O Le A Ou Toe Aumai Outou i fafo mai le Loloto, saunia e Jonathan Arthur Clarke

16–22 Novema

Eteru 6–11

“Ina Ia Aveesea Le Leaga”

O le talanoa ai e uiga i faamaumauga a sa Iareto, sa fai mai ai Mamona e faapea “e tatau i tagata uma ona iloa mea ua tusia i lenei tala” (Mosaea 28:19) Teu le manatu lea i lou mafaufau a o e faitauina le Eteru 6–11. Aisea e aoga—pe taua—ai nei mea ia te oe ma e pele ia te oe?

Tusifaamaumau Ou Lagona Uunai

O le faitau selau o tausaga talu ona faatamaiaina sa Iareto, sa maua ai e sa Nifae toega o mea na faaleagaina o lo latou nuu anamua. Na i ai i nei mea na faaleagaina se faamaumauga tulaga ese lava—o ni papatusi o le “auro mao’i” ia sa “tumu i togitogiga” (Mosaea 8:9). Sa mafai ona lagona e le tupu o sa Nifae, o Limae, o lenei faamaumauga sa taua tele, sa ia faapea mai: “E le masalogia ua i ai se mealilo tele i totonu o nei papatusi” (Mosaea 8:19). O le aso, ua ia te oe se faapuupuuga o nei faamaumauga, ua faaliliuina i lau gagana, ma ua ta’ua o le tusi o Eteru. Ua aumaia mai faamaumauga lava ia sa i ai ia sa Nifae “le naunau tele” e faitau i ai, ma ina ua latou faitauina, “sa faatumulia i latou i le faanoanoa; e ui i lea sa latou maua mai ai le malamalama tele, o se mea sa latou olioli ai” (Mosaea 28:12, 18). A o e faitau e uiga i le faamanuiaina ma le faatoilaloina leaga faia o sa Iareto, o le a e tau ai i le tele o taimi o faanoanoaga. Ae aua ne’i sopoloa i lau vaai le olioli i le aoaoina o lesona mai lenei talafaasolopito. Aua, e pei ona tusia e Moronae, “o le poto o le Atua ua tatau ai ona faailoa atu o nei mea ia te outou” (Eteru 8:23), aua afai e mafai ona tatou aoao mai i toilaloga ma faamanuiaga o sa Iareto, “ina ia aveesea le leaga, ma ina ia oo mai ai le taimi e le mafai ai e Satani ona toe maua se mana i loto o le fanauga a tagata” (Eteru 8:26).

Manatu mo Suesuega Faaletagata Lava Ia o Tusitusiga Paia

Eteru 6:1–12

O le a taitai atu a’u e le Alii i lo’u nuu folafolaina.

O le a mafai ona e maua ni malamalamaaga loloto faaleagaga pe a e faatusatusaina le malaga a sa Iareto e sopoia le vasa i lau malaga i le olaga nei, Mo se faataitaiga, o le a se mea ua tuuina mai e le Alii e faamalamalama ai lou auala e pei o maa i vaa o sa Iareto? O le a se mea e ono faatusa i ai vaa, po o matagi na “agi … agai i le laueleele na folafolaina”? (Eteru 6:8). O le a se mea e mafai ona e aoao mai i faatinoga a sa Iareto ao le’i alu, i le taimi, ma ina ua uma le faigamalaga? O faapefea ona taitai oe e le Alii i lou nuu folafolaina?

Malaga a sa Iareto e sopoia Asia, saunia e Minerva Teichert

Eteru 6:5–18, 30; 9:28–35; 10:1–2

E faamanuia a’u e le Alii pe a ou lotomaualalo.

E ui lava ina sa pei na taatele le faamaualuga ma le amioleaga i le talafaasolopito o sa Iareto, ae o loo i ai foi ni faataitaiga o le lotomaualalo i mataupu nei—aemaise lava i le Eteru 6:5–18, 30; 9:28–35; ma le 10:1–2. O le mafaufau loloto i fesili nei, e mafai ona fesoasoani e te aoao ai mai nei faataitaiga: Aisea na faalotomaualalo ai e sa Iareto i latou lava i nei tulaga? O le a le mea na latou faia e faaali ai lo latou faamaualalo? Na faapefea ona faamanuiaina i latou o se taunuuga [o lena mea]? Ia maitau, i nisi o tulaga, sa faamalosia ia tagata e o latou tulaga ina ia lotomaualalo. Mafaufau i mea e mafai ona e faia ma le lotomalie “ia savavali faamaualalalo i luma o le Alii” (Eteru 6:17) nai lo o le faamalosia e faamaualalo (tagai Mosaea 4:11–12; Alema 32:14–18).

Tagai foi “Humility,” Gospel Topics, topics.ChurchofJesusChrist.org.

Eteru 7–11

O taitai amiotonu e manuia ai tagata latou te taitaia.

Omataupu e 7–11 o le Eteru ua aofia ai augatupulaga e le itiiti ifo ma le 28. E ui e le tele ni faamatalaga e mafai ona tuuina mai i se tamai avanoa, ae e vave lava ona oso a’e se mamanu: o taitaiga amiotonu e taitai atu ai i faamanuiaga ma le faamanuiaina, ae o taitaiga amioleaga e taitai atu ai i le faatagataotauaina ma le faafanoga.

