Moroni Writing on Gold Plates, saunia e Dale Kilborn

2--8 Novema

Mamona 7–9

“Ou te Tautala ia te Outou e Pei Ona Outou I Ai”

A o e faitauina le Mamona 7-9, mafaufau po o le a se mea e sili ona e manao i tamaiti o e aoaoina ia iloa. Faia ni fuafuaga e aoao atu ai upumoni e te lagona o le a faamanuiaina ai o latou olaga.

Tusi Faamaumau Ou Lagona Uunai

Valaaulia le Fefaasoaai

Tufa atu se kopi o le Tusi a Mamona. Valaaulia tamaiti, pe a oo i le taimi latou te uuina ai le tusi, e faasoa atu se mea se tasi ua latou aoaoina mai ai. Afai latou te manaʻomia se fesoasoani, faamanatu ia i latou mea na latou aʻoaʻoina talu ai nei i le vasega.

Aoao atu le Aoaoga Faavae: Tamaiti Laiti

Mamona 7:8–10

O le Tusi a Mamona ma le Tusi Paia o loo molimau uma ia Iesu Keriso.

Sa aoao mai e Mamona o le Tusi a Mamona na tusia ina ia fesoasoani tatou te talitonu ai i le Tusi Paia ma o i latou uma o e e talitonu i le Tusi Paia o le a talitonu foi i le Tusi a Mamona.

Gaoioiga e Mafai Ona Fai

• Faaali atu i tamaiti le itulau autu o le Tusi a Mamona, ma faasino i upu o le ulutala ao e faitau i ai, faamamafaina le upu tasi. Fesoasoani i tamaiti e mafaufau i isi tusi o mau o loo aoao mai ai i tatou e uiga ia Iesu. Faaali atu ia i latou o le Tusi Paia o loo i ai le Feagaiga Tuai ma le Feagaiga Fou. Fesoasoani i tamaiti e fai mai le “Feagaiga Tuai, Feagaiga Fou” pe a e faasino atu i le Tusi Paia ma le “Tasi Feagaiga” pe a e faasino atu i le Tusi a Mamona.

• Faaali atu se faafanua o le lalolagi po o le itulau gaoioiga mo lenei otootoga, faatasi ai ma se Tusi Paia ma le Tusi a Mamona. Faaaoga nei mea e aoao ai tamaiti o le Tusi Paia o se faamaumauga o aoaoga a Iesu i totonu ma faataamilo ia Ierusalema ma o le Tusi a Mamona o se faamaumauga o Ana aoaoga i Amerika.

• Filifili ni mea na tutupu ma upumoni o loo molimau uma ai le Tusi Paia ma le Tusi a Mamona, e pei o le soifua mai o Iesu, maliu, ma le Toetu. Faaali atu ata mai le Tusi Ata o le Talalelei o faaalia ai ni vaega na tutupu ma upu moni Fai atu i tamaiti e faamatala mea latou te vaaia i ata, ma tau atu ia i latou o loo aoao mai le Tusi Paia ma le Tusi a Mamona e uiga i nei mea.

Mamona 8:3

E mafai ona ou filifilia le mea tonu tusa lava pe ou te lagonaina le tuuatoatasi.

O Moronae o le sa Nifae amiotonu mulimuli, ae na tumau faamaoni i lana molimau. Fesoasoani i tamaiti ia aoao mai lana faataitaiga.

Gaoioiga e Mafai Ona Fai

• Faitau le Mamona 8: 3, faamamafa atu na tuuatoatasi na o Moronae, ae sa ia tausia pea poloaiga, e aofia ai le poloaiga e faauma le Tusi a Mamona. Faasoa se taimi na e faamaoni e tusa lava pe na e lagona le tuuatoatasi.

• A uma ona talanoaina le faataitaiga a Moronae, ia faamatala atu nisi o vaaiga e tatau ai i se tamaitiiti ona filifili pe le filifilia le mea sao, e ui lava e leai se tasi o tilotilo mai. O le a se mea na faia e Moronae?

• Usu faatasi ma tamaiti se pese e faatatau i le filifili le mea tonu, e pei o le “Tu Mo Le Mea Tonu” (Tusipese a Tamaiti,81). Aisea e taua ai le filifilia o le saʻo i taimi uma, e tusa lava pe na o oe?

Mamona 9:7–21

O le Atua o “se Atua o Vavega.”

Fesoasoani i tamaiti ina ia malamalama o vavega e taua i le galuega a le Atua ma o le a galue le Atua i vavega pe a faatuatua Ona tagata.

Gaoioiga e Mafai Ona Fai

• Faamatala atu o se vavega o se mea lea e faia e le Atua e faaali atu ai Lona mana ma faamanuiaina ai o tatou olaga [tagai Bible Dictionary, “Miracles”). Faitau upu ma fasi fuaitau mai le Mamona 9: 11-13, 17 o loo faamatalaina ai nisi o vavega a le Atua. Fesoasoani i tamaiti e mafaufau i isi vavega o loo maua i tusitusiga paia (ata mai le Tusi Ata o le Talalelei, e pei o nus. 26, 40, 41, ma le 83, e mafai ona fesoasoani). Molimau atu na galue le Atua vavega i aso anamua ma o loo Ia faia pea vavega i aso nei.

