu i le valaau ia “tatou auai.”6 Ua foliga soo mai ua tele atu le naunau o tamaitai ma tamaiti. Uso e, ia siitia [la outou galulue]. Fai mo lo oe lava lelei. Fai mo le lelei o i latou e alolofa ia te oe ma o loo tatalo o le a e tali atu. Fai mo le lelei o le Alii o Iesu Keriso, lea na totogia se tau le mafaamatalaina mo le lumanai ua Ia finagalo ia e maua.
Ou uso e ma tuafafine, ia te outou na ua faamanuiaina e le talalelei mo le tele o tausaga ona sa faamanuiaina outou i le vave mauaina [i o outou olaga], ia te outou na ua o mai i le talalelei i sia mea itiiti ma sia mea itiiti mulimuli ane, ma ia te outou na—ua auai pe lei auai lava—o loo faatalatu lava, ia te outou taitoatasi uma lava, ou te molimau atu i le mana faafouina o le alofa o le Atua ma le vavega o Lona alofa tunoa. O Lona popolega, o le faatuatua o le a e mauaina, ae le o le itula o le aso na e mauaina ai lena faatuatua.
Afai la sa e osia ni feagaiga, tausi i ai. Afai e te lei osia lava, ia osi nei. Afai sa e osia ma e toe solia, ia salamo ma toe faaleleia. E le tuai lava pe afai o loo fetalai mai le Matai o le Tovine o loo i ai pea le taimi. Faamolemole ia faalogo i le uunaiga a le Agaga Paia o loo ta’u atu ia te oe i le taimi nei, i le taimi nei lava, e tatau ona e taliaina le meaalofa togiola a le Alii o Iesu Keriso ma olioli i le faaaumeaina e Lana galuega. Aua le tolopoina. Ua faasolo ina tuai. I le suafa o Iesu Keriso, amene.