“9–15 Novema. Eteru 1–5: ‘Saeia Lena Veli o le Le Talitonu,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“9–15 Novema. Eteru 1–5,” Sau, Mulimuli Mai ia te Au—Mo Tagata Taitoatasi ma Aiga: 2020
Sa Iareto Ua Tuua Papelu, saunia e Albin Veselka
9–15 Novema
Eteru 1–5
“Saeia Lena Veli o le Le Talitonu”
O le tusi o Eteru o le faamaumauga o sa Iareto, o e na taunuu ane i le nuu folafolaina i seneturi a o le’i oo ane sa Nifae. Sa musuia e le Atua ia Moronae e faaaofia ai le faamaumauga a Eteru i le Tusi a Mamona ona o lona taua i o tatou aso. Aisea e te manatu ua taua ai i lou olaga?
Tusifaamaumau Ou Lagona Uunai
E ui e moni o ala a le Atua e maualuluga atu nai lo o tatou ala, ma e tatau ona tatou gauai atu e le aunoa i Lona finagalo, ae ua Ia faamalosiaua i tatou e mafaufau ma galulue mo i tatou lava. O se tasi lena o lesona na aoaoina e Iareto ma lona uso. Mo se faataitaiga, o le manatu o le malaga atu i se laueleele fou lea sa “silisili ona lelei i luga o le lalolagi atoa” sa foliga mai na amataina i totonu o le mafaufau o Iareto, ma “na agaalofa” le Alii ma folafola mai e tali le talosaga, i le fetalai atu, “O le a faapea ona ou faia ia te oe ona o lenei taimi umi ua e tagi mai ai ia te au” (tagai Eteru 1:38–43). Ma ina ua iloa e le uso o Iareto le matuai pogisa o totonu o vaa o le a aveina atu i latou i le nuu folafolaina, sa valaaulia o ia e le Alii e fautua atu se fofo, i le fai mai o se fesili lea e masani ona tatou fai atu ia te Ia: “O le a se mea tou te mananao ia ou faia?” (Eteru 2:23). E foliga mai o le savali e faapea, e le tatau ona tatou faamoemoe e poloai mai le Atua ia i tatou i mea uma. E mafai ona tatou faasoa atu ia te Ia o tatou lava mafaufauga ma manatu, ma o le a Ia faafofoga mai ma tuu mai Lana faamautinoaga a le o lea, e fautuaina i tatou i se isi mea. O nisi taimi, e pau lava le mea o loo vavaeeseina ai i tatou mai faamanuiaga tatou te sailia, o lo tatou lava “veli o le le talitonu,” ma afai e mafai ona tatou “saeia lena veli” (Eteru 4:15), atonu o le a faateia i tatou i mea ua naunau le Alii e faia mo i tatou.
Manatu mo Suesuega Faaletagata Lava Ia o Tusitusiga Paia
Pe a ou tagi atu i le Alii, o le a Ia agalelei mai ia te a’u.
O leEteru 1:33–43 o loo faamatala ai ni tatalo se tolu a le uso o Iareto. O le a se mea ua e aoaoina mai le tali a le Alii i nei tatalo taitasi? Mafaufau i se taimi na e maua ai le agalelei o le Alii ao e tagi atu ia te Ia i le tatalo. Atonu e te manao e tusifaamaumau lenei aafiaga ma faasoa atu i se tasi o ono manaomia ona faalogo i lau molimau.
E mafai ona ou maua faaaliga mo lo’u olaga.
Na saunoa Peresitene Russell M. Nelson: “Ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga e manaomiaina e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga” (“Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 96).
A o e suesue i le Eteru 2; 3:1–6; ma le 4:7–15, o a ni upumoni e te maua e fesoasoani ia e malamalama ai i le auala e saili ai faaaliga faaletagata lava ia? E mafai ona e faailogaina i se lanu se tasi ia fesili po o atugaluga sa i ai a le uso o Iareto, ma mea na ia faia i ai, ae i se isi lanu e mafai ona e faailogaina ai le fesoasoani a le Alii ia te ia ma faailoa mai i ai Lona finagalo. O le a se mea ua faageetia ai oe i le ala na talanoa ai le uso o Iareto ma le Alii, ma o le a se mea ua e aoaoina mai lenei mea e uiga i le ala e faateleina ai le tafe mai o faaaliga i lou olaga?
O le a saunia a’u e le Alii ia sopoia lo’u “moana tele.”
