The Jaredites Leaving Babel, saunia e Albin Veselka

9--15 Novema

Eteru 1–5

“Saeia Lena Veli o Le Le Talitonu”

Ao e iloiloina mea na e aoaoina i le taimi o lau suesuega o le Eteru 1-5, o a upu moni e te lagona ua uunaia e fesoasoani ai i tamaiti ia iloa? Masalo e i ai manatu i lenei otootoga e mafai ona fesoasoani.

Tusi Faamaumau Ou Lagona Uunai

Valaaulia le Fefaasoaai

Faaali le ata o le uso o Iareto (tagai i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Valaaulia tamaiti e faasoa mai mea ua latou iloa e uiga ia te ia.

Aoao atu le Aoaoga Faavae: Tamaiti Laiti

Eteru 1:33–43; 2:16–25; 3:1–6

E faafofoga ma tali mai le Tama Faalelagi i au tatalo.

O le tala i le uso o Iareto o loo faapupula mai ai ni auala e fesoasoani ai le Atua ia i tatou pe a tatou tatalo.

Gaoioiga e Mafai Ona Fai

• Valaaulia ni nai tagata o le uarota o e iloa se isi gagana e fai ai ni nai fuaiupu i lena gagana mo lau vasega (pe taina se lipine o se isi gagana). Tuu atu i tamaiti e faafoliga latou te tautatala i se isi gagana, ma faasino atu le faigata o le malamalama o le tasi i le tasi pe a tatou le tautala i le gagana e tasi. Faaaoga lenei mea e faailoa atu ai le tala o le Olo o Papelu i le Kenese 11: 1-9 ma le Eteru 1:33. Faitau Eteru 3:13 and 15, ma faamatala pe na faapefea ona tatalo le uso o Iareto ina ia mafai e ia ma ana uo ma aiga ona malamalama le tasi i le isi (tagai Eteru 1:34–37). Faitau ma fesoasoani i tamaiti ia malamalama i tali a le Alii i lana tatalo Eteru 1:35. E mafai ona e faaaogaina le “Mataupu 50: Ua Tuua E Sa Iareto Papelu” (Tala o le Tusi a Mamona 143--44, po o le vitio talafeagai i luga o le ChurchofJesusChrist.org).

• Valaaulia tamaiti e faafoliga o fausia se vaa, e pei ona faamatalaina i totonu o le Eteru 2:16–17. Faamatala ia faafitauli na i ai ia Sa Iareto ma a latou vaa (tagai i le Eteru 2:19), ma fesili atu i tamaiti pe o le a se mea latou te faia e uiga i nei faafitauli. Faitau Eteru 2:18--19 e aoao ai tamaiti pe na faapefea e le uso o Iareto ona ave ona faafitauli i le Alii i le tatalo. Molimau atu e mafai lava ona tatou tatalo pe a i ai ni tatou fesili po o faafitauli.

• Otooto le Eteru 2:19--3:6 e faamatala ai pe na faapefea ona tali atu le Alii i fesili a le uso o Iareto e uiga i vaa. Tuu solo ni maa se 16 i totonu o le potuaoga, ma valaaulia tamaiti e faitau i latou a o latou mauaina. Faaali le ata i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma tuu atu i tamaiti e toe faamatala le tala (tagaʻi foi i le itulau o gaoioiga o lenei vaiaso).

Eteru 8:13, 15

Na foafoaina a’u i le faatusa o le Atua.

Ina ua vaai atu le uso o Iareto i le Alii, na ia aoao ai “na faia tagata uma i le amataga i [Lona] lava faatusa” (Eteru 3:15).

Gaoioiga e Mafai Ona Fai

• Faaali atu se ata o le Faaola, ma valaaulia tamaiti e faasino i vaega eseese o Lona tino. Faamalamalama atu ina ua vaai le uso o Iareto ia Iesu Keriso, na ia iloa ai tatou te foliga uma ia Iesu. A’o e faasino atu i se vaega o le tino i le ata, valaaulia i latou e tusi i le vaega lava e tasi o o latou lava tino. Molimau atu na foafoaina i tatou ina ia pei o lo tatou Tama Faalelagi ma Iesu Keriso.

• Usu faatasi se pese e faatatau i o tatou tino, e pei o le “Ulu, Tauau, Tuli, ma Tamaivae” (Tusipese a Tamaiti,129). Fesoasoani i tamaiti e talanoa pe aisea latou te faafetai ai mo vaega eseese o o latou tino.

Ua foafoaina i tatou i le faatusa o le Atua.

Aoao atu le Aoaoga Faavae: Tamaiti Matutua

Eteru 1:33–43; 2; 3:1-17

E mafai ona ou mauaina faaaliga e fesoasoani ia te au.

E faapefea ona e fesoasoani i tamaiti e aoao e uiga i faaaliga mai le faataitaiga a le uso o Iareto? O a ni aafiaga e mafai ona e faʻasoa atu ina ua fesoasoani le Alii ia te oe e maua tali i ou faafitauli poʻo fesili?

