E Mafai Ona Outou Iloa Ai, saunia e Gary L. Kapp

14–20 Tesema

Moronae 10

“O Mai ia Keriso, ma Faaatoatoaina Ia Te Ia”

A o faauma ona e faitau i le Tusi a Mamona, mafaufau e saili se molimau faafouina mai le Agaga Paia e faapea ua moni lea. A o e faia, tusifaamaumau ni lagona e te maua.

Tusifaamaumau Ou Lagona Uunai

Ua amatalia le Tusi a Mamona i le folafolaga a sa Nifae e faaali mai ai ia i tatou, “le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua” (1 Nifae 1:20). Ua faaiuina le tusi i se savali talitutusa lava mai ia Moronae ao sauni o ia e “faamaufaailoga” ia faamaumauga: ua ia valaauliaina i tatou ia “le alofa mutimutivale tele o le Alii” (Moronae 10:2–3). E tusa lava pe na ona tatou mafaufau i le tele o alofa mutimutivale ua faamaumauina i le Tusi a Mamona, ua aumaia e lenei mea ia i tatou ni mea e tele e mafaufau i ai. O a ni faataitaiga e oo mai i lou mafaufau? Atonu e te mafaufau loloto i auala alofa mutimutivale na taitaia ai e le Atua ia le aiga o Liae e ui atu i le vaomatua ma sopoia ai vai e tele, o le alofa mutimutivale sa Ia faaalia ia Enosa ina ua matelaina lona agaga mo le faamagaloga, po o le alofa mutimutivale sa Ia faaalia ia Alema, o se fili saua o le Ekalesia o lē na avea ma se tasi o ona talipupuni le fefe. Pe atonu e liliu atu foi o tatou mafaufauga i le alofa mutimutivale na faaalia e le Faaola toetu i tagata ina ua Ia faamaloloina e mama’i ma faamanuiaina a latou fanau laiti. Ae atonu o le mea aupito taua, o ia mea uma e mafai ona faamanatu ai ia te oe le “alofa tunoa o le Alii” ia te outou, aua o le tasi o faamoemoega autu o le Tusi a Mamona o le valaaulia lea o i tatou taitoatasi ia maua le alofa mutimutivale o le Atua—o se valaaulia na faaalia faafaigofie mai i upu faatofa a Moronae, “O mai ia Keriso, ma faaatoatoaina ia te ia” (Moronae 10:32).

Manatu mo Suesuega Faaletagata Lava Ia o Tusitusiga Paia

Moronae 10:3–7

E mafai ona ou iloa le moni e ala i le mana o le Agaga Paia.

O le folafolaga o loo i le Moronae 10:3–7 ua suia ai olaga o le faitau miliona o tagata i le lalolagi atoa. Ua faapefea ona suia ai lou olaga? Pe o e saili ia maua pe ia faamalosia lau molimau o le Tusi a Mamona, o le valaaulia a Moronae e faatatau ia te oe. A’o e faitau i le Moronae 10:3--7, mafaufau ia faitau ma le toto’a faateleina nai lo lau faitauga i taimi ua sola. E mafai ona e iloiloina ia fasifuaitau taitasi, ma fesili ifo ia te oe lava i fesili e pei o nei: O le a le uiga o lenei mea? E faapefea ona ou faia lenei mea ia lelei tele atu? O a ni aafiaga na ou maua i lenei mea? Ua faapefea ona faaali mai e le Agaga Paia le moni o le Tusi a Mamona ia te a’u?

Ia mafaufau foi i se tasi o loo manaomia ona faalogo i lau molimau e uiga i le Tusi a Mamona. O le a faapefea ona e fesoasoani i lena tagata e saili lana lava molimau?

Moronae 10:8-25

“Ia … le faafitia meaalofa a le Atua,”

E tele auala e mafai ai e se tagata ona “faafitia meaalofa a le Atua” (Moronae 10:8). O nisi tagata ua faafitia le i ai o nei meaalofa. O isi e ono faafitia le faapea, o ia i latou ni meaalofa faaleagaga ae latou te vaaia le i ai i isi tagata. Ae o isi foi e faafitia a latou meaalofa i le le amanaiaina o i latou po o le le atinaeina o meaalofa.

A o e faitau i le Moronae 10:8–25, vaavaai mo upumoni o le a fesoasoani e te iloa ai au meaalofa faaleagaga ma faaaoga i latou ma le malosi sili atu e faamanuia ai oe lava ma isi. Saili ni malamalamaaga loloto e uiga i meaalofa ua tuuina mai e le Atua ia te oe, po o meaalofa e finagalo o Ia e te sailia. Aisea e taua ai le “manatua o meaalofa lelei uma e mai ia Keriso”? (Moronae 10:18).

