Moronae o Loo Tusitusi i luga o Papatusi Auro, saunia e Dale Kilborn

2–8 Novema

Mamona 7–9

“Ou Te Tautala Atu ia te Outou e Peiseai O Outou Faatasi Mai”

Sa faatuatua Mamona ma Moronae o le a musuia e a laua faamaumauga i latou e ola i aso e gata ai. A e faitauina le Mamona 7-9, tusifaamaumau ia lagona uunai e oo atu ia te oe e uiga i le auala e mafai ona e faaaogaina ai mea o loo e aoaoina.

Tusifaamaumau Ou Lagona Uunai

Na iloa e Mamona ma Moronae le lagona o le tuuatoatasi i se lalolagi amioleaga. Mo Moronae, o le tuuatoatasi atonu ma faapitoa le ogaoga ina ua maliu lona tama i le taua ma na faapea ona faatamaiaina ai sa Nifae. Sa ia tusia, “ua totoe ai nao au lava.” “Ua leai ni au uo po o se mea ou te alu i ai” (Mamona 8:3, 5). Atonu na foliga mai ua leai se faamoemoe, peitai, sa maua e Moronae le faamoemoe i lana molimau i le Faaola ma lona malamalama e faapea, “o le a taavavale pea i luma faamoemoega faavavau o le Alii” (Mamona 8:22). Ma sa iloa e Moronae o le matafaioi autu lava i na faamoemoega e faavavau o le a faia lea e le Tusi a Mamona—le faamaumauga lea ua ia faamaeaina ma le maelega, le faamaumauga lea o le a i ai le aso e “susulu atu i fafo mai le pouliuli” ma aumai ai le toatele o tagata “i le malamalama ia Keriso” (Mamona 8:16; 9:36). O le faatuatua o Moronae i nei folafolaga na mafai ai ona ia tautino atu i le au faitau i le lumanai o lenei tusi, “ou te tautala atu ia te outou e peiseai o outou faatasi mai” ma “ua ou iloa o le a outou mauaina au upu” (Mamona 8:35; 9:30). O lea ua tatou maua ana upu, ma o loo taavale i luma le galueg a le Alii, o se vaega ona sa tumau faamaoni Mamona ma Moronae i a laua misiona, e tusa lava pe na tuuatoatasi i laua.

Manatu mo Suesuega Faaletagata Lava Ia o Tusitusiga Paia

Mamona 7

E tatau ona ou talitonu ia Iesu Keriso ma “taofi mau” i Lana talalelei.

O upu mulimuli na faamaumauina a Mamona, o loo maua i le Mamona 7, o loo saunoa atu ai ia i latou i aso e gata ai e tupuga mai ia sa Lamana, ae o loo i ai upumoni e mo i tatou uma lava. O le a se mea o aoao mai ia te oe e le savali a Mamona e uiga ia Iesu Keriso ma Lana talalelei? Mata aisea na filifili ai e Mamona lenei savali e faaiu ai ana tusitusiga?

Mamona 7:8–10; 8:12–22; 9:31–37

E taua tele le Tusi a Mamona.

Na fesili mai Peresitene Russell M. Nelson: “Afai e ofo atu ia te oe ni taimane po o ni penina po o le Tusi a Mamona, o le a le mea e te filifilia? Ma le faamaoni lava, o le fea ua sili atu lona taua ia te oe?” (“O Le Tusi a Mamona: Faamata e Faapei Lou Olaga e aunoa ma Ia?” Ensign po o le Liahona, Nov. 2017, 61).

Na iloa e Mamona ma Moronae, o le faamaumauga na la tausia o le a taua tele i o tatou aso, o lea na laua faia ai ni osigataulaga maoae e saunia ma puipuia ai. A o e faitau i le Mamona 7:8–10; 8:12–22; ma le 9:31–37, mafaufau pe aisea ua matuai taua ai le faamaumauga i o tatou aso. Atonu e te maua ni malamalamaaga loloto faaopoopo i le 1 Nifae 13:38–41; 2 Nifae 3:11–12; ma le Mataupu Faavae ma Feagaiga 33:16; 42:12–13. O a ni aafiaga ua fesoasoani ia te oe e te iloa ai ua taua tele le Tusi a Mamona?

O tusitusiga a perofeta o Tusi a Mamona e faatatau ia i tatou.

Mamona 8:26–41; 9:1–30

O le Tusi a Mamona na tusia mo o tatou aso.

