I Will Bring You up Again out of the Depths, saunia e Jonathan Arthur Clarke

18–22 Novema

Eteru 6–11

“Ina Ia Aveesea Le Leaga”

O manatu i lenei otootoga e le o ni faatonuga e tatau ona e mulimuli ai. Na faia e amoti ai lou fatufatuaʻi ma valaaulia musumusuga.

Tusi Faamaumau Ou Lagona Uunai

Valaaulia le Fefaasoaai

Faaaoga ata mai le otootoga o lenei vaiaso ma le vaiaso ua tuanai i le Sau, Mulimuli Mai ia te Au—Mo Tagata Taitoatasi ma Aiga e fesoasoani i tamaiti e toe faamanatu mea na latou aoaoina e faatatau ia sa Iareto o sopoia le sami. Tuu atu ia i latou e auauai e faasoa mai mea latou te iloa.

Aoao atu le Aoaoga Faavae: Tamaiti Laiti

Eteru 6:2–12

E mafai e le Tama Faalelagi ona faamafanafana aʻu pe a ou fefe.

Atonu o se mea taufaafefe mo sa Iareto le “felafoaiina ai i latou i luga o galu o le sami i luma o le matagi” (Eteru 6:5). Ae sa tausia ma le saogalemu i latou e le Alii ma fesoasoani ia i latou. E faapefea ona e fesoasoani i tamaiti ia liliu atu i le Alii pe a latou lagona le fefe?

Gaoioiga e Mafai Ona Fai

• I le faaaogaina o upu ma fuaitau mai le Eteru 6: 2-12, faamatala atu i tamaiti le malaga a sa Iareto i luga o le sami. Valaaulia tamaiti e faafoliga e feaei i luga o vaa ma faafoliga o lo o minoi lo latou vaʻa ma ufitia e galu. E faʻapefea lagona o le i ai i se vaʻa moni i le sami? O a mea e mafai ona tatou faia pe a tatou fefefe? Faitau faatasi fuaiupu 7 ma le 9 e vaai ai po o le a le mea na faia e sa Iareto ina ua latou fefefe.

• Faamatala atu se taimi na e fefe ai ma faamafanafanaina oe e le Tama Faalelagi. Faasoa atu i tamaiti se viiga po o se pese e fesoasoani ia te oe e “faafetai ma vivii atu i le Alii” (Eteru 6: 9) mo Lana fesoasoani. Tuu atu i tamaiti e fetufaai a latou pese Peraimeri e sili ona fiafia i ai, ma usu faatasi nisi pese.

• Faaaoga le itulau gaoioiga o lenei vaiaso e fesoasoani ai i tamaiti e fai ni vaa pepa. Faamalamalama atu o vaa na fesoasoani ia sa Iareto ia tumau saogalemu e tusa lava pe siomia i latou e le vai (tagai Eteru 6;7, 10). O le a se mea ua tuuina mai e le Tama Faalelagi ia i tatou ina ia saogalemu ai la tatou faigamalaga e toe foi atu ia te Ia?

Eteru 6:9, 12, 30; 7:27; 10:2

E mafai ona ou loto faafetai.

Ina ua taunuu ma le saogalemu i le nuu o le folafolaga, sa matuai faafetai lava sa Iareto ma na “maligi o [latou] loimata o le olioli” (Eteru 6:12). E faʻapefea ona e faʻamalosia se agaga o le faafetai i tamaiti o loʻo e aoaoina?

Gaoioiga e Mafai Ona Fai

• Faitau atu i tamaiti fuaitau mai le Eteru 6: 9 ma le 12 e aoao ai i latou i le ala na faaalia ai e sa Iareto lo latou agaga faafetai i le Alii mo le fesoasoani ia i latou e taunuu atu i le nuu folafolaina. Fai i tamaiti e taʻu mai nisi o mea latou te faafetai ai. Usu faatasi, e pei ona faia e sa Iareto, se pese e faaalia ai le agaga faafetai, e pei o le “Ou Te Faafetai Ia Te Oe, Le Tama e” (Tusipese a Tamaiti,9).

• Faitau atu i tamaiti le Eteru 10: 2 e faaali atu ai e oo lava i le tele o tausaga mulimuli ane, na manatua ai e sa Iareto le auala na fesoasoani ai le Alii i o latou tuaa i le sopoia o le vasa. Fesoasoani i tamaiti e mafaufau i auala ua faamanuiaina ai i latou e le Alii. Ona tuu atu lea i tamaiti e tusi ni ata e faamanatu ai ia i latou lava nei faamanuiaga (pe fesoasoani foi ia i latou e filifili mai ni ata na e aumaia, atonu mai se mekasini a le Ekalesia).

Eteru 7:24–27

E faamanuiaina a’u pe a ou mulimuli i le perofeta.

O le tusi a Eteru o loo faailoa manino mai ai ina ua mulimuli sa Iareto i perofeta, sa faamanuiaina i latou, ma ina ua latou teena perofeta, sa sili atu ona faigata o latou olaga. Mafaufau i ni auala e mafai ai ona e fesoasoani i tamaiti ia latou iloa e tutusa lava le moni mo i tatou.

Gaoioiga e Mafai Ona Fai

• Faaali atu se ata o le perofeta soifua, ma fai i tamaiti e faasoa mai mea latou te iloa e uiga ia te ia. O le a le mea e fai e se perofeta? Faamatala atu sa i ai foi perofeta i sa Iareto, ma soo se taimi latou te mulimuli ai i le perofeta, sa faamanuiaina i latou ma fiafia (tagai Eteru 7:24--27): E faapefea ona tatou mulimuli i le perofeta?

