1 Ma o lenei sa amata ona i ai o se fetuu tele i luga o le laueleele atoa ona o le amioletonu o tagata, lea a tuu ai e se tagata sana meafaigaluega po o lana pelu i luga o lana fata, po o luga o se mea e manao o ia e teu ai, faauta, o le aso e sosoo ai, e le mafai ona ia toe maua, ona o le tetele tele o le fetuu i luga o le laueleele.

2 O le mea lea sa uumau ai e tagata taitoatasi ana lava mea, i ona lima, ma lē fia nonō mai pe faaune atu e ia; ma sa taitasi le tagata ma uu le au o lana pelu i lona lima taumatau, i le puipuiga o ana meatotino ma lona lava ola, ma ola o ana avā ma fanau.

3 Ma o lenei, ina ua mavae le va o le lua tausaga, ma ina ua mavae le oti o Sareto, faauta, sa tu mai le uso o Sareto ma tau o ia ma Korianetuma, lea na faatoilalo ai o ia e Korianetuma ma tuliloa ia te ia e oo atu i le vao o Akiso.

4 Ma sa oo ina tau le uso o Sareto ma ia i le vao o Akiso; ma sa oo ina matuā tuga tele le taua, ma e afe ma afe na pa’u’ū ai i le pelu.

5 Ma sa oo ina si’o e Korianetuma le vao; ma sa savavali atu le uso o Sareto mai le vao i le po, ma fasioti se vaega o le autau a Korianetuma, a’o onanā i latou.

6 Ma sa alu atu o ia i le laueleele o Morona, ma ua nofo o ia lava i luga o le nofoalii o Korianetuma.

7 Ma sa oo ina nonofo Korianetuma ma lana autau i le vao mo le va o le lua tausaga, lea na ia maua ai se malosi tele i lana autau.

8 O lenei, o le uso o Sareto, o lona igoa o Kiliata, sa ia maua foi se malosi tele i lana autau, ona o faapotopotoga faalilolilo.

9 Ma sa oo ina fasioti o ia e lana faitaulaga sili a’o nofo o ia i luga o lona nofoalii.

10 Ma sa oo ina fasioti o ia e se tasi o faapotopotoga faalilolilo i totonu o se auala faalilolilo, ma ia maua ai mo ia lava le malo; ma o lona igoa o Lipi; ma o Lipi o se tagata tino ese maualuga, sa sili atu nai lo se isi lava tagata i totonu o le nuu atoa.

11 Ma sa oo i le tausaga muamua o Lipi, na sau ai Korianetuma i luga i le laueleele o Morona, ma tau ma Lipi.

12 Ma sa oo ina tau o ia ma Lipi, lea na ta ai e Lipi lona lima lea na manu’a ai o ia; ae ui i lea, sa fetaomi atu i luma le autau a Korianetuma i luga o Lipi, sa oo ina sola o ia i tuaoi i luga o le matafaga.

13 Ma sa oo ina tuliloa o ia e Korianetuma; ma sa tau o ia ma Lipi i luga o le matafaga.

14 Ma sa oo ina taia e Lipi le autau a Korianetuma, sa oo ina latou toe sosola ai i le vao o Akiso.

15 Ma sa oo ina tuliloa o ia e Lipi seia oo ina oo mai o ia i fanua laugatasi o Akosa. Ma sa ave e Korianetuma tagata uma faatasi ma ia a’o sola o ia i luma o Lipi, i le vaega lena o le laueleele na ia sola atu i ai.

16 Ma ina ua oo mai o ia i fanua laugatasi o Akosa, sa tau o ia ma Lipi, ma sa ia taia o ia seia oo ina oti ai; ae ui i lea, sa sau le uso o Lipi e faasaga ia Korianetuma e sui ia te ia, ma sa oo ina matuā tuga tele lava le taua, lea na toe sola ai Korianetuma i luma o le autau a le uso o Lipi.

17 O lenei o le igoa o le uso o Lipi sa ta’ua o Sesa. Ma sa o’o ina tuliloa e Sesa ia Korianetuma, ma sa faatoilalo e ia aai e tele, ma sa ia fasiotia fafine ma tamaiti, ma ia susunu aai.