Sa faaali atu e Iesu Keriso ia Moronae le mea o le a tupu pe a oo mai le Tusi a Mamona (tagai Mamona 8:34–35), ma o le mea na vaai i ai Moronae na oo ai ina ia tuuina mai ni lapataiga malolosi mo o tatou aso. A o e faitau i le Mamona 8:26–41 ma le 9:1–30, mafaufau loloto po o i ai ni faailoga o nei uiga faaalia ma amioga i lou olaga. O le a se mea e mafai ona ese ona e faia?

Mo se faataitaiga, o le Mamona 9:1–30 o loo i ai le savali a Moronae e tali atu ai i le taatele o le leai o se talitonu ia Iesu Keriso lea sa ia muai vaai i ai i o tatou aso. Mafaufau e tusifaamaumau mea ua e aoaoina mai ana upu e uiga i mea nei:

• O taunuuga o le le talitonu ia Keriso (fuaiupu e 1–6, 26)

• O le taua o le talitonu i se Atua o faaaliga ma vavega (fuaiupu e 7–20)

• O fautuaga Moronae mo i tatou (fuaiupu e 21–30)

O a ni mea ua tatou aoao mai ia Moronae e mafai ona fesoasoani ia te oe e aumai ai isi ia latalata atili i le Tama Faalelagi ma Iesu Keriso?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Mamona 7:5–7, 10; 9:11–14

O a mea o aoao mai e nei fuaiupu ia i tatou e uiga i le fuafuaga a le Tama Faalelagi ma le mafuaaga tatou te manaomia ai se Faaola?

Mamona 7:8–10

O le a se mea ua tatou aoao mai le suesueina o le Tusi a Mamona i lenei tausaga ua fesoasoani e faamalosia lou talitonuga i le Tusi Paia? Ina ia amata se talanoaga, e mafai ona outou faitau faatasi nisi o mau mai le Tusi a Mamona ma le Tusi Paia o loo aoao mai ai ni upumoni tutusa, e pei o le Alema 7:11–13 ma le Isaia 53:3–5 po o le 3 Nifae 15:16–24 ma le Ioane 10:16.

Mamona 8:1–9

Mata e faapeī le lagona o le tuuatoatasi e pei ona sa i ai Moronae? O le a se mea ua faagaeetia ai i tatou i le galuega sa ia ausiaina?

Mamona 8:12, 17–21; 9:31

Mafaufau e faitau o se aiga ia fuaiupu nei, ona faitau lea o le saunoaga lea a Elder Jeffrey R. Holland: ‘Vagana ai i le tulaga o Lona Alo Pele e Toatasi e atoatoa, na o tagata lē atoatoa lava sa galue ai le Atua. … A e vaai foi la i ni le atoatoa, ia manatua o le tapulaa e le o i ai i le paia o lenei galuega” (“Le Alii e, Ua Ou Faatuatua,” Ensign po o le Liahona, Me 2013, 94). Aisea e matautia ai le taulai atu i ni le atoatoa o isi, e aofia ai i latou o e na tusia le Tusi a Mamona?

Mamona 8:36–38.

O le a le uiga o le tauave i o tatou luga o le suafa o Iesu Keriso? Aisea e ono maasiasi ai se tagata e tauave i ona luga le suafa o Iesu Keriso? E mafai faapefea ona tatou totoa ia tatou molimau e uiga i le Faaola?

Mamona 9:16–24

E i ai mea faapitoa e manaomia mo se faataitaiga faasaienisi po o se kuka ina ia aoga lelei ai. Mafaufau e faia o se aiga se faataitaiga [faasaienisi] po o le faia o se kuka e sili ona fiafia i ai ao lei faitauina le Mamona 9:16–24. A o outou faitau i fuaiupu (ae maise lava fuaiupu e 20–21), vaavaai mo “mea” e manaomia ia tutupu ai ni vavega. O a ni vavega o mafai ona tatou vaaia i le lalolagi o loo siomia ai i tatou ma i totonu o lo tatou aiga?

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.

Faaleleia o Suesuega Faaletagata Lava Ia

Tagai i punaoa aloaia a le Ekalesia. Afai e i ai ni au fesili o le talalelei o punaoa aupito sili ona lelei mo tali o le tatalo, o tusitusiga paia, o upu a perofeta soifua, ma isi lomiga aloaia a le Ekalesia (tagai Aoao Atu i le Ala o le Faaola, 17-18), 23–24).

O Mamona o loo Otootoina ia Papatusi, saunia e Jon McNaughton