Mafaufau foi i le fautuaga lenei mai ia Elder John C. Pingree Jr.: “E faapefea la ona tatou iloa a tatou meaalofa? E mafai ona faasino i o tatou faamanuiaga faapeteriaka, fesili atu ia i latou e iloa lelei i tatou, ma faailoa patino mai mea tatou te lelei ai ma fiafia i ai. O le mea e sili ona taua, e mafai ona tatou fesili atu i le Atua (tagai Iakopo 1:5; MFF 112:10). Na te silafia a tatou meaalofa, ona o Ia na foai maia ia te i tatou” (“Ua ia te A’u Se Galuega mo Oe,” Ensign po o le Liahona, Nov. 2017, 33).

Tagai Taiala i Tusitusiga Paia, “Gifts of the Spirit,” scriptures.ChurchofJesusChrist.org.

Moronae 10:30–33

E mafai ona faaatoatoaina a’u e ala i le Togiola a Iesu Keriso.

O le apoapoaiga a Moronae ia “o mai ia Keriso” e tele atu mea e aofia ai nai lo na o le aoao e uiga ia te Ia po o le mafaufau soo ia te Ia pe o le taumafai malosi atu foi e tausi Ana poloaiga, e ui lava e taua nei mea. Ae, o lenei valaaulia ia o mai ia Keriso i lona aano aupito atoatoa e mafai ona oo i ai—o le ia avea e pei o Ia. A o e faitau i le Moronae 10:30–33, ia maitau fuaitau e fesoasoani e te malamalama ai i le uiga o le o mai atoatoa ia Keriso, e pei o le “taofimau i meaalofa lelei uma,” “faafiti outou lava mai mea uma e le faaleatua,” ma le, ioe, “ia faaatoatoaina ia te ia” (ua faaopoopo le faatusilima).

E faapefea ona mafaia lenei mea? Vaavaai mo tali i le Moronae 10:30–33. O le a se mea o ta’u atu e le Agaga ia te oe e tatau ona e faia ina ia faaatoatoaina atili ai le “o mai ia Keriso, ma ia faaatoatoaina ia te ia”?

Tagai Ominae 1:26; Guide to the Scriptures, “Perfect,” scriptures.ChurchofJesusChrist.org.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Moronae 10

Faitau faatasi le mataupu lenei, vaavaai mo taimi uma lava e faaaogaina ai e Moronae le upu apoapoai. Lisi pe faailoga mea o loo apoapoai mai ai Moronae—po o faamalosiau malosi mai—tatou te faia. O le a se mea e mafai ona tatou faia e mulimuli ai i ana apoapoaiga?

Moronae 10:3

O le a se mea ua tatou aoao mai e uiga i le alofa mutimutivale o le Alii a o tatou faitauina le Tusi a Mamona i lenei tausaga? O faapefea ona alofa mutimutivale mai le Alii i lo tatou aiga?

Moronae 10:3–5

A uma ona faitau nei fuaiupu, atonu e te fesili atu i tagata o lou aiga e faasoa mai pe na faapefea ona latou iloa e moni le Tusi a Mamona. Mafaufau e usu faatasi se pese e uiga i le sailiga o le upumoni, e pei o le “Saili, Mafaufau Loloto, ma Tatalo” (Tusipese a Tamaiti,66). Atonu e mafai foi ona e valaaulia tagata o le aiga e tusifaamaumau a latou molimau i se apitalaaga o le aiga.

Moronae 10:8-18

O le Kerisimasi o se taimi masani lea e mafaufau ai e uiga i le mauaina o meaalofa. Atonu e mafai e tagata o le aiga ona afifi ni meaalofa mo le tasi ma le isi e faatatau i “meaalofa a le Atua” o loo ta’ua i le Moronae 10:9–16. O nei meaalofa e mafai foi ona faatusa i ai isi meaalofa lelei ia e mai ia Keriso latou te vaaia i le tasi ma le isi.

Moronae 10:27–29, 34

E mafai e tagata o le aiga ona faasoa ni mea latou te mananao e ta’u atu ia Moronae pe a latou “feiloai ma [ia] i luma o le pa faamasino logomalie a le Ieova silisili.”

Mo nisi manatu mo le aoaoina o fanau tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.

Faaleleia o Suesuega Faaletagata Lava ia

Vaavaai mo Iesu Keriso. O le faamoemoega o le Tusi a Mamona—ma tusitusiga paia uma—o le molimau lea e uiga ia Iesu Keriso. O le a se mea ua e aoaoina e uiga ia Iesu Keriso i le Moronae 10? O le a se mea ua musuia oe e fai e te sau ai ia te Ia?

O Moronae o loo Tanumia Papatusi, saunia e Jon McNaughton