“23–29 Novema. Eteru 12-15: ‘O Le Faatuatua e Faataunuu ai Mea Uma,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“23–29 Novema. Eteru 12–15,” Sau, Mulimuli Mai ia te Au—Mo Tagata Taitoatasi ma Aiga: 2020
O Eteru o loo Lafi i le Ana o se Papa, saunia e Gary Earnest Smith
23–29 Novema
Eteru 12–15
“O Le Faatuatua e Faataunuu ai Mea Uma”
O le tusifaamaumauina o uunaiga e mafai ona valaaulia ai nisi faaaliga ma faamalosia ai lau molimau. E fesoasoani foi e te manatua ai ou aafiaga ma faasoa atu ai i isi i le lumanai.
Tusifaamaumau Ou Lagona Uunai
O valoaga a Eteru ia sa Iareto sa “tetele ma ofoofogia” (Eteru 12:5). Sa ia “tau atu moni lava ia te i latou e uiga i mea uma, mai le amataga o tagata” (Eteru 13:2). Sa ia muai vaai “i aso o Keriso” ma le Ierusalema Fou i aso e gata ai (Eteru 13:4). Sa ia tautala foi e uiga i le “faamoemoe mo se lalolagi sili atu ona lelei, ioe, se nofoaga lava i le aao taumatau o le Atua” (Eteru 12:4). Peitai na teena e sa Iareto ana upu, mo le mafuaaga lava lea sa masani ona teena ai e tagata valoaga a auauna a le Atua i aso nei—“sa latou le [vaai] i ai” (Eteru 12:5). E manaomia le faatuatua e talitonu ai i folafolaga po o lapataiga e uiga i mea e le mafai ona tatou vaaia, e pei lava ona manaomia le faatuatua mo Eteru e vavalo ai e uiga i “mea tetele ma ofoofogia” i se nuu le talitonu. Sa manaomia e Moronae le faatuatua e faalagolago ai i le Alii ia avea lona “vaivai i le tusitusi” ma liliu ia avea o se malosiaga (tagai Eteru 12:23–27). O le ituaiga faatuatua lenei e faia i tatou ia “mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua” (Eteru 12:4). Ma o le ituaiga faatuatua lenei e “faataunuu ai mea uma” (Eteru 12:3).
Manatu mo Suesuega Faaletagata Lava Ia o Tusitusiga Paia
O le faatuatua ia Iesu Keriso e mafai ona taitai atu ai i vavega tetele.
E toatele tagata i aso nei, e pei o sa Iareto i aso o Eteru, sa mananao e vaai i faamaoniga ona faatoa latou talitonu ai lea i le Atua ma Lona mana. “O le faatuatua o le mea lea ua faamoemoe i ai, a e le o vaaia; o lea aua le fefinauai ai ona ua le vaaia e outou, aua e le maua e outou se mau, seia uma le tofotofoina o lo outou faatuatua” (Eteru 12:6).
Ia maitau o taimi taitasi e te tau ai i le upu “faatuatua” i le Eteru 12, ma tusifaamaumau mea e te aoaoina e uiga i le faatuatua. Vaai mo tali i fesili e pei o nei: O le a le faatuatua? O a fua o se olaga e faatumulia i le faatuatua? E mafai foi ona tusifaamaumau ou manatu e uiga i molimau ua e mauaina ina ua “uma ona tofotofoina o lo outou faatuatua” (Eteru 12:6).
E aumai e Iesu Keriso ia i tatou “se faamoemoe lelei silisili atu.”
E faaopoopo atu i malamalamaaga loloto moni e uiga i le faatuatua, o loo i ai i le Eteru 12 ni upu se tele e uiga i le faamoemoe—atonu e mafai ona e maitaulia taimi taitasi e vaaia ai le upu “faamoemoe”. O le a le uiga o le faamoemoe ia te oe? O a ni mafuaaga sa i ai ia Eteru na “faamoemoe [ai] mo se lalolagi sili atu ona lelei”? (tagai Eteru 12:2–5). O a ni auala ua tuuina mai ai e le talalelei a Iesu Keriso ia te oe “se faamoemoe lelei silisili atu”? (Eteru 12:32).
Asiasi i le GiveThanks.ChurchofJesusChrist.org e faalogo ai i se savali mai ia Peresitene Russell M. Nelson e uiga i le ala e maua ai le filemu ma le faamalologa—e tusa lava po o a ou tulaga.
Tagai foi Moronae 7:40–41; Dieter F. Uchtdorf, “O Le Mana e Le Iu o le Faamoemoe,” Ensign po o le Liahona, Nov. 2008, 21–24; Tala’ La’u Talalelei, 117.
E mafai ona fai e Iesu Keriso mea vaivai e avea ma mea malolosi.
A tatou faitau i tusitusiga mamana a Moronae, e faigofie ona galo le faapea sa popole o ia e uiga i lona “vaivai i le tusitusi” ma sa popole ia ne’i ula tagata i ana upu (tagai Eteru 12:23–25). Ae na folafola mai e le Atua o le a Ia “faia lea o mea vaivai ia avea ma mea malolosi” mo e lotomaualalo (fuaiupu e 27), ma o le mana faaleagaga i tusitusiga a Moronae o se faamaoniga faatalitonuina na faataunuuina e le Alii lenei folafolaga.
