Behold the Lamb of God, saunia e Walter Rane

21--27 Tesema

Kerisimasi

“Ma o le a Afio Mai o Ia i le Lalolagi e Togiola Ona Tagata”

E masani ona naunau fanau e talanoa pe faapefea ona latou faamanatuina le Kerisimasi. Mafaufau loloto i mea e mafai ona e faia e fesoasoani ai ia i latou e taulai atu ia Iesu Keriso ma lo latou agaga faafetai mo Lona fanau mai.

Tusi Faamaumau Ou Lagona Uunai

Valaaulia le Fefaasoaai

Valaaulia tamaiti e faamatala mai pe tusi se ata o se mea e faia e o latou aiga i le taimi o le Kerisimasi e fesoasoani ai ia i latou ia manatua Iesu Keriso.

Aoao atu le Aoaoga Faavae: Tamaiti Laiti

1 Nifae 11:13–22; Mosaea 3:5–8; Alema 7:9–13; Helamana 14:1–6; 3 Nifae 1:15, 19–21

Na soifua mai Iesu Keriso e avea ma oʻu Faaola.

Pe o iloa ea e tamaiti o loo e aoaoina le mafuaaga tatou te faamanatuina ai le Kerisimasi? E mafai faapefea ona e fesoasoani ia i latou ia malamalama pe aisea e mafua ai le fanau mai o Iesu Keriso mo le faamanatuina?

Gaoioiga e Mafai Ona Fai

• Taʻu atu e uiga i le soifua mai o Iesu, faʻaalia ata a o e faia (e pei o Tusi Ata o le Talalelei, nu. 28, 29, 30, 31). Tuu atu i tamaiti e faasoa mea latou te iloa. Faaaoga le itulau o gaoioiga o lenei vaiaso e aoao ai tamaiti o tagata o loo nonofo i le taimi o le Tusi a Mamona na latou iloaina le fanau mai o Iesu.

• Faitau fuaitau autu mai le Alema 7: 11-12 e aoao ai tamaiti i mea na faia e Iesu Keriso mo i tatou. Faasoa atu pe aisea ua e faafetai ai na fanau mai Iesu Keriso, ma faailoa atu ou lagona e uiga i Lana taulaga togiola.

• Faaali atu ata o loo faaalia ai le taulaga togiola a le Faaola-e pei o Ona mafatiaga i Ketesemane, maliu i luga o le satauro, ma le Toetu (tagai Tusi Ata o le Talalelei, nu. 56, 57, 58, 59). Fai atu i tamaiti e taʻu atu ia te oe mea ua latou vaaia i ata. Fesoasoani ia latou malamalama na auina mai e le Tama Faalelagi Iesu Keriso i le lalolagi e puapuagatia mo a tatou agasala, maliu mo i tatou, ma toetu ina ia mafai ai ona tatou toe foi atu e mau faatasi ma Ia.

• Usu faatasi ma tamaiti se pese e faatatau i le soifua mai o Iesu, e pei o le “Na Ia Auina Mai Lona Alo” po o le “I Se Fale o Manu” (Tusipese a Tamaiti, 20, 26). Faasino atu i tamaiti fuaitau o le pese e faamatala ai faamanuiaga tatou te maua ona o le soifua mai o Iesu.

2 Nifae 25:23, 26

O loo Molimau le Tusi a Mamona e uiga ia Iesu Keriso.

Ao e faaiuina lau suesuega o le Tusi a Mamona i lenei tausaga, ia faamanatu atu i tamaiti o lenei tusi o le “Tasi Molimau ia Iesu Keriso,” na tusia e fesoasoani ia i tatou e o mai ia te Ia.

Gaoioiga e Mafai Ona Fai

• Uu i luga se kopi o le Tusi a Mamona mo tamaiti e vaai i ai. Faitau le ulutala ma faasino i upu “O Se Tasi Molimau ia Iesu Keriso.” Tuu atu i tamaiti e feauauai i le uuina o le tusi, ma fesoasoani ia i latou e sue le suafa o le Faaola i le faavaa. Taʻu i tamaiti ou lagona e uiga i le Tusi a Mamona ma pe na faapefea ona fesoasoani ia te oe e aoao ai e uiga ia Iesu Keriso.

• Tuu atu i tamaiti taitoatasi se ata o Iesu, pe tuu foi ia i latou e tusi a latou lava ata o Ia. Valaaulia i latou e uu i luga a latou ata i taimi uma latou te faalogo ai i le suafa o Keriso ao e faitau le 2 Nifae 25:23, 26. Molimau atu o le Tusi a Mamona na tusia e fesoasoani ia i tatou ia “talitonu ia Keriso” (2 Nifae 25:23).

• Faasoa atu i tamaiti se tasi o mau e sili ona e fiafia i ai po o tala mai le Tusi a Mamona e fesoasoani e te aoao ai e uiga ia Iesu Keriso. Fai atu i tamaiti e uiga i tala latou te fiafia i ai i le Tusi a Mamona, ma fesoasoani ia latou iloa pe faapefea e nei tala ona fesoasoani ia i tatou e aoao e uiga i le Faaola ma faalatalata atu ia te Ia. O le tilotilo i nisi o ata o loo i le Tala o le Tusi a Mamona e mafai ona fesoasoani ia i latou e manatua ai tala.

