Faauta i le Tamai Mamoe a le Atua, saunia e Walter Rene

21–27 Tesema

Kerisimasi

“Ma O Le A Afio Mai o Ia i le Lalolagi e Togiola Ona Tagata”

O le vaitau o le Kerisimasi o se taimi e tomanatu ai i, ma faaali ai le agaga faafetai mo le soifua mai o lo tatou Faaola o Iesu Keriso. A o e faitau ma mafaufau loloto i lenei vaiaso e uiga i Lona soifua mai ma [Lona] soifuaga, mafaufau pe ua faapefea ona faamalosia lau molimau i au suesuega o le Tusi a Mamona e faapea, o Ia o le Faaola o le lalolagi. Tusifaamaumau lagona uunai e oo mai ia te oe.

Tusifaamaumau Ou Lagona Uunai

Mai le Nifae e oo i le Moronae, o perofeta uma o le Tusi a Mamona sa tuuto i le faamoemoega paia ua aoteleina i luga o le itulau autu o le tusi: “O le faatalitonuina o [tagata uma] o Iesu o le Keriso.” O se tasi o perofeta sa vaai ia te Ia o se agaga o le muaiolaga, ae o le isi na vaai i Lona fanau mai ma [Ana] galuega i se faaaliga vaaia. O le tasi sa tu i luga o se puipui e folafola atu faailoga o Lona soifua mai ma Lona maliu, ae o le isi na tootuli i luma o Lona tino toetu, na tagotago i manu’a i Ona lima, vae, ma le itu. Sa iloa uma e i latou lenei upumoni taua: “a leai se isi ala po o ni auala e mafai ona faaolaina ai le tagata, ua na o le toto togiola o Iesu Keriso, o le … e afio mai o ia e togiola le lalolagi” (Helamana 5:9).

O lea la, i lenei vaitau o le Kerisimasi, a o faamanatu e tagata talitonu i le lalolagi atoa le agalelei ma le alofa o le Atua i le auina mai o Lona Alo, ia mafaufau loloto i le ala ua faamalosia ai e le Tusi a Mamona lou faatuatua ia Keriso. A o e mafaufau i Lona soifua mai, mafaufau loloto pe aisea na Ia afio mai ai, ma pe na suia faapefea e Lona afio mai lou olaga. Ona mafai lea ona e maua le olioli moni o le Kerisimasi—o le meaalofa ua tuuina mai e Iesu Keriso ia te oe.

Manatu mo Suesuega Faaletagata Lava Ia o Tusitusiga Paia

1 Nifae 11:13–36; Mosaea 3:5–10; Helamana 14:1–13; 3 Nifae 1:4–22

Na afio mai Iesu Keriso i le lalolagi e avea ma o’u Faaola.

O se mea masani le faitau o le tala i le soifua mai o le Faaola o loo i le Feagaiga Fou i le vaitaimi o le Kerisimasi, ae e mafai foi ona e maua ni valoaga faagaeetia e uiga i lenei mea paia na tupu i le Tusi a Mamona. Mo se faataitaiga, o valoaga i le soifua mai ma galuega a le Faaola o loo maua i le 1 Nifae 11:13–36; Mosaea 3:5–10; Helamana 14:1–13; ma le 3 Nifae 1:4–22. O a ni uunaiga e uiga ia Iesu Keriso ua oo mai ia te oe ao e faitau i nei fuaitau ma manatunatu i ni uiga o faailoga o Lona soifua mai? E faapefea ona fesoasoani molimau a nei perofeta i Amerika anamua e faamalosia ai lau molimau ia Keriso ma Lana misiona?

Tagai foi Mataio 1:18–25; 2; Luka 2.

2 Nifae 2:6; Alema 7:7–13; 11:40; Helamana 5:9; 14:16–17

O Iesu Keriso o le Togiola o tagata uma.

Semanu e leai se mafuaaga tatou te faamanatuina ai le soifua mai o Iesu Keriso pe ana leai Lana taulaga togiola, lea ua Ia laveaiina ai i tatou mai le agasala ma le oti, faamafanafana i tatou i puapuaga, ma fesoasoani ia i tatou “ia atoatoa e pei o Ia” (Moronae 10:32). O le a se mea ua e aoao mai le Tusi a Mamona i lenei tausaga e uiga i le mana o le Faaola e togiolaina ai oe? E i ai ni tala po o ni aoaoga e tulaga ese ia te oe? Mafaufau po o a ni mea e aoao atu e faataitaiga nei ia te oe e uiga i le misiona togiola a le Faaola: 2 Nifae 2:6; Alema 7:7–13; 11:40; ma le Helamana 5:9; 14:16–17. O le a se mea ua e lagona ua musuia oe e fai e faaali atu ai lou agaga faafetai ia te Ia?? (O loo i ai i leChristmas.ComeUntoChrist.org nisi o manatu e mafai ona e amata ai.)