• Faasoa atu se aafiaga na e vaaia ai vavega i le Ekalesia i aso nei po o lou lava olaga. Tuuina atu lau molimau o le Atua “o le Atua o vavega” (Mamona 9:11).

Aoao atu le Aoaoga Faavae: Tamaiti Matutua

Mamona 7:8–10

O le Tusi a Mamona ma le Tusi Paia o loo molimau uma ia Iesu Keriso.

Na aoao mai Mamona o le “talalelei a Keriso o le a tuu i luma [o tatou]” i le Tusi Paia ma le Tusi a Mamona. Mafaufau pe o le a faapefea ona e aoao atu i tamaiti o tusi paia uma e taua ia i tatou.

Gaoioiga e Mafai Ona Fai

• Tusi le Mamona 7: 9 i luga o le laupapa, ae faaavanoa le mea e i ai upu ia lenei ma lena. Tusi foi i luga o le laupapa lenei = o le Tusi a Mamona ma lena = o le Tusi Paia. Valaaulia tamaiti e faitau leotele le Mamona 7:9 ma faʻaaoga fuaitau i luga o le laupapa e faʻatumu ai avanoa. O a mea ua tatou aoao e uiga i le Tusi Paia ma le Tusi a Mamona mai lenei fuaiupu?

• Faaali atu se Tusi a Mamona ma se Tusi Paia. Faasoa atu ni nai tala mai tusi taitasi, faaali ata pe afai e maua (tagai i le Tusi Ata o le Talalelei). Valaaulia tamaiti e faasino i le tusi e sau mai ai le tala. Aisea tatou te manaomia ai tusi uma e lua?

• Tusi upu taitasi o le mataupu faavae o le faatuatua lona valu i luga o ni fasi pepa eseese. Tuu atu se upu se tasi pe lua i tamaiti taitoatasi, ma valaaulia tamaiti e galulue faatasi e tuu upu i le faasologa sao. Ona fai atu lea ia i latou e toe fai le mataupu faavae o le faatuatua mo ni nai taimi. O le a le mea o loo aoaoina ai i tatou?

  

  O loo Molimau le Tusi a Mamona e uiga ia Iesu Keriso.

Mamona 8:1–7

E mafai ona ou filifilia le mea tonu tusa lava pe ou te lagonaina le tuuatoatasi.

O le naunautai o Moronae e “faataunuu le poloaiga a [lona] tama,” e ui lava ina maliu lona tama, e mafai ona musuia tamaiti e usiusitai i poloaiga a le Atua.

Gaoioiga e Mafai Ona Fai

• Faitau faatasi ma tamaiti le Mamona 8: 1-7 ma valaaulia i latou e faasoa mai o latou lagona pe ana fai o i latou o Moronae. Fai atu ia i latou e toe tilotilo i fuaiupu 1, 3, ma le 4 e saili ai le mea na poloaiina Moronae e fai. Na faapefea ona “faataunuuina [e Moronae] le poloaiga a [lona] tama”? E faʻapefea ona avea i tatou faapei o Moronae?

• Valaaulia tamaiti e tusi i lalo se tulaga e tatau ona latou faia ai se filifiliga i le va o le saʻo po o le sese pe a leai se tasi e matamata mai. Tuu o latou manatu i totonu o se atigipusa, ma tuu atu i tamaiti e auauai i le pikiina o se tulaga ma faasoa mea o le a latou faia e avea ai faapei o Moronae.

Mamona 8:24–26; 9:7–26

O le Atua o “se Atua o Vavega.”

E toʻatele tagata i aso nei e le talitonu o loʻo tutupu pea vavega. Faaaoga aoaoga a Moronae i nei fuaiupu e aoao ai tamaiti pe afai tatou te faatuatua, e mafai ona tatou vaai i le Atua o galueaiina vavega i o tatou olaga.

Gaoioiga e Mafai Ona Fai

• Faaali atu i tamaiti se fua o se kuka. O le a se mea e tupu pe afai e te tuʻua se vaega taua o le fua? Valaaulia tamaiti e suesue i le Mamona 8:24 ma le 9:20–21 e saili ai le “mea e manaomia” e tatau ona tatou i ai ao le i mafai e le Atua ona faia vavega. Faasoa atu faataitaiga o vavega-tetele pe laiti-na e vaaia i le Ekalesia po o lou olaga. Valaaulia tamaiti e faasoa mai o latou lava faataitaiga.

• Vaevae tamaiti i ni ‘au se lua. Valaaulia ia au e vaavaai mo faataitaiga o vavega i nisi o mau po o tusitusiga paia uma nei: Mamona 8:24; 9:11–13, 16–18, 21–25. O le a se mea e mafai ona tatou fai atu i se tasi e manatu o vavega e le o toe tutupu? (tagai Mamona 9:9, 15–21).

Fautuaina le Aoaoina i le Aiga

Valaaulia tamaiti e fai atu i se tagata o lona aiga e faamatala se vavega na faamalosia ai lana molimau.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona o le filemu, alofa, ma le mafanafana latou te mauaina, pe a latou talanoa pe usuina le pese e uiga ia Iesu Keriso ma Lana talalelei e mai le Agaga Paia (tagai Aoao Atu i le Ala a le Faaola, 11).