Minerva Teichert (1888–1976), Ua Papatiso Alema i Vai o Mamona, 1949–1951, suauu i luga o le laupapa faamasone, 35 x 47 inisi. Falemataaga o Faatufugaga a le Iunivesite a Polika Iaga, 1969

30 Novema–6 Tesema

Moronae 1–6

“Ma Tausia i le Afioga Lelei a le Atua”

Sa tusifaamaumauina e Moronae mea sa ia faamoemoe o le a “atonu o le a aoga … i se aso i le lumanai” (Moronae 1:4). O a ni mea e te maua i le Moronae 1–6 e aoga ia te oe? Tusifaamaumau mea e te maua, ma mafaufau e faasoa atu i se tasi atonu na te faatauaina.

Tusifaamaumau Ou Lagona Uunai

Ina ua uma ona faamaeaina faamaumauga a lona tama e uiga ia sa Nifae ma le otootoina o faamaumauga a sa Iareto, sa manatu ai Moronae e faapea, ua uma lana galuega o le tusifaamaumauina o faamaumauga (tagai Moronae 1:1). O a isi mea sa i ai e ta’u mai e uiga i malo e lua ia na iu lava ina matuai faatamaiaina uma? Peitai, sa vaai Moronae i o tatou aso, (tagai Mamona 8:35), ma sa musuia o ia e “tusia ni nai faaopoopo itiiti, atonu o le a aoga … i se aso i le lumanai” (Moronae 1:4). Sa ia iloaina ua oo mai le salalau o le liliuese, ua aumaia faatasi ai ma le le mautonu e uiga i sauniga o le perisitua ma le tulaga aoao o tapuaiga. Atonu o le mafuaaga lea na ia tuuina mai ai ni faamatalaga manino e uiga i le faamanatuga, papatisoga, tuuina atu o le meaalofa o le Agaga Paia, ma le faamanuiaga o le faapotopotoina o uso a talitonu ia “ faatutumau ai i latou i le ala sao … ua nao galuega a Keriso, o le pogai ma le iuga o lo [tatou] faatuatua, ua faalagolago i ai” (Moronae 6:4). O malamalamaaga loloto taua faapenei tatou te maua ai le pogai e faafetaia ai le faasaosaoina e le Alii o le ola o Moronae ina ia mafai ona ia “tusia ai ni isi mea faaopoopo itiiti” (Moronae 1:4).

Manatu mo Suesuega Faaletagata Lava Ia o Tusitusiga Paia

Moronae 1

E tumau le faamaoni o soo o Iesu Keriso e ui lava i mea faafeagai.

Mo nisi o tagata, e faigofie atu ona faamaoni i taimi o le sologa lelei ma lagomalie. Ae i le avea ai ma ni soo o Iesu Keriso, e tatau ona tumau lo tatou faamaoni e tusa lava pe tatou te feagai ma faafitauli ma mea faafeagai. A o e faitau i le Moronae 1, o le a se mea ua musuia ai oe e uiga i le faamaoni o Moronae i le Alii ma i lona valaauga? E mafai faapefea ona e mulimuli i lana faataitaiga?

Moronae 2–6

E tatau ona faataunuuina ia sauniga o le perisitua e pei ona poloaiina ai e le Alii.

I le taimi o Lana auaunaga i le lalolagi, sa maua ma faataunuu ai e le Faaola ia sauniga paia, e pei o le papatisoga (tagai Mataio 3:13–17; Faaliliuga a Iosefa Samita, Ioane 4:1–3 [i le faaopoopoga o le Tusi Paia]), faaeega i le perisitua (tagai Mareko 3:13–19), ma le faamanatuga (tagai Mataio 26:26–28). Ae peitai, ona o le Liliuese Tele, ua toatele tagata i aso nei ua le mautonu i auala e tatau ona faatinoina ai sauniga—ma pe manaomia foi ia sauniga. I le Moronae 2–6, na tuuina mai ai e Moronae ni faamatalaga taua e uiga i ni sauniga perisitua faapitoa ia e mafai ona fesoasoani e aveese ai nisi o na le mautonu. O a ni lagona e oo mai ia te oe ao e aoao e uiga i sauniga i nei mataupu? O nisi nei o fesili e te ono fesiligia e fesoasoani e te aoao ai.

Faamauga (Moronae 2; 6:4).O a ni mea o aoao mai e aoaoga a le Faaola i le Moronae 2:2 ia te oe e uiga i le sauniga o le faamauga? O le a sou manatu i le uiga o le ia “galueaiina ma faamamaina e le mana o le Agaga Paia”? (Moronae 6:4).

Faaeega o le perisitua (Moronae 3).O le a se mea e te maua i lenei mataupu e mafai ona fesoasoani i se tasi e saunia ai ia faaeeina i le perisitua? O le a se mea e te maua e mafai ona fesoasoani i se tagata e faatino ai se faauuga?

