That Ye May Know, saunia e Gary L. Kapp

14--20 Tesema

Moronae 10

“O Mai ia Keriso, ma Faaatoatoaina ia te Ia”

O nisi o tamaiti o lau vasega atonu o loo i ai ni aafiaga anoa mai le aoaoina o le Tusi a Mamona i le fale. E faʻapefea ona e faʻaaogaina na aafiaga e uunaia ai tamaiti uma e faitau tusitusiga paia i le fale?

Tusi Faamaumau Ou Lagona Uunai

Valaaulia le Fefaasoaai

Tufa atu se kopi o le Tusi a Mamona. A maua e tamaiti taitasi le tusi, fai atu ia te ia e faasoa mai se mea na te fiafia i ai e uiga i le Tusi a Mamona-o se tala e sili ona fiafia i ai, o se molimau, po o se aafiaga na aoao mai i le fale po o le lotu.

Aoao atu le Aoaoga Faavae: Tamaiti Laiti

Moronae 10:3–5

E mafai ona ou iloa e moni le Tusi a Mamona.

Vaavaai mo ni auala e fesoasoani ai i tamaiti e talia le valaaulia a Moronae e fesili atu i le Atua pe moni le Tusi a Mamona.

Gaoioiga e Mafai Ona Fai

• Faaali atu se ata o Moronae o loo tanuina ia papatusi auro (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga), ma fai i tamaiti e faamatala mea latou te vaaia. Valaaulia i latou e tusi i luga o papatusi, ma faamatala atu o nei papatusi na tusia ai upu ia ua tatou faitauina nei i le Tusi a Mamona. Tuu atu i tamaiti e faafoliga o Moronae o lo o tusia tusitusiga paia ma tanumia ai. Usu faatasi “O Papatusi Auro” (Tusipese a Tamaiti, 61)

• Faaali atu le Tusi a Mamona, ma faitau le Moronae 10:4. Faamamafa atu e mafai ona tatou ole atu i le Atua pe moni le Tusi a Mamona, ma o le a Ia auina mai le Agaga Paia e molimau mai ia i tatou. E mafai foi ona e faaaogaina le “Mataupu 54: O Le Folafolaga o le Tusi a Mamona” (Tala o le Tusi a Mamona,156, po o le vitio talafeagai i le ChurchofJesusChrist.org). Faasoa pe faapefea ona fesoasoani le Agaga Paia ia te oe e maua lau molimau i le Tusi a Mamona. Fesoasoani i tamaiti ia malamalama pe faapefea se lagona o se molimau mai le Agaga. Usu se pese e faatatau i le sailiga o le upumoni, e pei o le “Saili, Mafaufau Loloto, ma Tatalo” (Tusipese a Tamaiti,66).

Moronae 10:8-20

Ua tuuina mai e le Tama Faalelagi ia te au meaalofa faaleagaga.

Na faamatalaina e Moronae meaalofa na tuuina mai e le Atua i Ana fanau pe a latou faatuatua ia te Ia. E mafai ona e fesoasoani i tamaiti ia maua le faʻatuatua o le a tuʻuina atu e le Atua ia i latou meaalofa faaleagaga.

Gaoioiga e Mafai Ona Fai

• Tusi fuainumera 9 e oo i le 16 i ni fasipepa eseese, ma afifi pepa taitasi e pei o se meaalofa. Tuu atu i tamaiti e auauai i le tatalaina o meaalofa. Ao latou faia, faitau faatasi fuaiupu mai le Moronae 10: 9-16 e fetaui ma fuainumera, ma fesoasoani i tamaiti e faailoa mai meaalofa faaleagaga taitasi. Faamatala atu o meaalofa nei e tuuina mai e le Tama Faalelagi i Ana fanau ina ia mafai ai ona fesoasoani le tasi i le isi ma faia Lana galuega.

• Tuu atu i tamaiti e talanoa puupuu e uiga i meaalofa latou te fiafia iai. Tau atu i tamaiti e uiga i meaalofa faaleagaga ua e matauina ua tuuina mai e le Tama Faalelagi ia i latou, e pei o meaalofa o le faatuatua, poto, molimau, agalelei, ma le mafai ona aoao.

Moronae 10:32

E finagalo Iesu Keriso ou te alu atu ia te Ia.

Mafaufau pe o le a faapefea ona e fesoasoani i tamaiti ia malamalama i le uiga o le “o mai ia Keriso”

Gaoioiga e Mafai Ona Fai

• Faitau atu i tamaiti mai le Moronae 10:32, “O mai ia Keriso, ma ia faaatoatoaina ia te ia,” ma valaaulia tamaiti tou te toe faia le fuaitau. Fai atu ia i latou e moeiini o latou mata a o e tuuina se ata o Iesu i se mea i totonu o le potu. Ona tuu atu lea ia i latou e pupula o latou mata, sue le ata, ma faapotopoto faataamilo i ai. Ia talanoaina ma tamaiti auala e mafai ai ona tatou o mai ia Keriso (tagai, mo se faataitaiga, Mataupu Faavae o le Faatuatua 1: 3-4). Toe faia lenei gaoioiga, tuu atu i tamaiti e tuu le ata i se mea i le potuaoga.

• Fesoasoani i tamaiti e teuteu ni pine siepi fatu e i ai le faamatalaga lea “Ou te alofa i le Atua ma loʻu malosi atoa, manatu, ma le malosi atoa” (tagai Moronae 10:32). E faʻapefea ona tatou faʻaali atu i le Atua tatou te alolofa ia te Ia?