• Usu faatasi se pese e faatatau i perofeta, e pei o le “Mulimuli i le Perofeta” (Tusipese a Tamaiti, 58; tagai foi Tusi Ata o le Talalelei, nu. 4–27, 67–87). Talanoa ma tamaiti e uiga i mea ua aoao mai e perofeta ia i tatou e fai (mo se faataitaiga, faitau a tatou tusitusiga paia i aso uma, tausia o le aso Sapati ia paia, po o le auauna atu i isi), ma valaaulia i latou e faatino le usiusitai i lena fautuaga pe a e fai atu “Mulimuli i le perofeta!”

Aoao atu le Aoaoga Faavae: Tamaiti Matutua

Eteru 6:2–12

E mafai ona ou talitonu i le Tama Faalelagi e taitaia au i le ola e faavavau.

O le tala i malaga a sa Iareto i luga o le sami e mafai ona faatusatusa i la tatou malaga i le olaga faitino. O malaga e lua o nisi taimi e matautia ma manaomia ai le faatuatua o le a taialaina ma puipuia i tatou e le Alii.

Gaoioiga e Mafai Ona Fai

• Faitau faatasi le Eteru 6: 2-12, ma taofi soo ina ia mafai e tamaiti ona tusi ata o mea o latou faitauina. E faapefea ona avea le malaga a sa Iareto ma o tatou olaga? Fesoasoani i tamaiti e iloa ma taʻu igoa o vaega eseese o a latou ata atonu e suitulaga i o tatou olaga. Mo se faataitaiga, e mafai e sa Iareto ona suitulaga ia i tatou. O vaa e mafai ona sui ai o tatou fale, o le Ekalesia, po o le talalelei. O le a le mea e ono faatusa i ai le matagi, vai, maʻa susulu, ma le laueleele folafolaina?

• Fesoasoani i tamaiti e sue upu ma fuaitau i le Eteru 6: 2-12 e faaalia ai le ala na faatuatuaina ai e le au sa Iareto le Atua. Faasoa atu ni faataitaiga o auala na fesoasoani ai le faalagolago i le Atua ia te oe i taimi faigata i lou olaga. Ia uunaia tamaiti e faasoa mai ni aafiaga talitutusa na latou maua.

  

  Journey of the Jaredites across Asia, saunia e Minerva Teichert

Eteru 6:30; 7:27; 10:2

O le manatuaina o mea na faia e le Alii mo aʻu e aumaia ai le filemu.

O le tasi mea na iloga ai tupu amiotonu o sa Iareto mai tagata amioleaga, o tupu amiotonu “na latou manatua mea tetele na faia e le Alii” mo i latou (Eteru 7:27). E faapefea ona e musuia tamaiti e manatua mea ua faia e le Alii mo i latou?

Gaoioiga e Mafai Ona Fai

• Fai atu i tamaiti e faitau le Eteru 6:30; 7:27; ma le 10:2 taitoatasi pe i ni vaega toalaiti ma saili se mea e tutusa ai nei fuaiupu. Faasoa atu ou lagona e uiga i mea ua faia e le Alii mo oe, ma valaaulia tamaiti e faia foi faapena.

• Fetufaai ma tamaiti pe faapefea ona e taumafai e manatua auala na faamanuiaina ai oe ma lou aiga e le Alii. Fesoasoani i tamaiti e mafaufau i ni auala latou te mafai ona faamanatu ai ia i latou lava mea ua faia e le Alii mo i latou. Tuu atu ia i latou taitoatasi se fasi pepa, ma valaaulia i latou e mafaufau loloto ma tusi i lalo se mea na Ia faia mo i latou talu ai nei. Fautua atu ia latou faia se faiga masani o le tusi i lalo o faamanuiaga latou te matauina mai le Alii (tagai “O Remember, Remember” [video, ChurchofJesusChrist.org]).

Eteru 9:28-35; 11:5-8

E alofa le Alii pe a ou salamo.

E ui lava sa masani ona teenaina e sa Iareto ia perofeta ma avea ma tagata amioleaga, ae na faamagaloina pea i latou e le Alii pe a latou faamaualaloina i latou lava ma salamo.

Gaoioiga e Mafai Ona Fai

• Faitau faatasi le Eteru 9:28--35, ma fesoasoani i tamaiti e mafaufau i ni fuaiupu pupuu se tolu pe fa e tauaofai ai mea na tutupu i nei fuaiupu. Ona faitau lea o le Eteru 11: 5-8, ma fesoasoani i tamaiti e faailoa mai mea tutusa i le va o tala e lua. O a mea tatou te aʻoaʻoina mai i nei tala?

• Fai atu i tamaiti e mafaufau i isi tagata i le Tusi a Mamona o e na faamaualaloina i latou lava ma ua faamagaloina. Faaaoga ata mai le Tusi Ata o le Talalelei po o le Sau, Mulimuli Mai ia te Au—Mo Tagata Taitoatasi ma Aiga e fesoasoani ia i latou e manatua. Tuuina atu lau molimau e faamagalo e le Alii i tatou pe a tatou salamo faamaoni.

Fautuaina le Aoaoina i le Aiga

Valaaulia tamaiti e faasoa ma o latou aiga se mea na faia e le Tama Faalelagi mo i latou latou te faafetai ai.

Faaleleia o Lo Tatou Aoao Atu

Fesoasoani i tamaiti ia fatufatu. “Ao e aoaoina tamaiti, faataga i latou e fausia, tusi ata, valivali, tusitusi, ma foafoa. O nei mea e sili atu nai lo le na o ni gaoioiga malie—e taua i le aoaoina” (Aoao Atu i le Ala a le Faaola,25).