Ina ia oo atu i le nuu folafolaina, sa feagai sa Iareto ma se maagao tele lava: o le sopoiaina o le “moana tele” (Eteru 2:25). O le fasifuaitau “moana tele” e mafai ona avea o se auala fetaui lelei e faamatala ai le ituaiga lagona e maua i o tatou faafitauli ma luitau, Ma o nisi taimi, e pei foi o le tulaga mo sa Iareto, o le sopoiaina o o tatou lava “moana tele” ua na’o le pau lea o le auala e faataunuu ai le finagalo o le Atua mo i tatou. O e vaaia ni mea e talitutusa ai ma lou olaga i le Eteru 2:16–25? O faapefea ona saunia oe e le Alii mo ou luitau? O le a se mea o fetalai mai o Ia e te faia i le taimi nei e saunia ai mo le mea o loo Ia manaomia ona e faia i le lumanai?
Ua foafoaina a’u i le faatusa o le Atua.
I le Mauga o Selema, na aoao ai e le uso o Iareto le tele o mea e uiga i le Atua ma e uiga ia te ia lava. O le a se mea ua aoaoina mai le Eteru 3 e uiga i le natura faaleagaga ma faaletino o le Atua? E mafai faapefea ona fesoasoani lenei upumoni ia te oe e te malamalama ai i lou faasinomaga paia ma lou gafatia?
O i tatou uma lava o fanau a le Atua.
Pe o le uso o Iareto le tagata muamua ua vaai i le Alii?
Na faaali muamua mai e le Atua o Ia lava i isi perofeta nai lo o le uso o Iareto (mo se faataitaiga, tagai i le Mose 7:4, 59), aisea lava na fetalai mai ai le Alii ia te ia, “Ou te Lei faaalia au lava i se tagata”? (Eteru 3:15). Na tuuina mai e Elder Jeffrey R. Holland atonu o le faamalamalamaga lenei: “Sa fetalai atu Keriso i le uso o Iareto, ou te lei faaalia au lava i se tagata i le ala lenei, e aunoa ma lo’u manao, ae ua na’o le faatuatua lava o le tagata ua vaaia na uunaia ai’” (Christ and the New Covenant [1997], 23).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Eteru 1:34–37
O a ni mea tatou te aoaoina mai i nei fuaiupu e uiga i le tatalo mo isi? O a isi upumoni e uiga i le tatalo ua faaali mai i nei fuaiupu?
Eteru 2:16–3:6
O a ni mea ua aoao mai e le uso o Iareto ia i tatou e uiga i le ala e su’e ai tali i o tatou faafitauli ma fesili? Atonu e mafai e tagata o le aiga ona faasoa mai ni aafiaga i se taimi na latou sailia ma maua ai ni tali mai le Alii.
Eteru 4:11–12
A uma ona faitau o nei fuaiupu, e mafai e tagata o le aiga ona tusi i ni fasipepa nisi o mea e fai i aso uma e faatosinaina ai lou aiga (e pei o tifaga, pese, taaloga po o tagata) ma tuu i totonu o se pesini. Ona latou auauai lea e ilo mai se fasipepa e tasi ma talanoa pe na te “tauanauina [i latou] e fai le lelei” (Eteru 4:12). O a ni suiga ua lagonaina e lou aiga le musuia e fai?
Eteru 5
E mafai ona e nanāina se mea faitino po o se mea suamalie i totonu o se atigipusa ma valaaulia se tagata o le aiga e autilo i totonu ma tuu atu i isi tagata uma o le aiga ni faaiteite e fesoasoani latou te mateina ai po o le a lea mea. A o outou faitauina faatasi le Eteru 5 , ia talanoa pe aisea e taua ai le faaaoga e le Alii o molimau i Lana galuega. E mafai faapefea ona tatou faasoa atu i isi la tatou molimau o le Tusi a Mamona?
Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.
Faaleleia o Lo Tatou Aoao Atu
Ia sauniuni i taimi uma. “O avanoa le taualoa e aoao atu ai e vave lava ona pasi, o lea e taua tele le faaaoga o na avanoa pe a oo mai. … Mo se faataitaiga, o se talavou ma se filifiliga faigata e fai atonu e sauni e aoao e uiga i le mauaina o faaaliga faaletagata lava ia” (Teaching in the Savior’s Way, 16).
Pe Na E Vaai Ea I Se Mea E Sili Atu Nai Lo Lenei? saunia e Marcus Alan Vincent