1 Nifae 6:4; 19:18; 2 Nifae 25:23, 26; 33:4, 10

O loo molimau le Tusi a Mamona e uiga ia Iesu Keriso.

“O Se Tasi Molimau ia Iesu Keriso” ua sili atu nai lo na o se soaautu mo le Tusi a Mamona; o se faamatalaga e uiga i lona faamoemoega e paia. Mafaufau loloto i mea e te aoaoina mai mau nei e uiga i le misiona a le Tusi a Mamona o le molimau ia Keriso: 1 Nifae 6:4; 19:18; ma le 2 Nifae 25:23, 26; 33:4, 10.

Mafaufau e tusifaamaumau i se apitalaaga po o a auala ua e latalata atili ai ia Keriso ona o le suesueina o le Tusi a Mamona i lenei tausaga. E ono mafai ona fesoasoani faaosofiaga nei:

• “O se mea fou ua ou aoaoina e uiga i le Faaola i le tausaga lenei o le …”

• “O le faitauina o [fuaiupu e uiga i le Faaola] ua suia ai le auala ou te …”

• “O le tagata [po o le tala] e sili ona ou fiafia i ai i le Tusi a Mamona na aoao mai ia te a’u, o le Faaola …”

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

1 Nifae 11:13–23; Mosaea 3:5–10; Helamana 14:1–13; 3 Nifae 1:4–22

Atonu o le a fiafia tamaiti e tusi ata o mea latou te faalogo i ai ao e faitaua tala e uiga i le soifua mai ma auaunaga a Keriso i le 1 Nifae 11:13–23; Mosaea 3:5–10; Helamana 14:1–13; ma le 3 Nifae 1:4–22. Ona toe faamatala lea e lau fanau ia tala e faaaoga ai ata ua latou tusia.

“O Ia o le Meaalofa”

Ina ia fesoasoani i lou aiga ia taulai atu i le meaalofa na tuuina mai e le Tama Faalelagi ia i tatou e ala i le auina mai o Lona Alo, e mafai ona e afifiina se ata o Iesu Keriso e pei o se meaalofa Kerisimasi. E mafai ona talanoa tagata o le aiga e uiga i ni meaalofa Kerisimasi e sili ona fiafia i ai e mafai ona latou mauaina pe faamoemoe e maua. Ona latou tatalaina lea o le ata o Keriso ma talanoa i auala ua avea ai o Ia o se meaalofa faapelepele mo i tatou. O le vitio “O Ia o le Meaalofa” (ChurchofJesusChrist.org) e mafai ona fesoasoani tou te talanoaina ai auala e mafai ona e maua, talia, ma faasoa le meaalofa o le Faaola o se aiga i lenei Kerisimasi.

Atonu foi o le a manuia lou aiga mai le mafaufau e uiga i se “meaalofa” o le a latou mananao e avatu i le Faaola, e pei o le faia o se taumafaiga ina ia agalelei atili atu i isi po o le galulue e faatoilalo se mausa leaga. Mafaufau e valaaulia tagata o le aiga e tusi i lalo o latou manatu, afifi e pei o se meaalofa, ma tuu a latou meaalofa i autafa o le ata o le Faaola.

O Le Agaga o le Kerisimasi

Atonu e malie le fuafua o gaoioiga e mafai ona fai e lou aiga i aso e tau atu i le Kerisimasi ia lagona ai le Agaga o Keriso, e pei o le tautuaina o se tasi po o le usuina faatasi o viiga o le Kerisimasi. (Mo manatu, tagai christmas.ComeUntoChrist.org.)

Mo nisi manatu mo le aoaoina o fanau tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.

Faaleleia o Lo Tatou Aoao Atu

Tulitatao ia valaaulia e faatino. “A e tulitatao atu i se valaaulia e faatino, e te faaali atu i tagata aoao e te popole mo i latou ma pe faapefea e le talalelei ona faamanuia o latou olaga. E te tuuina atu foi ia i latou avanoa e faasoa mai ai o latou aafiaga, lea e faamalosia o latou tautinoga ma faatagaina i latou e lagolago le tasi ma le isi i le ola ai i le talalelei” (Teaching in the Savior’s Way,35).

Faaaliga Vaaia a Nifae i le Taupou o Maria, saunia e Judith A. Mehr