Gaoioiga e Mafai Ona Fai

• A o le i amataina le vasega, tusi le fuaitau “Tu i luga, liliu ma nofo i lalo” i gagana eseese i luga o ni fasipepa (e mafai ona e fa’aaogaina se fa’aliliutusi i le initoneti po’o le fesoasoani a se tasi e iloa se isi gagana). Tufa atu se fasi pepa se tasi i tamaiti taitasi, ma valaaulia i latou e taumafai e mulimuli i faatonuga. Faaaoga lenei mea e fesoasoani ai e faamalamalama le mea na uunaia ai tatalo a uso o Iareto i totonu Eteru 1:33–37. Faitau faatasi nei fuaiupu, ma fai atu i tamaiti e gauai atu i lagona o le Alii ia Iareto ma ana uo ma lona aiga. O a mea tatou te aʻoaʻoina mai lenei tala e uiga i le tatalo?

• Tofi tamaiti taitasi e faitau se tasi o fuaiupu nei, ma fesoasoani ia i latou e vaai mo se fesili po o se faafitauli na maua e le uso o Iareto: Eteru 1:33–35; Eteru 1:36–37; ma le Eteru 2:18–20. O le a le mea na faia e le uso o Iareto e uiga i nei faafitauli po o fesili? Na faapefea ona fesoasoani le Alii ia te ia i tulaga taitasi? Valaaulia tamaiti e mafaufau i faafitauli latou te manaomia ai le fesoasoani. E mafai faapefea ona latou mulimuli i le faataitaiga a le uso o Iareto e sailia fofo i o latou faafitauli? Faasoa atu se aafiaga na e tatalo ai mo se fesoasoani ma sa fesoasoani le Alii ia te oe.

Eteru 3:4--17

Na foafoaina a’u i le faatusa o le Atua.

O tamaiti o loo e aoaoina o le a fetaiai ma le tele o savali sese e uiga i le Atua, ia i latou lava, ma o latou tino faaletino. O nei fuaiupu o se avanoa e aoao atu ai upumoni e faavavau e uiga i nei autu.

Gaoioiga e Mafai Ona Fai

• Faitau faatasi ma tamaiti Eteru 3: 6-16, ma fesoasoani ia i latou e fai se lisi o mea na aoaoina e le uso o Iareto e uiga i le Alii mai lenei aafiaga. Aisea e taua ai le iloa o nei mea? Mo se faʻataʻitaʻiga, e faʻafefea ona afaina ai le auala tatou te vaai ai i o tatou tino ina ia iloa ai ua foafoaina i tatou i le faatusa o le Alii?

• Tusi le tino faaletino ma le tino faaleagaga i le laupapa. Valaaulia tamaiti e faasoa mai uiga o se tino faaletino (e i ai o tatou paʻu, toto, ma isi), ma tusi a latou tali i luga o le laupapa. Faitau faatasi le Eteru 3:4--17 , ma valaaulia tamaiti e vaavaai mo mea ua latou aoaoina e uiga i o tatou tino faaleagaga. Molimau atu o o tatou tino ma agaga na “foafoaina i le faatusa o [Iesu]” (Eteru 3:15).

Eteru 5:2–4

E toatolu molimau e molimau i le Tusi a Mamona.

Na valoia e Moronae o Molimau e Toatolu o le a fesoasoani e faatuina le moni o le Tusi a Mamona. E mafai ona e faaaogaina lenei valoaga e faamalosia ai molimau a tamaiti ma musuia i latou e avea ma molimau o le Tusi a Mamona i a latou lava ala.

Gaoioiga e Mafai Ona Fai

• Tusi i luga o le laupapa ni upu taua mai le Eteru 5: 2-4, e pei o papatusi, mana, faamaoni, tagata molimau ma le molimau. Faitau faatasi ma tamaiti nei fuaiupu, ma valaaulia i latou e taofi pe a e oo i se tasi o upu i luga o le laupapa ma talanoa pe aisea e taua ai nei upu. Ina ia aʻoaʻoina tamaiti e uiga i Molimau e Toatolu, e mafai ona e faasino i le “Mataupu 7: Ua Vaai ni Molimau i Papa Tusi Auro” (Tala o le Mataupu Faavae ma Feagaiga, 31--33) ma le “O le Molimau a Molimau e Toatolu” i le Tusi a Mamona. Aisea na finagalo ai le Atua i tagata e toatolu e vaai i papatusi auro?

• Tau atu i tamaiti pe faapefea ona e iloa e moni le Tusi a Mamona. Valaaulia tamaiti e faasoa mai pe aisea latou te iloa ai e moni. Fesoasoani ia i latou e mafaufau i auala e mafai ai ona avea i latou ma molimau o le Tusi a Mamona, ma uunaia i latou e faasoa atu a latou molimau i se tasi i lenei vaiaso.

Fautuaina le Aoaoina i le Aiga

Valaaulia tamaiti e mafaufau i se mea e mafai ona latou ole atu ai mo le fesoasoani a le Tama Faalelagi, e pei ona faia e le uso o Iareto. Uunaia i latou e saili Lana fesoasoani e ala i le tatalo.

Faaleleia o Lo Tatou Aoao Atu

Aoao i le taimi o gaoioiga. A o faia e tamaiti gaoioiga e pei o le tusia po o le galue i se itulau o gaoioiga, e mafai ona e faʻaaogaina le taimi e faʻamalosia ai upumoni o loʻo aʻoaʻoina e ala i na gaoioiga.