Aoao atu le Aoaoga Faavae: Tamaiti Matutua

1 Nifae 11:13–22; Mosaea 3:5–8; Alema 7:10–13; Helamana 14:1–6; 3 Nifae 1:15, 19–21

Na soifua mai Iesu Keriso e avea ma oʻu Faaola.

Mafaufau loloto i se auala sili e mafai ona e fesoasoani ai i tamaiti ia malamalama i le taua o le soifua mai o Keriso ma pe o le a le uiga ia i latou.

Gaoioiga e Mafai Ona Fai

• Tuu atu i tamaiti taitoatasi se tasi o mau faasino o maua i le itulau o gaoioiga o lenei vaiaso. Valaaulia i latou taitoatasi e faitau a latou mau, faailoa le perofeta o loo saunoa, ma faasoa mai se mea se tasi na iloa e lenei perofeta e uiga ia Iesu Keriso. Tuuina atu ia i latou se fesoasoani pe tuu atu ia i latou e galulue faatasi pe a manaʻomia.

• Lisi i luga o le laupapa nisi o mea na tutupu i le fanau mai o Iesu, e pei ona faamatalaina i totonu o le Luka 2:4–14; Mataio 2:1–2; ma le 3 Nifae 1:15, 19–21. Fesoasoani i tamaiti e suʻe nei mau e iloa ai pe na tutupu mea na tutupu i Peteleema, Amerika, po o nofoaga uma ia e lua. Aisea tatou te faafetai ai i le avea o le Tusi a Mamona ma molimau lona lua o le soifua mai o Iesu Keriso ma le misiona o se Faaola?

• Faitau faatasi ma tamaiti le Alema 7:10--13 . O a mea tatou te aʻoaʻoina mai nei fuaiupu e uiga i le fanau mai o Iesu? e uiga i Lona paia? e uiga i Lana misiona i le lalolagi? Valaaulia tamaiti e faasoa mai pe aisea latou te faafetai ai mo Iesu Keriso, ma faasoa atu lau molimau e uiga ia te Ia.

2 Nifae 25:23, 26; 33:4, 10

O loo Molimau le Tusi a Mamona e uiga ia Iesu Keriso.

I le tautala ai e uiga i le Tusi a Mamona, na saunoa ai le Perofeta o Iosefa Samita “e sili foi ona latalata atili atu o le tagata i le Atua i lona ola ai i ona mataupu, nai lo se isi lava tusi” (faatomuaga i le Tusi a Mamona E faapefea ona e fesoasoani i tamaiti ia malamalama i lenei folafolaga?

Gaoioiga e Mafai Ona Fai

• Tuu atu fuaiupu nei i tamaiti taitoatasi: 2 Nifae 25:23, 26; 33:4, 10. Valaaulia tamaiti e faitau a latou fuaiupu ma faailoa mai po o le a le mea na manao ai le perofeta o Nifae o le Tusi a Mamona ia tatou iloa. Fai atu ia i latou e tusi mea latou te maua i luga o le laupapa. Faamalamalama atu o nei mea o loo faamatalaina ai se faamoemoega taua o le Tusi a Mamona. Tuu atu i tamaiti e faataitai ma le tasi pe o le a faapefea ona latou faamatala atu i se uo se faamoemoega taua o le Tusi a Mamona.

• Faasoa atu i tamaiti se tasi o mau e sili ona e fiafia i ai po o tala mai le Tusi a Mamona e fesoasoani e te aoao ai e uiga ia Iesu Keriso. Fai atu i tamaiti e uiga i tala latou te fiafia i ai i le Tusi a Mamona, ma fesoasoani ia latou iloa pe faapefea e nei tala ona fesoasoani ia i tatou e aoao e uiga i le Faaola ma faalatalata atu ia te Ia. Fetufaai ma tamaiti pe faapefea ona fesoasoani le Tusi a Mamona ia te oe ia e iloa o Iesu o le Keriso. Uunai tamaiti e mafaufau i se fuaiupu po o se tala mai le Tusi a Mamona e faamalosia ai lo latou talitonuga ia Iesu Keriso. Fai atu ia i latou e faasoa atu i se uo po o se tagata o le aiga e le iloa e uiga i le Tusi a Mamona.

Fautuaina le Aoaoina i le Aiga

Valaaulia tamaiti e faasoa mai ma o latou aiga le auala na fesoasoani ai le Tusi a Mamona ia latou aoao atili e uiga ia Keriso. Uunaia i latou e faasoa mai se fuaiupu po o se tala mai le Tusi a Mamona o se vaega o a latou molimau.

Faaleleia o Lo Tatou Aoao Atu

E fiafia tamaiti i tala. O tala o se tasi lea o auala sili e fesoasoani ai i tamaiti e aʻoaʻo ma manatua upu moni. Ao e faasoa atu le tala i le fanau mai o Iesu, mafaufau foi e faasoa atu tala mai lou olaga na fesoasoani e faamalosia ai lou faatuatua i le Faaola.