Aoao atu le Aoaoga Faavae: Tamaiti Matutua

Moronae 10:3–5

E mafai ona ou iloa le upumoni e ala i le mana o le Agaga Paia.

E finagalo le Atua ia i tatou taitoatasi ia iloa e moni le Tusi a Mamona. Fesoasoani i tamaiti ina ia malamalama i le folafolaga a le Atua e “faaalia le moni ia te oe, e ala i le mana o le Agaga Paia.”

Gaoioiga e Mafai Ona Fai

• Tusi i luga o le laupapa upu Faitau, Manatua, Mafaufau Loloto ma Fesili. Valaaulia ia tamaiti e sue upu ia i le Moronae 10:3–4. Fautuaina tagata o le vasega e fefaasoaai le tasi ma le isi pe na faapefea ona maua a latou lava molimau o le Tusi a Mamona? Fai atu i tamaiti e saili ni mea tutusa i le va o nei fuaiupu ma le pese “Saili, Mafaufau Loloto, ma Tatalo” (Tusipese a Tamaiti,66).

• Fesoasoani i tamaiti e manatua nisi o aafiaga na tou maua faatasi mai le Tusi a Mamona. Faasoa atu ou lagona e uiga i le Tusi a Mamona, e aofia ai pe na faapefea ona e mauaina pe faamalosia lau molimau e moni. Valaaulia tamaiti e faasoa mai o latou lagona ma molimau.

• Faamatala e uiga i se taimi na molimau atu ai le Agaga Paia ia te oe e uiga i se mea. Faamatala pe o le a sou lagona ma le auala na e iloa ai o le Agaga Paia. Fesoasoani i tamaiti e aoao mai mau nei e uiga i le auala e talanoa mai ai le Agaga ia i tatou: Ioane 14:26–27; Mataupu Faavae ma Feagaiga 6:15, 23; 8:2–3; 9:7–9; 11:12–14.

Moronae 10:8-19

Ua tuuina mai e le Tama Faalelagi ia te au meaalofa faaleagaga.

E toatele i tatou i aso nei o ē “faafitia meaalofa a le Atua” (Moronae 10: 8). Fesoasoani i tamaiti ia latou iloa o nei meaalofa o loʻo i ai pea i aso nei.

Gaoioiga e Mafai Ona Fai

• Tusi meaalofa o loo taua i le Moronae 10: 9-16 i fasi pepa, ma tuu i totonu o se pusa meaalofa. Tusi fuainumera 9 e oo i le 16 i luga o le laupapa, ma valaaulia tamaiti e feauauai i le pikiina o se pepa mai le pusa ma faafetaui i le numera o le fuaiupu i luga o le laupapa. O le a se mea ua tatou aoaoina e uiga i nei meaalofa mai le fuaiupu 8 ma 17--18?

• Faasoa atu le tala o le oo mai o le Tusi a Mamona (tagai “Mataupu 3: O le Agelu o Moronae ma Papa Tusi Auro,” Tala o le Mataupu Faavae ma Feagaiga, 13--17). Fesoasoani i tamaiti e faailoa mai meaalofa o loo taʻua i le Moronae 10: 9-16 na tuuina atu e le Atua ia Iosefa Samita ina ia mafai ai ona ia aumaia le Tusi a Mamona. Aisea e finagalo ai le Tama Faalelagi tatou te talitonu i meaalofa faaleagaga i aso nei?

Moronae 10:32–33

E finagalo Iesu Keriso ou te alu atu ia te Ia.

E faapefea ona e valaauliaina tamaiti ia “o mai ia Keriso, ma faaatoatoaina ia te ia”?

Gaoioiga e Mafai Ona Fai

• Tusi i luga o le laupapa se fesili e pei o lea O le a le uiga o le o mai ia Keriso? Fesoasoani i tamaiti e suesue le Moronae 10:32--33 e maua ai tali talafeagai. Galulue faatasi e lisi mea e finagalo Keriso tatou te faia ma mea ua Ia folafola mai e fai mo i tatou.

• Faasoa atu au fuaitau e sili ona e fiafia i ai po o tala mai le Tusi a Mamona na fesoasoani ia te oe e te sau ia Keriso, ma valaaulia tamaiti e faia foi faapea. Iloilo faatasi ma tamaiti upu a le Perofeta o Iosefa Samita mai le faatomuaga i le Tusi a Mamona: “E sili ona latalata atili atu o le tagata i le Atua i lona ola ai i mataupu [o le Tusi a Mamona], nai lo se isi lava tusi.” Tuuina atu lau molimau e uiga i le auala na tupu ai lenei mea i lou olaga.

Fautuaina le Aoaoina i le Aiga

Valaaulia tamaiti e tatalo mo se molimau malosi atu o le Tusi a Mamona ona faasoa atu lea o a latou molimau i se tagata o le aiga po o se uo.

Faaleleia o Lo Tatou Aoao Atu

Uunaia le fefaasoaa’i. O tamaiti laiti e masani ona i ai ni malamalamaaga anoa e uiga i le talalelei. O le fefaasoaaʻi o latou manatu e fesoasoani e saunia ai i latou e talanoa i a latou uo e uiga i le talalelei (tagai Aoao Atu i le Ala a le Faaola,30.)