O loo i lalo ifo ni nai tupu toalaiti o loo ta’ua i nei mataupu. Faitau i fuaiupu e faatatau i ai, ma vaai po o a ni mea e mafai ona e aoao mai i a latou faataitaiga—lelei ma leaga—e uiga i le tulaga faaletaitai. A o e faia o lea, mafaufau i ni avanoa e te ono maua e taitai ai pe faatosina ai isi i lou aiga, lou nuu, lou valaauga i le Ekalesia, ma isi mea faapena.

• Oraea—Eteru 6:30–7:1

• Sule—Eteru 7:23–27

• Iareto—Eteru 8:1–7, 11–15

• Emera ma Korianetumu—Eteru 9:21–23

• Hetu—Ether 9:26–30

• Sesa—Eteru 10:1–2

• Ripelakiso—Eteru 10:5–8

• Morianetona—Ether 10:10–11

• Lipi—Ether 10:19–28

• Etema—Eteru 11:11–13

Eteru 8:7–26

O le a le faapotopotoga faalilolilo?

Pe a faufau ni tagata se toalua pe sili atu e nānā faalilolilo a latou amioga leaga, ua latou aafia i se faapotopotoga faalilolilo. E masani ona faaosofia i latou e le manao i le pule [paoa] po o oa. E faaopoopo atu i faapotopotoga faalilolilo o loo faamatalaina i le Eteru 8:7–18, e mafai ona maua isi faataitaiga i le Helamana 1:9–12; 2:2–11; 6:16–30, ma le Mose 5:29–33. I le Eteru 8:18–26, o loo faamatala ai e Moronae ia taunuuga o faapotopotoga faalilolilo (tagai foi Eteru 9:4–12) ma lapatai mai ai tatou e aua ne’i lagolagoina i latou.

Manatu mo Suesuega Faaleaiga o Tusitusiga Paia ma Afiafi Faaleaiga

A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.

Eteru 6:2–12

Mata o le a fiafia lou aiga e faatino le tala i le malaga a sa Iareto i le nuu folafolaina? Atonu e mafai ona e faaaogaina se potu pogisa e fai ma vaa ma ni moliuila e faatusa i maa susulu. E mafai ona outou talanoa i auala na faaalia ai e sa Iareto lo latou faatuatua i le Alii i le o i totonu o vaa, e ui na iloa o le a “tanumia ai i latou i le loloto o le sami” (Eteru 6:6). A uma ona faitau le fuaiupu e 9, e mafai e tagata o le aiga ona faasoa mai viiga o le faafetai e fiafia i ai ma latou pepese faatasi ai. E mafai faapefea ona faatusatusa o tatou fale i vaa a sa Iareto? O le a le nuu folafolaina lea o loo taitai atu i ai e le Alii lo tatou aiga?

Eteru 6:22–23

I le aluga o lenei vaiaso, e mafai ona vaavaai lou aiga i auala na faataunuuina ai le lapataiga faaperofeta a le uso o Iareto e uiga i le faatagataotauaina. O a ni lapataiga ua tuuina mai e o tatou taitai o le Ekalesia ia i tatou? O a ni auala e mafai ai e le le amanaiaina o a latou fautuaga ona oo atu ai i le faatagataotauaina?

Eteru 8:23–26

E tusa ai ma nei fuaiupu, aisea na poloaiina ai Moronae e tusi “nei mea” e uiga i faapotopotoga faalilolilo? (Eteru 8:23). O a ni mea ua tatou aoaoina mai le tusi a Eteru e mafai ona fesoasoani ia tatou maua ai faamanuiaga ua faamatalaina i le fuaiupu 26?

Eteru 9:11

E faapefea ona aafia a tatou filifiliga ona o o tatou manaoga? O a ni mea e mafai ona tatou faia o se aiga ia mautinoa ai tatou te mananao i mea a le Atua?

Eteru 11:8

Ina ia aoao atili e uiga i le alofa mutimutivale o le Alii ia i latou o e salamo, e mafai ona e faitau i le Mosaea 26:29–30; 29:18–20; Alema 34:14–16; po o le Moronae 6:8. Atonu e mafai e tagata o le aiga ona faasoa mai ni faataitaiga o le alofa mutimutivale o le Atua mai tusitusiga paia pe mai o latou lava olaga.

Mo nisi manatu mo le aoaoina o fanau, tagai i le otootoga o le vaiaso lenei i le Sau, Mulimuli Mai Ia te A’u—Mo le Peraimeri.

Faaleleia o Suesuega Faaletagata Lava ia

Faatino mea ua e aoaoina. O le aoaoina o le talalelei e tele atu mea e aofia ai nai lo na o le faitau ma le mafaufau loloto i tusitusiga paia. E masani ona tele atu mea tatou te aoaoina e ala i le faatinoina o upumoni o loo i tusitusiga paia (tagai Ioane 7:17). O le a lau mea o le a fai e faaaoga ai mea ua e faitauina i le Eteru 6–11?

Vaa a Sa Iareto, saunia e Gary Ernest Smith