O le faamanatuga (Moronae 4–5; 6:6).Maitau folafolaga o loo i tatalo o le faamanatuga (tagai Moronae 4:3; 5:2), ma mafaufau loloto i mea o loo e faia e tausi ai au folafolaga. O a ni mea e mafai ona e faia e valaaulia ai le faatosinaga atili mamana a le Agaga Paia ao e auai i le faamanatuga?

Papatisoga (Moronae 6:1–3).O le a se mea e mafai ona e faia e faaauau ai ona ausia tulaga e agavaa ai mo le papatisoga ua tuuina mai i nei fuaiupu, pe uma lava foi ona e papatiso? O a ni mea o fautua mai e nei fuaiupu ia te oe e uiga i le avea ma se tagata o le Ekalesia a Iesu Keriso?

E tusa ai ma mea ua e aoaoina, o le a faapefea ona e suia le ala e te mafaufau ai e uiga i, auai ai i, pe saunia ai isi mo nei sauniga? Aisea e taua ai mo nei sauniga ona “faamanuia ma tufa atu … e tusa ma poloaiga a Keriso”? (Moronae 4:1).

Tagai foi “Ordinances,” Gospel Topics, topics.ChurchofJesusChrist.org.

Na aoao mai e Iesu le ala e tatau ona faatinoina ai sauniga.

Moronae 6:4–9

Ua vaavaai soo o Iesu Keriso mo le manuia o le tasi ma le isi.

E ui e moni o i tatou uma lava e “galueaiina o [tatou] lava olataga” (Mamona 9:27), ae ua aoao mai foi Moronae o le “[faa]potopoto soo faatasi” ma uso a talitonu e mafai ona fesoasoani e faatumau ai i tatou “i le ala sa’o” (Moronae 6:4–5). A o e faitau i le Moronae 6:4–9, mafaufau loloto i faamanuiaga e oo mai mai le “faitauina … i totonu o tagata o le ekalesia a Keriso” (Moronae 6:4). E mafai faapefea ona e fesoasoani ia faia ou aafiaga ma aafiaga o isi i le lotu ia avea atili e pei o le aafiaga ua faamatala mai e Moronae, e tusa lava po o oe o se taitai po o se tagata auai?

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Moronae 1; Moronae 6:3

O le a le uiga o le “faafitia o le Keriso”? (Moronae 1:2–3). E mafai faapefea ona faaalia lo tatou “mauai e auauna atu ia te ia e oo i le iuga”?? (Moronae 6:3). Faasoa atu ni faataitaiga o ni tagata e te iloa o e ua i ai lenei mauai e auauna ia te Ia.

Moronae 4:3; Moronae 5:2

O le faitauina o se aiga o tatalo o le faamanatuga e mafai ona taitai atu ai i se talanoaga e uiga i le faia o le faamanatuga ma le migao faateleina. Atonu e mafai ona talatalanoa tagata o le aiga i fuaitau mai nei tatalo e faapitoa ona anoa ia i latou. E mafai foi ona latou tusifaamaumauina o latou manatu e uiga i nei fuaitau pe tusi se ata e fesoasoani latou te mafaufau ai i le Faaola. E mafai ona latou aumaia mea na latou tusitusia po o ni ata na tusia i le sauniga faamanatuga e fesoasoani ia taulai atu ai o latou mafaufauga ia te Ia. Ta’u atu i lou aiga ou lagona e uiga i le faamanatuga ma le taulaga a le Faaola.

Moronae 6:1–4

O le a le uiga o le i ai o se “loto momomo ma se agaga salamo”? (Moronae 6:2). E faapefea ona fesoasoani lenei mea ia i tatou e saunia ai mo le papatisoga? E ono faapefea ona fesoasoani ia i tatou pe a uma ona tatou papatiso?

Moronae 6:4–9

E tusa ai ma nei fuaiupu, o a nisi o faamanuiaga e oo mai mai le “faitauina … i totonu o tagata o le ekalesia a Keriso”? (Moronae 6:4). Aisea tatou te manaomia ai le Ekalesia?

Moronae 6:8

O le a se mea ua aoao mai e fuaiupu e uiga i le salamo? O le a le uiga o le sailia le faamagaloga ma le “faamoemoe faamaoni”?? (Moronae 6:8). Mafaufau e usu se pese e faatatau i le faamagalo atu, e pei o le “Fesoasoani Mai Ia te A’u Tama Pele” (Tusipese a Tamaiti,52).

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.

Faaleleia o Suesuega Faaletagata Lava Ia

Su’e faamaoniga o le alofa o le Atua. Ua aoao mai Peresitene M.Russell Ballard, “[O le] talalelei o se talalelei o le alofa—alofa i le Atua ma le alofa i le tasi ma le isi” (God’s Love for His Children,” Ensign, Me 1988, 59). A o e faitau i tusitusiga paia, mafaufau e tusi i lalo pe faailoga faamaoniga o le alofa o le Atua mo oe ma Ana fanau uma.

Moronae i totonu o le Ana, saunia e Jorge Cocco