18 Ma sa oo atu i le laueleele atoa le fefefe ia Sesa; ioe, sa alu atu se alaga i le laueleele atoa—O ai e mafai ona tu atu i luma o le autau a Sesa? Faauta, ua tafi e ia le laueleele i ona luma!

19 Ma sa oo ina amata ona lolofi faatasi mai tagata i ana autau, i luga o le laueleele atoa.

20 Ma sa vaeluaina i latou; o se vaega o i latou sa sosola atu i le autau a Sesa, ma o se vaega o i latou sa sosola atu i le autau a Korianetuma.

21 Ma ona o le tetele tele ma le umi o le taua, ma umi ona avea ma vaaiga o le faamasaa toto ma tagata feoti, sa oo ina ufitia ai luga o le laueleele atoa i tino o tagata oti.

22 Ma sa televave ma taalise tele le taua sa leai ni isi na totoe e tanumia tagata oti, ae sa latou savavali atu i luma mai i le faamasaaina o le toto i le faamasaaina o le toto, ma tuu ai tino o tane, fafine, ma tamaiti e salalau solo i luga o le laueleele, e fai ma meaai a anufe o le tino.

23 Ma ua alu atu lo latou manogi i luga o le laueleele, ioe, i luga o le laueleele atoa uma lava; o le mea lea na mafatia ai tagata i le ao ma le po, ona o le manogi na i ai.

24 Ae ui i lea, sa le tuua e Sesa le tuliloaina o Korianetuma; ona sa tauto o ia o le a ia taui i luga o Korianetuma le toto o lona uso, o lē ua fasiotia, ma le fetalaiga a le Alii lea na oo mai ia Eteru e faapea o le a le oti lava Korianetuma i le pelu.

25 Ma ua faapea ona tatou vaai ai sa asiasi mai lava le Alii ia te i latou i le atoatoa o lona toasa, ma ua saunia e lo latou amioleaga ma a latou mea inosia se ala mo lo latou faaumatiaina e faavavau.

26 Ma sa oo ina tuliloa e Sesa ia Korianetuma agai i sasae, seia oo mai lava i tuaoi i tafatafa o le matafaga, ma o iina na tau ai o ia ma Sesa mo le va o aso e tolu.

27 Ma sa matuā matautia tele le faafanoga i totonu o autau a Sesa sa amata ona matata’u tagata, ma amata ona sosola mai luma o autau a Korianetuma; ma sa latou sosola atu i le laueleele o Kori’oa, ma tafi ese mai o latou luma tagata sa nonofo ai, i latou uma ia o ē sa le fia au faatasi ma i latou.

28 Ma sa latou faatutū o latou faleie i le vanu o Kori’oa; ma sa faatutū e Korianetuma ona faleie i le vanu o Suro. O lenei o le vanu o Suro sa latalata i le maupu’epu’e o Kominoa; o le mea lea, na faapotopoto faatasi ai e Korianetuma ana autau i luga o le maupu’epu’e o Kominoa, ma ili atu se pu i autau a Sesa e valaau atu ai ia te i latou e o mai e tau.

29 Ma sa oo ina latou o mai, peitai sa toe tulia i latou; ma sa latou o mai faalua, ma sa toe tulia foi i latou i le taimi lona lua. Ma sa oo ina latou toe o mai i le taimi lona tolu, ma sa oo ina tugā tele lava le taua.

30 Ma sa oo ina taia e Sesa ia Korianetuma ma sa oo ina ia faaoo atu ia te ia ni manu’a loloto e tele; ma o Korianetuma, ona o le tele o lona toto ua masaa, na matapogia, ma sa aveese atu o ia e peiseai ua oti.

31 O lenei ona o le toatele naua o tane, fafine, ma tamaiti na fasiotia i itu uma e lua, o lea na faatonu ai e Sesa ona tagata ia aua nei o latou tuliloaina autau a Korianetuma; o le mea lea, na latou toe foi atu ai i la latou togalauapi.