A uma ona faitau le Eteru 12:23–29, mafaufau loloto i ni taimi na fesoasoani ai le Atua ina ia e iloa ou vaivaiga ma faamalosia ai oe e ui lava i na vaivaiga. Atonu o se taimi lelei foi lea e mafaufau ai e uiga i vaivaiga o loo e tauivi ai i le taimi lenei. O a ni mea e te lagona e tatau ona e faia e faalotomaualalo ai oe lava i luma o le Alii ma faaali atu ai le faatuatua ia te Ia ina ia mafai ona maua Lana folafolaga o le “faia lea o mea vaivai ia avea ma mea malolosi”? (Eteru 12:27).
A o e mafaufau loloto i nei fuaiupu, atonu e aoga ia malamalamaaga loloto nei mai ia Elder Neal A. Maxwell: “A tatou faitau i tusitusiga paia e uiga i ‘vaivaiga’ o le tagata, o lenei faaupuga e aofia ai le … vaivaiga lea na maua mai i le tulaga aoao faaletagata soifua lea e i ai se aafiaga faifaipea o le tino i luga o le agaga (tagai Eteru 12:28–29). Ae peitai, o vaivaiga e faapena foi ona aofia ai o tatou vaivaiga patino taitoatasi, lea e faamoemoe tatou te faatoilaloina (tagai Mataupu Faavae ma Feagaiga 66:3; Iakopo 4:7)” (Lord, Increase Our Faith [1994], 84).
Tagai foi “Grace,” Gospel Topics, topics.ChurchofJesusChrist.org.
O le teenaina o perofeta e oo mai ai mea matautia faaleagaga.
O le avea ma tupu o sa Iareto, sa, i lona tulaga o le talafaasolopito, o se tulaga matautia. Sa faapitoa ona moni lenei mea mo Korianetuma, ona e toatele “ni tagata malolosi, … na saili e faaumatia o ia” (Eteru 13:15–16). I le Eteru 13:15–22, maitau le mea na faia e Korianetuma e puipui ai o ia lava ma le mea na fautuaina o ia e le perofeta o Eteru e fai. A o e faitau i vaega o totoe o le tusi o Eteru, ia mafaufau loloto i taunuuga o le teenaina o perofeta. O le a le mea e tupu i tagata pe a “[taofi] le toe taumafai o le Agaga o le Alii ia te i latou”? (Eteru 15:19).
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Eteru 12:7–22
A o outou faitaua faatasi nei fuaiupu, atonu e te toe faamanatuina nisi o faataitaiga musuia o le faatuatua sa outou faitau e uiga i ai i le Tusi a Mamona. O lenei mea e mafai ona oo atu i se talanoaga e uiga i faataitaiga o le faatuatua i totonu o lou talafaasolopito faaleaiga po o outou lava olaga—mafaufau e tusifaamaumau nei aafiaga pe afai e te le’i faia.
Eteru 12:27
Aisea e tuuina mai ai e le Alii vaivaiga ia i tatou? O le a la tatou vaega i le faia o “mea vaivai ia avea ma mea malolosi”? O le a le vaega a le Faaola?
Eteru 12:41
O i ai se auala malie e mafai ona e aoao ai tamaiti e “saili … Iesu”? O se tasi o auala, o le nana lea o se ata o Iesu ae valaaulia tagata o lou aiga e “saili” ma su’e le ata. E faapefea ona tatou sailia Iesu, ma e faapefea ona faamanuiaina i tatou pe a tatou maua o Ia?
Eteru 13:13–14; 15:19, 33–34
Atonu o le a manaia i tagata o lou aiga le faatusatusa o aafiaga o Eteru i aafiaga o Mamona ma Moronae (tagai Mamona 6; 8:1–10). E faapefea ona tutusa i latou? E faapefea ona tutusa le ala i le faatamaiaga o sa Nifae ma le ala o sa Iareto? (faatusatusa le Eteru 15:19 ma le Moronae 8:28). O a upumoni ua tatou aoao mai e mafai ona fesoasoani ia i tatou e aloese ai mai le mea na tupu ia i latou?
Mo nisi manatu mo le aoaoina o fanau tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.
Faaleleia o Lo Tatou Aoao Atu
Uunaia fesili. O le natura lava o tamaiti o le fia iloa o lea mea ma lea mea. O nisi taimi atonu e te vaai ai i a latou fesili o ni mea e faalavelave mai le mea o loo e taumafai e aoao atu. Nai lo o lena, ia vaai atu i fesili o ni avanoa. O ni faailoga na ua saunia tamaiti e aoao—latou te avatu ia te oe se malamalamaaga loloto i atugaluga o lau fanau ma o latou lagona e uiga i mea o loo latou aoaoina (tagai Teaching in the Savior’s Way, 25–26).
O Le Ofoofogia Valoaga a Eteru, saunia e Walter Rane